តៃវ៉ាន់សន្យាពង្រឹងសម្ព័ន្ធភាពយោធា ជាមួយសហរដ្ឋអាមេរិក
នៅថ្ងៃអង្គារទី២១កុម្ភៈនេះ លោកស្រីប្រធានាធិបតីកោះតៃវ៉ាន់ បានប្រកាសថាតៃវ៉ាន់ នឹងពង្រឹងសម្ព័ន្ធភាពយោធា ជាមួយនឹងសហរដ្ឋអាមេរិក ឲ្យបានខ្លាំងឡើងថែមទៀត ដើម្បីទប់ទល់ជាមួយនឹងមនោគមន៍វិជ្ជាវាទទីនៃរបបអំណាចផ្តាច់ការ។ ការលើកឡើងរបស់លោកស្រី ឆៃ អ៊ីងវែន នេះ គឺត្រូវបានធ្វើឡើង នៅក្នុងឱកាសដែលលោកស្រីបានទទួលជួបជាមួយគណប្រតិភូ សមាជិកសភាអាមេរិកមួយក្រុម ដែលទៅធ្វើទស្សនកិច្ចនៅកោះតៃវ៉ាន់។ សូមបញ្ជាក់ថា ជាមួយនឹងបរិបទសង្គ្រាមនៅអ៊ុយក្រែន សំណុំរឿងកោះតៃវ៉ាន់កំពុងតែត្រូវបានគេតាមដានយ៉ាងប្រុងប្រយ័ត្ន ខណៈចិនបានគំរាមកាន់តែខ្លាំងអំពីការប្រើកម្លាំង ដើម្បីយកតៃវ៉ាន់មកគ្រប់គ្រងវិញ។
ចុះផ្សាយនៅថ្ងៃ៖
ស្តាប់ - ០២:៤៣
កាលពីថ្ងៃសុក្រសប្តាហ៍កន្លងទៅ លោក Michael Chase អនុរដ្ឋមន្ត្រីក្រសួងការពារជាតិអាមេរិក បានទៅដល់កោះតៃវ៉ាន់។ នៅថ្ងៃអង្គារទី២១កុម្ភៈនេះ គណប្រតិភូសមាជិកសភាអាមេរិកមួយក្រុមទៀត បានទៅធ្វើទស្សនកិច្ចនៅកោះតៃវ៉ាន់ រយៈពេល៥ថ្ងៃ។ ក្នុងឱកាសជួបជាមួយគណប្រតិភូនេះ នៅក្រុងតៃប៉ិ លោកស្រី ឆៃ អ៊ីងវែន ប្រធានាធិបតីតៃវ៉ាន់ បានថ្លែងថា តៃវ៉ាន់ និងសហរដ្ឋអាមេរិក នឹងបន្តពង្រឹងសម្ព័ន្ធភាពកងទ័ព។
លោកស្រីបន្ថែមទៀតថា តៃវ៉ាន់ សន្យាពង្រឹងឲ្យកាន់តែសកម្មខ្លាំងឡើង នូវទំនាក់ទំនងសហប្រតិបត្តិការ ជាមួយសហរដ្ឋអាមេរិក ព្រមទាំងប្រទេសប្រជាធិបតេយ្យទាំងអស់ ដើម្បីរួមគ្នាទប់ទល់នឹងមនោគមន៍វិជ្ជាវាទទីនៃរបបអំណាចផ្តាច់ការ ព្រមទាំងរួមគ្នាទប់ស្កាត់បម្រែបម្រួលអាកាសធាតុ។ លោកស្រីប្រធានាធិបតីតៃវ៉ាន់ សង្កត់បន្ថែមថាត្រូវតែរួមគ្នាការពារតម្លៃលទ្ធិប្រជាធិបតេយ្យ និងសិទ្ធិសេរីភាព។
ដោយមិនបានលំអិតថា ការពង្រឹងទំនាក់ទំនងកងទ័ពជាមួយអាមេរិក នឹងផ្តោតលើចំណុចអ្វីខ្លះនោះ លោកស្រីប្រមុខរដ្ឋាភិបាលតៃវ៉ាន់ បានត្រឹមអះអាងថា វាដល់ពេលហើយ ដែលត្រូវតែពិចារណា រិះរកលទ្ធភាពថ្មីៗបន្ថែមទៀត ដើម្បីពង្រឹងសហប្រតិបត្តិការ រវាងកោះតៃវ៉ាន់ និងសហរដ្ឋអាមេរិក។
ដោយឡែក បើផ្អែកតាមលោក Ro Khanna សមាជិកគណកម្មការសភាអាមេរិក ទទួលបន្ទុកកិច្ចការប្រកួតប្រជែងយុទ្ធសាស្ត្រ គឺការពង្រឹងសហប្រតិបត្តិការរវាងតៃវ៉ាន់ និងអាមេរិក នឹងផ្តោតទៅលើវិស័យការពារជាតិ និងបច្ចេកវិទ្យាផលិតឧបករណ៍ សឺមីកុងឌុកទ័រ ដែលជាធាតុផ្សំបច្ចេកវិទ្យាអេឡិកត្រូវនិកដ៏សំខាន់។ លោកម្នាក់នេះបានបញ្ជាក់ថា គណប្រតិភូអាមេរិក សប្បាយចិត្តណាស់ដែលបានជួបជាមួយលោក Morris Chang ស្ថាបនិកក្រុមហ៊ុន Taiwan Semiconductor Manufacturing Company (TSMC) ដែលជាក្រុមហ៊ុនផលិតឧបករណ៍សឺមីកុងដុកទ័រដ៏ធំបំផុតមួយ។
សូមបញ្ជាក់ដែរថា ស្របពេលដែលគណប្រតិភូសមាជិកសភាអាមេរិក មានវត្តមាននៅកោះតៃវ៉ាន់ ក៏មានគណប្រតិភូចិនមកពីក្រុងសៀងហៃ បានទៅទស្សនកិច្ចនៅក្រុងតៃប៉ិដែរ កាលពីថ្ងៃចន្ទទី២០កុម្ភៈ ដែលនេះគឺជាលើកទីមួយមួយ គិតចាប់ពីចុងឆ្នាំ២០១៩មក។ គណប្រតិភូចិនតំណាងក្រុងសៀងហៃ ត្រូវបានទទួលដោយលោក Chiang Wan-an អភិបាលក្រុងតៃប៉ិ ដែលជាសមាជិកគណបក្សគួមីនតាំង។ សូមបញ្ជាក់ថា គណបក្សគួមីងតាង មានទំនោរនយោបាយខិតទៅរកចិន ហើយសង្ឃឹមយកឈ្នះគណបក្សរបស់លោកស្រី ឆៃ អ៊ីងវែន នៅក្នុងពេលបោះឆ្នោតប្រធានាធិបតីតៃវ៉ាន់ នៅឆ្នាំ២០២៤ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ