ឃើញអាមេរិកនិងកូរ៉េខាងត្បូងធ្វើសមយុទ្ធទ័ពអាកាស កូរ៉េខាងជើងដំឡើងសំឡេង
កូរ៉េខាងត្បូងបានគូសបញ្ជាក់នៅថ្ងៃព្រហស្បតិ៍ទី ២កុម្ភៈនេះ រៀបចំធ្វើសមយុទ្ធទ័ពអាកាសរួមគ្នាជាមួយនឹងសហរដ្ឋអាមេរិក ដើម្បីបង្ហាញឱ្យឃើញអំពីឆន្ទៈនិងសមត្ថភាព ដ៏ខ្លាំងក្លា និងគួរឱ្យទុកចិត្តរបស់សហរដ្ឋអាមេរិក។ ប៉ុន្តែសមយុទ្ធនេះបានធ្វើឱ្យកូរ៉េខាងជើងផ្ទុះកំហឹងដំឡើងសំឡេងយ៉ាងខ្លាំង ចោទថាអាមេរិកកំពុងចេញមុខតតាំងចំៗហើយ។
ចុះផ្សាយនៅថ្ងៃ៖
ស្តាប់ - ០២:០៧
អាមេរិកនិងកូរ៉េខាងត្បូងបានធ្វើសមយុទ្ធទ័ពអាកាសរួមគ្នានៅថ្ងៃពុធទី ១កុម្ភៈ នៅសមុទ្ទលឿង ដែលខណ្ឌចែកឧបទ្វីបកូរ៉េនិងប្រទេសចិន ដោយមានយន្តហោះទម្លាក់គ្រាប់បែកយុទ្ធសាស្ត្រធុនធ្ងន់ B-1B យន្តហោះប្រដេញF-22 របស់កងទ័ពអាកាសអាមេរិក និងយន្តហោះចម្បាំងF-35 របស់ទ័ពអាកាសកូរ៉េខាងត្បូង។ នេះបើតាមក្រសួងការពារជាតិកូរ៉េខាងត្បូង។
លំហាត់សឹកនេះធ្វើឡើងបន្ទាប់ពីរដ្ឋមន្ត្រីការពារជាតិអាមេរិកនិងកូរ៉េខាងត្បូងបានព្រមព្រៀងគ្នានៅសប្តាហ៍នេះ ពង្រីកនិងពង្រឹងកំរិតនិងទំហំនៃសមយុទ្ធរួមគ្នា ដើម្បីប្រឈមនឹងការបង្កហេតុឥតឈប់ឈររបស់ព្យុងយ៉ាង។ ម្យ៉ាងទៀត សេអូលចង់ឱ្យមតិសាធារណៈកូរ៉េខាងត្បូង ដែលព្រួយបារម្ភកាន់តែខ្លាំងឡើង បានឃើញអំពីភាពរឹងមាំរបស់អាមេរិកក្នុងវិស័យការពារជាតិ ក្រោយពីកូរ៉េខាងជើងបានប្រកាសខ្លួនជាមហាអំណាចនុយក្លេអ៊ែរនិងសាកល្បងមីស៊ីលយ៉ាងច្រើន មួយឆ្នាំមកនេះ។
ប៉ុន្តែសម្រាប់កូរ៉េខាងជើង ការបង្កើនសមយុទ្ធរួមអាមេរិកកូរ៉េខាងត្បូង គឺជាការកន្លងបន្ទាត់ក្រហមហាមឃាត់។ អាមេរិកនឹងទទួលតបវិញនូវការវាយប្រហារនុយក្លេអ៊ែរ ដោយអាវុធនុយក្លេអ៊ែរ និងជាការតតាំងគ្នាដោយចំៗ។ នេះបើតាមប្រតិកម្មរបស់អ្នកនាំពាក្យក្រសួងការបរទេសកូរ៉េខាងជើង ដោយបន្ថែមទៀតថា ព្យុងយ៉ាងមិនត្រូវការមានទំនាក់ទំនង ឬការចរចាជាមួយអាមេរិកទេ ដរាបប្រទេសនេះនៅតែបន្តនយោបាយប្រឆាំងនឹងកូរ៉េខាងជើង។
សូមបញ្ជាក់ថាសមយុទ្ធរួមគ្នារវាងអាមេរិកនិងកូរ៉េខាងត្បូង តែងត្រូវបានកូរ៉េខាងជើងចាត់ទុកជាការហាត់ត្រៀមចូលឈ្លានពានប្រទេសខ្លួន និងតែងតបតវិញដោយពាក្យគំរាម និងធ្វើសមយុទ្ធវិញ។
បើតាមសាស្ត្រាចារ្យ Yang Moo-jin នៅសកលវិទ្យាល័យសិក្សាកូរ៉េខាងជើង នៅសេអ៊ូល អាមេរិកជាអ្នកធ្វើឱ្យស្ថានភាពនៅឧបទ្វីបធ្លាក់ចុះនិងផ្តល់លេសឱ្យកូរ៉េខាងជើងអភិវឌ្ឍន៍កម្មវិធីនិងអាវុធនុយក្លេអ៊ែរ។ ភាពតានតឹងនឹងកាន់តែប៉ោងឡើងសម្រាប់សេអូលនិងវ៉ាស៊ីនតោន ព្រោះកូរ៉េខាងជើងអាចនឹងធ្វើព្យុះហយាត្រានិងបង្ហោះផ្កាយរណបស៊ើបការណ៍មួយ នៅមុនថ្ងៃបុណ្យធំមួយរបស់ប្រទេស គឺថ្ងៃទី ១៦កុម្ភៈខាងមុខ ដែលត្រូវជាថ្ងៃកំណើតរបស់លោក គីម ជុងអ៊ីលដែលជាឪពុករបស់មេដឹកនាំ គីម ជុងអ៊ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ