ចិនបានឃាត់ខ្លួនបុគ្គលិកជនជាតិចិនចំនួន ៥នាក់ដែលធ្វើការឲ្យក្រុមហ៊ុនអាមេរិកនៅចិន
នៅក្នុងប្រទេសចិន ក្រុមហ៊ុនអាមេរិកឈ្មោះ Mintz Group បានបញ្ជាក់នៅក្នុងសេចក្តីប្រកាសព័ត៌មាននាថ្ងៃសុក្រ ទី២៤ មីនាថា មានបុគ្គលិករបស់ខ្លួនចំនួន ៥នាក់ត្រូវបានរដ្ឋអំណាចចិនឃាត់ខ្លួន។ តាមសេចក្តីប្រកាសព័ត៌មានដដែល ក្រុមហ៊ុន Mintz Group បានអះអាងពីការមិនបានទទួលព័ត៌មានណែនាំ ឬព្រមានផ្លូវការណាមួយជាមុនពីរដ្ឋាភិបាលចិន និងថា ក្រុមហ៊ុនមិនបានធ្វើអ្វីខុសទេ។
ចុះផ្សាយនៅថ្ងៃ៖
ស្តាប់ - ០១:៤០
បុគ្គលិកក្រុមហ៊ុន Mintz Group ទាំង ៥នាក់ដែលរដ្ឋអំណាចចិនបានចាប់ខ្លួនជាជនជាតិចិនទាំងអស់គ្នា នេះបើតាមការបញ្ជាក់របស់ Mintz Group នៅក្នុងសេចក្តីប្រកាសព័ត៌មានរបស់ខ្លួន។ ក្រៅពីការចាប់ខ្លួនបុគ្គលិកជនជាតិចិនទាំង ៥នាក់ រដ្ឋអំណាចចិនក៏បានបិទសកម្មភាពរបស់ក្រុមហ៊ុន ហើយបើតាមក្រុមអ្នកកាសែតរបស់ AFP គេមិនបានឃើញវត្តមានបុគ្គលិកណាម្នាក់នៅក្នុងក្រុមហ៊ុន Mintz Group ហើយទ្វារក្រុមហ៊ុនត្រូវបានចាក់សោរដោយប្រើចង្វាក់ទៀតផង។ ដំណឹងមួយនេះបានធ្វើឲ្យក្រុមហ៊ុន Mintz Group មានការស្រឡាំងកាំង និងភ្ញាក់ផ្អើលយ៉ាងខ្លាំង។
ស្រឡាំងកាំង និងភ្ញាក់ផ្អើលព្រោះនៅមុនកើតរឿងរ៉ាវមួយនេះ ក្រុមហ៊ុន Mintz Group មិនបានទទួលព័ត៌មានផ្លូវការអ្វីទាំងអស់ពីរដ្ឋអំណាចចិន។ តែទោះជាយ៉ាងនេះក្តី ក្រុមហ៊ុនបានប្រាប់ពីការរកក្រុមមេធាវីឲ្យជួយដោះស្រាយបញ្ហាជាមួយរដ្ឋអំណាចចិន ពិសេសជួយដោះលែងបុគ្គលិកដែលបានចាប់ខ្លួន។ ទន្ទឹមគ្នានេះ ក្រុមហ៊ុនមិនភ្លេចបញ្ជាក់ថាជានិច្ចកាល ខ្លួនបានធ្វើការដោយតម្លាភាព និងបានគោរពត្រឹមត្រូវតាមច្បាប់របស់ចិន។ អ្វីទៅជាហេតុផលនៃការឃាត់ខ្លួនបុគ្គលិកក្រុមហ៊ុន Mintz Group ពេលនេះ?។
រដ្ឋអំណាចចិនមិនទាន់បញ្ជាក់ ហើយការិយាល័យប៉ូលិសចិននៅក្នុងតំបន់បានបដិសេធមិនឆ្លើយនឹងសំណួររបស់ AFP ទេ។ គួរបញ្ជាក់ថា Mintz Group ជាក្រុមហ៊ុនរបស់អាមេរិកដែលមានទីស្នាក់ការកណ្តាលក្នុងក្រុងញូយ៉ក។ Mintz Group ជាក្រុមហ៊ុនដែលមានឯកទេសខាងការស៊ើបអង្កេតស្តីពីការចោទប្រកាន់ក្នុងរឿងក្លែងបន្លំ អំពើពុករលួយ និងអាកប្បកិរិយាមិនល្អនៅកន្លែងធ្វើការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ