ប៉េកាំងចោទថា ផ្កាយរណបរបស់SpaceX ប៊ិះហោះបុកស្ថានីយ៍អវកាសចិន
ជាបុរសដ៏មានជាងគេនៅលើពិភពលោកនិងល្បីខ្លាំងបំផុតនៅចិន ដោយសាររថយន្តដើរដោយចរន្តអគ្គិសនី Tesla លោក Elon Musk កំពុងរងការរិះគន់យ៉ាងខ្លាំងនៅតាមប្រព័ន្ធសង្គម។ ពាក្យរិះគន់និងវាយប្រហារបានផ្ទុះឡើងយ៉ាងព្រោងព្រាត នៅថ្ងៃអង្គារទី ២៨ធ្នូ ២០២១បន្ទាប់ពីប៉េកាំង បានចេញឯកសារមួយចោទថា មានផ្កាយរណបSpaceX ចំនួនពីរ របស់លោក Elon Musk ប៊ិះហោះបុកស្ថានីយ៍អវកាសចិន នៅក្នុងលំហអាកាស។
ចុះផ្សាយនៅថ្ងៃ៖
ស្តាប់ - ០១:៥៩
បើតាមសំណេរដែលប៉េកាំងបានផ្ញើទៅប្តឹងការិយាល័យអវកាសអង្គការសហប្រជាជាតិនៅទីក្រុងវីយ៉ែន កាលពីដើមខែធ្នូ ភ្នាក់ងារអវកាសចិន បានបង្ខំចិត្តបង្ខិតស្ថានីយ៍អវកាស Tiangong ថយចំនួនពីរលើក នៅខែកក្កដាម្តង និងខែតុលាម្តង ដើម្បីគេចពីគ្រោះថ្នាក់ បុកទង្គិចជាមួយនឹងយានរបស់SpaceX និងដើម្បីរក្សាសុវត្ថិភាព ព្រមទាំងអាយុជីវិតរបស់អវកាសយានិកចិនដែលកំពុងធ្វើការនៅទីនោះ។
SpaceX មិនទាន់បញ្ចេញប្រតិកម្មបំភ្លឺតបនឹងពាក្យចោទប្រកាន់របស់ប៉េកាំងទេ។ ប៉ុន្តែប្រជាពលរដ្ឋចិនបាននាំគ្នាជះកំហឹងដាក់លោកមហាសេដ្ឋី Elon Musk ដែលទស្សនាវដ្តីអាមេរិក ទើបប្រកាសចាត់ទុកជាបុរសខ្លាំងប្រចាំឆ្នាំ យ៉ាងព្រោងព្រាតលើបណ្តាញសង្គម។
“ត្រៀមលក្ខណៈឈប់ទិញរថយន្តតេស្លា” នេះជាសារប្រឆាំងនឹងលោក អេឡិន ម៉ឺស ដែលមានអ្នកចូលមើល-អានដល់ទៅជាង៨៧លានដង ក្នុងរយៈពេលមិនបានមួយថ្ងៃផង។ អ្នកប្រើប្រាស់អ៊ីនធ័រនែតខ្លះទៀត បានសរសេរបែបបញ្ឈឺទៀតថា “ចិនទិញតេស្លា ប្រៀបដូចឱ្យលុយទៅលោក Musk សម្រាប់ផ្កាយរណបគប់មកលើស្ថានីយ៍អវកាសចិន” ...
សូមបញ្ជាក់ថា ចិនជាទីផ្សារតេស្លាដ៏ចំបង។ ភាគបួននៃផលិតផលរថយន្តតេស្លាលក់ដាច់នៅចិន ហើយតេស្លាមានរោងចក្រមួយនៅក្រុងសៀងហៃទៀត។ ខាងវិស័យអវកាសវិញ ដើម្បីធានាផ្តល់សេវាអ៊ីនធ័រនែតបានពេញលេញទូទាំងពិភពលោក SpaceX បានបង្ហោះផ្កាយរណបStarlinkដល់ជាង១៥០០។ ជាមួយនឹងបរិមាណផ្កាយរណបដ៏ច្រើនបែបនេះ លំហអវកាសចាប់ផ្តើមចង្អៀត។ អ្នកជំនាញអវកាសអាមេរិកលោក Jonathan McDowell នៅមជ្ឈមណ្ឌលCentre d'astrophysique Harvard-Smithsonian ក៏បានទទួលស្គាល់ដែរថាតាំងពីមានបង្ហោះផ្កាយរណបSpaceX មក ហានិភ័យប៉ះទង្គិច និងបុកគ្នាបានកើនឡើងច្រើន។
ចំណែកចិនវិញ ចិនបានចាប់ផ្តើមសាងសង់ស្ថានីយ៍អវកាសជារបស់ផ្ទាល់ នៅឆ្នាំនេះ ដោយមានអវកាសយានិកចំនួន៦នាក់កំពុងប្រញឹកដៃ តាំងពីខែមិថុនាមក។ ម៉ូឌុលកណ្តាលនៃស្ថានីយ៍នឹងត្រូវសាងសង់ចប់នៅឆ្នាំក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ