កងទ័ពប៉ាគីស្ថាន ចាប់ខ្លួនលោកអ៊ីមរ៉ាន់ ខាន់ ដើម្បីបង្ហាញថាខ្លួននៅតែមានឥទ្ធិពលនិងអំណាច
លោកអ៊ីមរ៉ាន់ ខាន់ អតីតនាយករដ្ឋមន្ត្រីប៉ាគីស្ថាន ត្រូវបានក្រុមទាហានប៉ារ៉ា ចុះមកចាប់ខ្លួនដល់តុលាការ កាលពីថ្ងៃអង្គារទី៩ឧសភា។ ហើយនៅថ្ងៃពុធ តុលាការប៉ាគីស្ថាន បានប្រកាសអនុញ្ញាត ឲ្យឃុំខ្លួនបណ្តោះអាសន្នលោក អ៊ីមរ៉ាន់ ខាន់ ចំនួន៨ថ្ងៃ ដើម្បីរងចាំសវនាកា ពាក់ព័ន្ធនឹងសំណុំរឿងពុករលួយ។ នេះបើផ្អែកតាមការបញ្ជាក់ ពីលោក អាលី ប៊ូខារី មេធាវីរបស់លោក អ៊ីមរ៉ាន់ ខាន់។ ការឃុំខ្លួននេះ បានបណ្តាលឲ្យផ្ទុះបាតុកម្មតវ៉ារបស់ប្រជាជនអ្នកគាំទ្រលោកអ៊ីមរ៉ាន់ ខាន់ នៅសឹងទូទាំងប្រទេស។
ចុះផ្សាយនៅថ្ងៃ៖
កាលពីថ្ងៃពុធ ទី១០ឧសភា រដ្ឋាភិបាលប៉ាគីស្ថាន បានអនុញ្ញាតឲ្យកងទ័ព ចេញប្រតិបត្តិការបង្ក្រាបបាតុកម្ម នៅខេត្តពិនចាប់ ជាទីដែលបាតុករយ៉ាងហោចជិត១០០០នាក់ ត្រូវបានចាប់ខ្លួន និងសមត្ថកិច្ចនគរបាលប្រមាណ១៣០នាក់ បានរងរបួស។ យ៉ាងណាក៏ដោយ បាតុកម្មនៅតែផុសផុលទូទាំងប្រទេស ដោយក្រុមបាតុករបានចោទថា គឺក្រុមកងទ័ពដែលបានប៉ុនប៉ងធ្វើឃាតលោកអ៊ីមរ៉ាន់ ខាន់ កាលពីខែវិច្ឆិកាឆ្នាំ២០២២ តែមិនបានសម្រេច ទើបងាកមករៀបចំកលល្បិច ចាប់ខ្លួនលោកនាពេលនេះ ដើម្បីរារាំងមិនឲ្យលោក ឈរឈ្មោះបោះឆ្នោតបាន។
យោងតាមលោក ឡូរង់ ហ្កាយែរ (Laurent Gayer) នាយកមជ្ឈមណ្ឌលស្រាវជ្រាវអន្តរជាតិ នៃសាលាវិទ្យាសាស្ត្រនយោបាយបារាំង គឺការចាប់ខ្លួនលោកអ៊ីមរ៉ាន់ ខាន់ នៅពេលនេះ បានបង្ហាញឲ្យឃើញច្បាស់ ថាកងទ័ពប៉ាគីស្ថាននៅតែមានឥទ្ធិពលនិងអំណាច អាចធ្វើអ្វីបានទាំងអស់។
សម្រង់ប្រសាសន៍ លោក Laurent Gayer ដែលបានផ្តល់បទសម្ភាសន៍ឲ្យRFI ពីទីក្រុងការ៉ាជី កាលពីថ្ងៃពុធទី១០ឧសភា២០២៣៖
“កងទ័ព មានឥទ្ធិពលខ្លាំងណាស់នៅប៉ាគីស្ថាន គ្រប់វិស័យទាំងអស់ មិនថាសន្តិសុខ នយោបាយ និងសេដ្ឋកិច្ចជីវភាពប្រជាជន។ លោក អ៊ីមរ៉ាន់ ខាន់ ផ្ទាល់ ក៏បានជាប់ឆ្នោតកាលពីឆ្នាំ២០១៨ ដោយសារតែមានការគាំទ្រពីក្រុមកងទ័ពនេះដែរ មុននឹងមានការឈ្លោះប្រកែក បែកបាក់គ្នា ដូចដែលយើងឃើញនាពេលនេះ។ ជាជម្លោះនយោបាយ ដែលយើងឃើញថាធ្ងន់ធ្ងរខ្លាំង មិនអាចទប់បាននោះទេ។
ក្រុមបាតុករ ដែលជាអ្នកគាំទ្រគណបក្សរបស់លោកអ៊ីមរ៉ាន់ ខាន់ បានប្រាប់ខ្ញុំនៅតាមផ្លូវ កាលពីថ្ងៃម្សិលមិញនេះ ថា ក្រុមកងទ័ពបានឈានជើងធ្វើជ្រុលហួសហេតុ ដែលមិនអាចឲ្យពួកគេអត់ទ្រាំបាន។ មានន័យថា ពីមុនមក ប្រជាជនធ្លាប់គិតថាកងទ័ព ប្រហែលជាមិនហ៊ានធ្វើដល់ថ្នាក់ទៅចាប់ខ្លួនលោកអ៊ីមរ៉ាន់ ខាន់នោះទេ ព្រោះលោកនៅតែមានប្រជាប្រិយភាពណាស់។
ចំណែកខាងកងទ័ពវិញ ក៏ប្រហែលជាមិននឹកស្មានដល់ដែរ ថាក្រោយពេលកងទ័ព ចាប់ខ្លួនលោកអ៊ីមរ៉ាន់ ខាន់ ប្រជាជនប៉ាគីស្ថាន ហ៊ានចេញធ្វើបាតុកម្មប្រឆាំងភ្លូកទឹកភ្លូកដីទូទាំងប្រទេសបែបនេះដែរ។ នេះជាលើកទី១ហើយ ដែលយើងឃើញថា ប្រជាជនប៉ាគីស្ថានហ៊ានចេញធ្វើបាតុកម្ម ប្រឆាំងថ្កោលទោសក្រុមកងទ័ព ដែលធ្លាប់តែជានិម្មិតរូបអំណាច មិនអាចប៉ះពាល់បាន។”
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ