របាយការណ៍Oxfam ទាញសញ្ញាអាសន្នពីការរើសអើងក្នុងសហគមន៍ឥណ្ឌា
អង្គការក្រៅរដ្ឋាភិបាលអន្តរជាតិ Oxfam បានចេញរបាយការណ៍គួរឱ្យព្រួយបារម្ភខ្លាំងមួយ ស្តីពីស្ថានភាពរើសអើងក្នុងសង្គម នៅប្រទេសឥណ្ឌា។ អត្រា ស្ត្រី អ្នកកាន់សាសនាអ៊ីស្លាម ឬជនវណ្ណៈទាប អាចជ្រៀតចូលក្នុងទីផ្សារការងារ និងទទួលបានប្រាក់បៀរវត្សរ៍ទាបជាងប្រជាពលរដ្ឋទូទៅច្រើន។ បើតាមការសិក្សានេះ វិបត្តិកូវីដ១៩ បានមកពង្រីក វិសមភាព កាន់តែខ្លាំងបន្ថែមទៀត។
ចុះផ្សាយនៅថ្ងៃ៖
ស្តាប់ - ០២:០៨
មានសមត្ថភាពស្មើគ្នា ស្ត្រីទទួលបានប្រាក់ខែ៥០អឺរ៉ូទាបជាងបុរស ក្នុងមួយខែ។ ៦០អឺរ៉ូ ទាបជាងពលរដ្ឋទូទៅ បើជាកូនក្នុងត្រកូលវណ្ណៈទាប ឬ ចេញពីក្រុមកុលសម្ព័ន្ធ។ ចំណែកពលរដ្ឋកាន់សាសនាអ៊ីស្លាមវិញ កាន់តែរងការរើសអើងខ្លាំង ដោយបានទទួលប្រាក់បៀរវត្សរ៍ប្រចាំខែតិចជាងគេដល់ទៅ៨០អឺរ៉ូ។ ៥០-៦០-៨០អឺរ៉ូជាចំនួនទឹកប្រាក់ដ៏ច្រើនខ្លាំងណាស់ សម្រាប់ប្រទេសដែលពលរដ្ឋភាគច្រើនមានប្រាក់ខែក្រោម៣០០អឺរ៉ូ នោះ។
នេះបើតាមរបាយការណ៍របស់អង្គការOxfam ដែលជាលើកទីមួយបានសិក្សា អំពីទំហំនៃវិសមភាពក្នុងសង្គមឥណ្ឌាផង អំពីមូលហេតុដែលនាំឱ្យមានការរើងអើងផង។ ហេតុដូច្នេះហើយបានជាអ្នកស្រាវជ្រាវ បានសាកល្បងវិភាគទិន្នន័យរបស់រដ្ឋាភិបាលទាក់ទង ភេទ សាសនា និងវណ្ណៈ។
វិសមភាពសង្គមនៅក្នុងប្រទេសឥណ្ឌា មិនមែនជារឿងថ្មីនិងចម្លែកទេ ប៉ុន្តែទោះបីជាប្រទេសមានរដ្ឋធម្មនុញ្ញ ផ្តល់សមភាពសម្រាប់គ្រប់ពលរដ្ឋក្តី ក៏ឥណ្ឌាមិនអាចជម្រុះការរើងអើសបានដែរ។ នេះបើតាមការពន្យល់របស់លោក Pravas Ranjan Mishra សមាជិកក្រុមអ្នកស្រាវជ្រាវរបស់Oxfam។ ជាលទ្ធផល របាយការណ៍សន្និដ្ឋានថា ក្រុមអ្នកកាន់សាសនាអ៊ីស្លាម ច្រើនតែវិលវល់ក្នុងការងារថោកៗ និងអន់ៗ។ សម្រាប់ពលរដ្ឋវណ្ណៈក្រោម ស្ថានភាពបានប្រសើរជាងមុនបន្តិច ព្រោះឥណ្ឌាបច្ចុប្បន្នមានប្រព័ន្ធកូតាក្នុងទីផ្សារការងារ។ ប៉ុន្តែ ក្រុមពលករស៊ីឈ្នួលប្រចាំថ្ងៃ នៅតែប្រឈមនឹងស្ថានភាពអាក្រក់ខ្លាំងដដែល។ ការរើងអើង ប្រកាន់វណ្ណៈ សង្កេតឃើញមានខ្លាំងនៅក្នុងតំបន់ជនបទ ហើយនៅតាមក្រុង គឺក្រុមពលរដ្ឋអ៊ីស្លាមជាជនរងគ្រោះជាងគេ។ នេះបើតាមការពន្យល់លម្អិតរបស់ក្រុមអ្នកស្រាវជ្រាវដដែល។
កាន់តែអាសន្នខ្លាំងទៀត គឺស្ត្រីតំណាងឱ្យ២៥%នៃបុគ្គលិកធ្វើការស៊ីប្រាក់ខែ។ ជាអត្រា ធ្លាក់ចុះទាប និងអត្រាដ៏ទាបជាងបណ្តាប្រទេសកំពុងអភិវឌ្ឍន៍ដទៃ ដូចយ៉ាងចិន និងរុស្ស៊ីទៅទៀត។ ជាចុងក្រោយ បើតាមរបាយការណ៍ ការរើងអើងនិងវិសមភាពនៅក្នុងសង្គមឥណ្ឌា កាន់តែធ្ងន់ធ្ងរ បណ្តាលមកពីជំងឺរាតត្បាតសកលកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ