ថៃនឹងឈប់នាំចូលកាកសំណល់ប្លាស្ទិកមួយចំនួន គិតចាប់ពីឆ្នាំ២០២៥ទៅ
ចាប់ពីឆ្នាំ២០២៥ទៅ ថៃនឹងឈប់នាំចូលកាកសំណល់ប្លាស្ទិក មួយចំនួន។ ជាការសម្រេចរបស់រាជរដ្ឋាភិបាលថៃ ក្នុងទឹសដៅប្រយុទ្ធប្រឆាំង នឹងការបំពុលបរិស្ថាន ដោយកាកសំណល់ប្លាស្ទិក។ តែយ៉ាងណាក៏ដោយ អង្គការក្រៅរដ្ឋាភិបាលមួយចំនួន បានសម្តែងការខកចិត្ត ព្រោះថាការសម្រេចនេះ មានលក្ខណៈមិនគ្រប់គ្រាន់ទេ ព្រោះវាមិនបានគ្រប់ដណ្តប់ លើកាកសំណល់ប្លាស្ទិកគ្រប់ប្រភេទនោះទេ។
ចុះផ្សាយនៅថ្ងៃ៖
ស្តាប់ - ០២:៤៩
ផ្អែកតាមការបញ្ជាក់ពីលោកស្រី Tipana Sirichana អ្នកនាំពាក្យរដ្ឋាភិបាលថៃ គឺចាប់ពីឆ្នាំ២០២៤ទៅ ថៃនឹងកាត់បន្ថយការនាំចូលកាកសំណល់ប្លាស្ទិក ឲ្យបាន៥០% នៃសមត្ថភាពផលិតរបស់ថៃបច្ចុប្បន្ន។ ហើយចាប់ពីដំណាច់ឆ្នាំ២០២៤ទៅ គឺថៃនឹងឈប់នាំចូលទាំងស្រុងតែម្តង នូវកាកសំណល់ប្លាស្ទិក ដើម្បីប្រយុទ្ធប្រឆាំងនឹងការបំពុលបរិស្ថាន បង្កឡើងដោយកាកសំណក់ប្រភេទនេះ។
សូមបញ្ជាក់ថា ថៃគឺជាប្រទេសដែលទទួលនាំចូលកាកសំណល់ប្លាស្ទិក ដ៏ច្រើនសន្ធឹកមួយ ក្នុងចំណោមប្រទេសមួយចំនួន មានដូចជា ម៉ាឡេស៊ី ឥណ្ឌូណេស៊ី វៀតណាម និងតួកគីជាដើម។ រវាងពីខែមករា ដល់ខែវិច្ឆិកា ឆ្នាំ២០២២ ថៃបាននាំចូលកាកសំណល់ប្លាស្ទិកចំនួនសរុប ១៦៣០០០តោន ដែលប្រមាណពាក់កណ្តាល ដឹកមកពីជប៉ុន និង និងសហរដ្ឋអាមេរិក។
គួរកត់សំគាល់ថា ថ្វីបើការសម្រេចរបស់រដ្ឋាភិបាលថៃ ឈប់នាំចូលកាកសំណក់ប្លាស្ទិកនេះ ជាការបោះជំហានមួយដ៏ល្អមែន តែអង្គការក្រៅរដ្ឋាភិបាលនៅថៃ បានសម្តែងការខកចិត្ត ព្រោះថាវិធាននេះ នៅទន់ខ្សោយ និងគ្របដណ្ដប់ តែទៅលើផ្នែកតូចមួយតែប៉ុណ្ណោះ នៃបញ្ហាកាកសំណល់ប្លាស្ទិក។ លោក Tara Buakamsri ប្រធានអង្គការ Greenpeace ប្រចាំប្រទេសថៃ បានលើកឡើងថា អាជ្ញាធរថៃ បានកំណត់ហាមឃាត់កាកសំណក់ប្លាស្ទិកប្រភេទមួយចំនួនប៉ុណ្ណោះ មិនមែនគ្រប់មុខឡើយ។
ដូចគ្នាដែរ លោក Punyathorn Jeungsmarn តំណាងអង្គការ EARTH បានលើកឡើងថា អាជ្ញាធរថៃត្រូវតែបង្កើនការប្រុងប្រយ័ត្ន តាមដានឲ្យម៉ដ្ឋចត់ ព្រោះគ្រប់កុងទឺនឺដឹកកាកសំណល់ប្លាស្ទិកនាំចូលមក មិនត្រូវបានត្រួតពិនិត្យត្រឹមត្រូវឡើយ នៅតាមកំពង់ផែ។ បញ្ហានេះ វាអាចបង្កើតឲ្យមានទីផ្សារផ្លូវងងឹត បន្លំនាំចូលកាកសំណល់ប្លាស្ទិក ដែលត្រូវបានហាមឃាត់ដោយច្បាប់។
សូមរំលឹកថា ទីផ្សារកែច្នៃកាកសំណល់ប្លាស្ទិក ដើម្បីប្រើប្រាស់ឡើងវិញ ត្រូវបានក្រឡាប់ចាក់យ៉ាងខ្លាំង បន្ទាប់ពីរដ្ឋាភិបាលចិន បានសម្រេចនៅឆ្នាំ២០១៨ ឈប់ទទួលនាំចូលកាកសំណល់ប្លាស្ទិក ប្រភេទមួយចំនួនធំ។ ប្រទេសមួយចំនួននៅអាស៊ីអាគ្នេយ៍ បានក្លាយជាគោលដៅធំ នៃដឹកជញ្ជូនកាកសំណល់ប្រភេទនេះ ដើម្បីយកទៅកែច្នៃ។ ក៏ប៉ុន្តែ ជាមួយនឹងទំហំកាកសំណល់ដ៏ច្រើនមហិមា ប្រទេសខ្លះនាំចូលយកទៅ តែដោយគ្មានសមត្ថភាពកែច្នៃ ឲ្យបានគ្រប់គ្រាន់ទេ។ បូកបន្ថែមនឹងភាពធូររលុងរបស់អាជ្ញាធរ ក្នុងការអនុវត្តច្បាប់ ព្រមទាំងអំពើពុករលួយផងនោះ កាកសំណល់ប្លាស្ទិកទាំងនោះ ត្រូវគេដឹកយកទៅចាក់ចោលនៅតាមទីវាល ក្នុងធម្មជាតិ ដោយគ្មានគិតក្រែងពីការបំពុលបរិស្ថាន និងសុខភាពរបស់ប្រជាពលរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ