ឥណ្ឌា៖ ក្រុមជាតិពន្ធុវាយប្រហារគ្នាស្លាប់ជាង៥០នាក់ និងជាង២ម៉ឺននាក់រត់ចោលផ្ទះសម្បែង
នៅប៉ែកឦសាន ប្រទេសឥណ្ឌា យ៉ាងហោច ប្រជាជន ២៣ ០០០នាក់ ត្រូវភៀសខ្លួនរត់ចោលលំនៅដ្ឋានផ្ទះសម្បែង ក៏ព្រោះតែការវាយប្រហារបង្ហូរឈាមរវាងក្រុមជាតិពន្ធុផ្សេងគ្នា។ នៅថ្ងៃអាទិត្យ ទី៧ឧសភា នគរបាលរដ្ឋមុនីបូរ បានប្រកាសថាយ៉ាងហោច មនុស្ស ៥៤ នាក់បានស្លាប់បាត់បង់ជីវិត នៅក្នុងហេតុការណ៍ប៉ះទង្គិចគ្នា ក្នុងសប្តាហ៍កន្លងទៅនេះ។
ចុះផ្សាយនៅថ្ងៃ៖
ហេតុការណ៍វាយប្រហារបង្ហូរឈាមនេះ បានកើតឡើងនៅក្នុងរដ្ឋមុនីបូរ តំបន់ជាប់ព្រំដែនជាមួយ ភូមា។ ការប៉ះទង្គិចគ្នា បានផ្ទុះឆេះឡើង នៅថ្ងៃពុធកន្លងទៅ និងចេះតែបន្តអូសបន្លាយដល់ថ្ងៃអាទិត្យ។ លំនៅដ្ឋាន ផ្ទះសម្បែង និងរថយន្ត ត្រូវគេដុះបំផ្លាញឆេះព្រោងព្រាត។ ទីបំផុត ត្រូវបង្ខំចិត្តឲ្យរដ្ឋឥណ្ឌា អំណាចកណ្តាល ប្រើប្រាស់កងយោធាដាក់ពង្រាយយាមល្បាត ហើយនិងដាក់បំរាមគោចរហាមធ្វើដំណើរចរាចរណ៍។
ចាប់ពីរាត្រីថ្ងៃសៅរ៍ ឈានចូលថ្ងៃអាទិត្យ គឺ ការប៉ះទង្គិចគ្នា ហាក់បានស្ងប់ស្ងាត់ ហើយបំរាមគោចរ ក៏ត្រូវលើកលែងចេញវិញដែរ នៅក្នុងស្រុកឆរចន្ទបូរ។ ស្រុកនេះ ជាតំបន់ឈ្លោះគ្នាខ្លាំងរវាងជាតិពន្ធុ។ មកទល់នឹងថ្ងៃអាទិត្យ ទី៧ឧសភា ប្រជាពលរដ្ឋរាប់ពាន់នាក់រត់ចេញពីកន្លែងខ្លួនធ្លាប់រស់នៅស្នាក់អាស្រ័យ គឺរត់ចូលទៅជ្រកកោននៅមូលដ្ឋានយោធា។ នេះបើតាមប្រភពពីអាជ្ញាធរឥណ្ឌា។
ភ្នាក់ងារសេវាសុខាភិបាលនៅមូលដ្ឋាន បានរាយការណ៍ប្រាប់ទីភ្នាក់ងារព័ត៌មានបារាំង ថាគ្រាន់តែនៅមន្ទីរពេទ្យ Imphal ក្នុងទីប្រជុំជនរដ្ឋ និងមន្ទីរពេទ្យប្រជុំស្រុក ឆរចន្ទបូរ គឺមានមនុស្សស្លាប់ ប្រមាណ ៥៤ នាក់។
ក្នុងរដ្ឋមុនីបូរ សហគមន៍ជនជាតិ មៃតៃ (Meitei) មានចំនួនភាគច្រើន ហើយត្រូវអាជ្ញាធរផ្តល់ការយកចិត្តទុកដាក់ ផ្តល់ឱកាសការងាររដ្ឋ និង មានកន្លែងសិក្សាអប់រំផ្សេងៗ។ ក៏ប៉ុន្តែ ទង្វើនេះ ធ្វើឲ្យ ក្រុមជាតិពន្ធផ្សេងទៀត មិនពេញចិត្ត ឬច្រណែន និងបញ្ឆេះកំហឹងរើសអើង ហើយបង្កជាអំពើហិង្សា។
នៅប៉ែកឦសាន ប្រទេសឥណ្ឌា មានក្រុមចម្រុះពហុជាតិពន្ធុជាច្រើន ហើយក្រុមនីមួយៗ តែងតែប៉ះទង្គិចគ្នាជាមួយក្រុមមួយផ្សេងទៀត ជាញឹកញយ ហើយក្រុមជនជាតិខ្លះក៏ប្រមូលកម្លាំងប្រុងផ្តាច់ខ្លួន «បំបែកខ្លួន ស្វយ័ត» ដាច់ចេញពីអំណាចកណ្តាលទៀតផង។
ក្នុងរយៈពេលជាង ៧០ឆ្នាំចុងក្រោយនេះ ព្រោះតែបញ្ហាប៉ះទង្គិចឈ្លោះទាស់ទែងនៃក្រុមជាតិពន្ធុផ្សេងគ្នានេះ គឺបានបណ្តាលឲ្យ មនុស្សប្រមាណ ៥ ម៉ឺននាក់ ត្រូវស្លាប់បាត់បង់ជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ