កូរ៉េខាងជើងគំរាមចង់ប្រែក្លាយមហាសមុទ្ទប៉ាស៊ីហ្វិកជាវាលប្រយុទ្ធ
ឧបទ្វីបកូរ៉េកំពុងឡើងកម្តៅ។ ៤៨ម៉ោងក្រោយការបាញ់សាកល្បងមីស៊ីលបាលីស្ទិកអន្តរទ្វីប នៅថ្ងៃចន្ទទី ២០ កុម្ភៈនេះ កូរ៉េខាងជើងបានបាញ់មីស៊ីលបាលីស្ទិកថ្មីពីរគ្រាប់ទៀត នៅឆ្នេរខាងកើត។ ទន្ទឹមគ្នានោះលោកស្រី គីម យោជុង ប្អូនស្រីរបស់មេដឹកនាំកូរ៉េខាងជើង បានគំរាមប្រែក្លាយមហាសមុទ្ទប៉ាស៊ីហ្វិក ទៅវាលប្រយុទ្ធ។ នេះជាការដំឡើងសាច់ដុំរបស់កូរ៉េខាងជើងតបទៅនឹងគម្រោងធ្វើលំហាត់សឹករបស់កូរ៉េខាងត្បូងនិងសម្ព័ន្ធមិត្តអាមេរិក នៅថ្ងៃពុធខាងមុខ។
ចុះផ្សាយនៅថ្ងៃ៖
ស្តាប់ - ០២:១០
កូរ៉េខាងជើងនឹងឱ្យសត្រូវសងគ្រប់ចំនួនចំពោះទង្វើរបស់ពួកគេ ហើយនឹងប្រែក្លាយមហាសមុទ្ទប៉ាស៊ីហ្វិក ទៅសមរភូមិប្រយុទ្ធ ប្រសិនបើអាមេរិកនៅតែបន្តសកម្មភាពវាយប្រហារយោធា។ នេះជាសំដីគំរាមរបស់លោកស្រី គីម យោជុង ប្អូនស្រីបង្កើតរបស់ប្រមុខដឹកនាំកូរ៉េខាងជើង គីម ជុងអ៊ុន នៅព្រឹកថ្ងៃចន្ទទី២០កុម្ភៈ អមដោយការបាញ់មីស៊ីលបាលីស្ទិករយៈចម្ងាយខ្លីពីរគ្រាប់ ជាសាក្សីនៃភាពដាច់ខាតរបស់ព្យុងយ៉ាងផង។
នេះជាការបាញ់មីស៊ីលលើកទីពីរ ក្នុងចន្លោះពេលមិនដល់៤៨ម៉ោងផង។ កាលពីថ្ងៃសៅរ៍ កូរ៉េខាងជើងបានបាញ់មីស៊ីលបាលីស្ទិកអន្តរទ្វីប ដែលធ្លាក់ក្នុងតំបន់សេដ្ឋកិច្ចផ្តាច់មុខរបស់ជប៉ុន ទន្ទឹមពេលនឹងយន្តហោះទម្លាក់គ្រាប់បែបកអាមេរិកB-1bជាច្រើនគ្រឿង កំពុងហោះឆ្វែលលើឧបទ្វីបកូរ៉េ។ ព្យុងយ៉ាងបានអួតអាងថា ល្បឿននៃការបាញ់មីស៊ីលអន្តរទ្វីបនោះ មានកំរិតគួរឱ្យភ្ញាក់ផ្អើល ពោលគឺអាចមានសមត្ថភាពវាយបកនុយក្លេអ៊ែរ។ នៅថ្ងៃនេះ កូរ៉េខាងជើងបានបាញ់មីស៊ីលបាលីស្ទិករយៈខ្លី ចេញទម្រពហុរ៉ុកកែត៦០០មីល្លីម៉ែត្រ សំដៅសមុទ្ទខាងកើត ឬសមុទ្ទជប៉ុន។ បើតាមអ្នកវិភាគ ការបាញ់មីស៊ីលរយៈខ្លី ជាសារព្រមានសំដៅវាយប្រហារលើមូលដ្ឋានទ័ពអាមេរិក ឬទីបញ្ជាការដ្ឋានកូរ៉េខាងត្បូងក្នុងតំបន់។
តាំងពីចូលខែមករាឆ្នាំ២០២៣មក ឧបទ្វីបកូរ៉េហាក់បានស្គាល់ភាពធូរស្បើយបន្តិច ប៉ុន្តែមិនបានប៉ុន្មានថ្ងៃផង ភាពតានតឹងបានប៉ោងឡើងយ៉ាងខ្លាំងវិញ ព្រោះភាគីម្ខាងៗសុទ្ធតែចង់បង្ហាញថាខ្លួនត្រៀមជាស្រេចនឹងប្រយុទ្ធ។ សម្ព័ន្ធមិត្តអាមេរិកនិងកូរ៉េខាងត្បូង មានគម្រោងធ្វើលំហាត់សឹកផ្លូវអាកាស ដែលមានយន្តហោះប្រដេញនិងទម្លាក់គ្រាប់បែកចូលរួមផង នៅថ្ងៃពុធទី២២ កុម្ភៈ។ ជាសមយុទ្ធបែបវាយប្រហារ និងវាយបក នុយក្លេអ៊ែរភ្លាមលើកូរ៉េខាងជើង តែក៏ជាការបញ្ឆេះកំហឹងរបបព្យុងយ៉ាងឱ្យកាន់ខ្លាំងដែរ។ កូរ៉េខាងជើងសន្យាផ្តល់ចម្លើយតបនឹងសមយុទ្ធអាមេរិក-កូរ៉េខាងត្បូង ដែលគេពុំធ្លាប់ជួបប្រទះពីមុនមកទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ