ចិន៖ ក្រមហ៊ុនរថយន្តច្រើនឡើងៗ ងាកទៅផលិតរថយន្តដើរដោយថាមពលអគ្គិសនី
សករាជនៃរថយន្តប្រើប្រេងសាំង ជិតចប់ហើយ នៅប្រទេសចិន។ ក្រុមហ៊ុនផលិតរថយន្តច្រើនឡើងៗ ងាកទៅផលិតរថយន្តដើរដោយថាមពលអគ្គិសនី ហើយ ក្រុមហ៊ុនចិនក្នុងវិស័យនេះ នឹងដើរលឿនជាងក្រុមហ៊ុនប្រទេសផ្សេងទៀតនៅបស្ចិមប្រទេស។ នេះបើតាមការវិភាគរបស់អ្នកជំនាញឧស្សាហកម្មរថយន្ត នៅក្នុងឱកាសដែល រដ្ឋអំណាចចិន រៀបចំពិព័រណ៍រថយន្ត នៅក្រុងសៀងហៃ ។
ចុះផ្សាយនៅថ្ងៃ៖
ស្តាប់ - ០២:២៥
នៅសៀងហៃ ជាទីដែល ចិន រៀបចំពិព័រណ៍រថយន្ត ២ ឆ្នាំធ្វើម្តង។ ឆ្នាំនេះ ចិន មានរថយន្ត «៩៤ម៉ាក់ និង៣០០ ម៉ូដែល»។ អ្នកទទួលខុសត្រូវម៉ាក់រថយន្តអង់គ្លេស Lotus លោកMike Johnstone មានប្រសាសន៍ប្រាប់ ភ្នាក់ងារព័ត៌មានបារាំង AFP ថា «អនាគត ចាប់ផ្តើមពីទីនេះ ឥលូវនេះ ក្រុងសៀងហៃនេះហើយដែលនឹងកែប្រែទីផ្សាររថយន្តពិភពលោក។ »
សហព័ន្ធក្រុមអ្នកផលិតរថយន្តចិន ឲ្យដឹងថា ក្នុងឆ្នាំ២០២២ ការលក់រថយន្តដើរដោយចរន្តថាមពលអគ្គិសនី គឺលក់ដាច់ទ្វេដង។ ក្នុងមួយឆ្នាំនេះ គេព្យាករទៀតថា ចិន មានរថយន្តដើរដោយថាមពលអគ្គិសនី ចំនួនប្រមាណ៤០% នៅទីផ្សាររថយន្តប្រភេទនេះ នៅលើពិភពលោក។
នេះក៏ព្រោះតែ «ជាង២០ឆ្នាំហើយ ចិន រៀបចំប្រុងជើងការ»។ នេះបើតាម អ្នកវិភាគទីផ្សារនិងអ្នកជំនាញខាងឧស្សហកម្មរថយន្ត បង្ហាញការយល់ឃើញប្រាប់ទៅទី AFP ថ្ងៃសៅរ៍ ទី២២មេសា ។ តាំងតែពីអំលុងឆ្នាំ២០០០ មកម្ល៉េះ ជាង២ទសវត្សរ៍ហើយ ដែល រដ្ឋអំណាចកណ្តាល និងអាជ្ញាធរមូលដ្ឋានចិន បានចាក់ចូលកញ្ចប់ថវិការរាប់ពាន់លានដុល្លារ ដើម្បីផលិតរថយន្តដើរចរន្តថាមពលអគ្គិសនី។ ដោយសារតែមានជំនួយគាំទ្រឧបត្ថម្ភធន និងការសម្រាលពន្ធនៅក្នុងដំណើរការផលិត និងបន្ថយបញ្ចុះពន្ធលើគ្រឿងសម្ភារៈបរិក្ខាររថយន្ត គឺធ្វើឲ្យវិស័យផលិតរថយន្តចិនដើរដោយរថយន្តអគ្គិសនី ស្ទុះឡើងជាលំដាប់។
ប្រភពពីទូរទស្សន៍ជាតិចិន CCTV, ក្រុមហ៊ុនចិនមួយនៅ Shenzhen ខេត្តខាងត្បូងស្រុកចិន គឺបង្ហាញកម្មវត្ថុផលិតរថយន្តនាំចេញ ៣ សែនគ្រឿង នៅឆ្នាំ២០២៣ នេះ ដែលឆ្នាំទៅមិញ ត្រឹមតែ៥ម៉ឺនគ្រឿងប៉ុណ្ណោះ។
នៅប្រទេសចិន គ្រាន់តែខេត្ត Guangdong មួយប៉ុណ្ណោះ គឺមានស្ថានីយសាកអគ្គិសនីសម្រាប់ឡាន ច្រើនជាង ចំនួនស្ថានីយសាកអគ្គិសនីនៅ សហរដ្ឋអាមេរិក ទាំងមូល។ នេះបើតាមទិន្នន័យរបស់សារព័ត៌មាន Bloomberg។
មហាយក្ស ចិន ជាប្រទេសឧស្សាហកម្ម បញ្ចេញផ្សែងពុលច្រើនជាងគេលើកពិភពលោក តែប្រទេសនេះបានកំណត់គោលដៅផលិតរថយន្ត មិនឲ្យបំពុលបរិស្ថាន នៅរវាងឆ្នាំ២០៣៥។ ការផលិតរថយន្តដើរដោយចរន្តអគ្គិសនី គឺជាដំណាក់កាលដ៏សំខាន់មួយ សម្រាប់ឈានទៅគោលរបស់ ចិន ក្នុងវិស័យបរិស្ថានអាកាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ