តៃវ៉ាន់៖ គណបក្សគួមីនតាងតែងតាំង លោក ហ៊ូ យូអ៊ី ជាបេក្ខជនឈរឈ្មោះបោះឆ្នោតប្រធានាធិបតី
នៅខែមករា ដើមឆ្នាំ២០២៤ តៃវ៉ាន់នឹងត្រូវបោះឆ្នោតជ្រើសរើសប្រធានាធិបតីថ្មី មកជំនួសលោកស្រី សៃ អ៊ីងវេន ដែលត្រូវចប់អាណត្តិ។ ការបោះឆ្នោតដែលមានសារៈសំខាន់បំផុត ព្រោះអនាគតរដ្ឋាភិបាលថ្មី គឺជាអ្នកកំណត់ទិសដៅនយោបាយរបស់តៃវ៉ាន់និងចិន។ កាលពីថ្ងៃពុធទី១៧ឧសភា គណបក្សគួមីនតាង ដែលជាបក្សមានទំនោរចង់ភ្ជាប់ទំនាក់ទំនងជាមួយចិននោះ បានតែងតាំងបេក្ខជនរបស់ខ្លួនឲ្យឈរឈ្មោះជាប្រធាធនាធិបតី នោះគឺលោក ហ៊ូ យូអ៊ី។ តើលោកម្នាក់នេះ ជាអ្នកណា ហើយមានគោលគំនិតបែបណាដែរ ស្តីពីទំនាក់ទំនងជាមួយចិន?
ចុះផ្សាយនៅថ្ងៃ៖
ស្តាប់ - ០២:២៩
លោក ហ៊ូ យូអ៊ី (Hou Yu-ih) អាយុ ៦៥ឆ្នាំ ត្រូវបានគណបក្សគួមីនតាង តែងតាំងជាបេក្ខជនប្រធានាធិបតី សម្រាប់ការបោះឆ្នោតនៅខែមករាខាងមុខ។ លោកហ៊ូ យូអ៊ី បច្ចុប្បន្នជាចៅសង្កាត់ តៃប៉ិថ្មី ដែលជាសង្កាត់ធំបំផុតនៅតៃវ៉ាន់ មានប្រជាជនរស់នៅប្រមាណ៤លាននាក់។ ជាអតីនាយនគរបាល លោកបានចូលប្រលូកក្នុងនយោបាយ នៅឆ្នាំ២០១០ ដោយបានធ្វើជាចៅសង្កាត់រងទីមួយ ដែលកាលនោះគឺលោក Eric Chou បច្ចុប្បន្នជាប្រធានគណបក្សគួមីនតាង ជាចៅសង្កាត់។
គួរកត់សំគាល់ថា ការតែងតាំងលោក ហ៊ូ យូអ៊ី ជាបេក្ខជនប្រធានាធិបតីរបស់បក្សគួមីនតាង គឺជារឿងគួរឲ្យភ្ញាក់ផ្អើល ខណៈពេលកន្លងមក គឺលោក Terry Gou ស្ថាបិនក្រុមហ៊ុនបច្ចេកវិទ្យាតៃវ៉ាន់ Foxconn ដែលត្រូវគេជឿថាអាចក្លាយជាបេក្ខជនរបស់បក្សគួមីនតាង។
គួរបញ្ជាក់ថា គណបក្សគួមីនតាង ត្រូវគេស្គាល់ថា ជានិច្ចជាកាលមានទំនោរចង់ភ្ជាប់ទំនាក់ទំនងល្អ ជាមួយចិនដីគោក។ នៅពេលអ្នកកាសែតចោទសួរ ស្តីអំពីទំនាក់ទំនងទៅថ្ងៃអនាគត រវាងតៃវ៉ាន់ និងចិន លោក ហ៊ូ យូអ៊ី បានបញ្ជាក់ថា លោកមិនគាំទ្រ ឲ្យតៃវ៉ាន់ប្រកាសឯករាជ្យនោះទេ ហើយលោកក៏មិនគាំទ្រ គោលការណ៍ “ប្រទេសមួយប្រព័ន្ធនយោបាយ២” នោះដែរ។ លោកបានអះអាងថា ចិនបានស្នើប្រើប្រាស់គោលការណ៍ ប្រទេសមួយប្រព័ន្ធ២នេះ មកតៃវ៉ាន់ ដូចនៅហុងកុងដែរ។ ក៏ប៉ុន្តែប្រជាជនតៃវ៉ាន់ជាទូទៅមិនគាំទ្រទេ បន្ទាប់ពីបានឃើញអ្វីដែលចិនបានធ្វើទៅលើហុងកុង។
នៅក្នុងសន្និសិទកាសែត នៅទីស្នាក់ការកណ្តាលបក្សគួមីនតាង កាលពីថ្ងៃពុធទី១៧ឧសភា លោកហ៊ូ យូអ៊ី បានបញ្ជាក់ថា ប្រសិនបើលោកឈ្នះឆ្នោត គឺលោកនឹងធ្វើគ្រប់យ៉ាង ដើម្បីថែរក្សាតៃវ៉ាន់ ការពារការរីកចម្រើនរបស់តៃវ៉ាន់។ លោកអះអាងថា តៃវ៉ាន់គឺជាផ្ទះរបស់ប្រជាជនតៃវ៉ាន់ ដែលត្រូវតែរួមសាមគ្គីគ្នា កសាងឯកភាព ការពារផ្ទះនេះ និងស្ថាបនាអនាគតសម្រាប់យុវជនកូនចៅជំនាន់ក្រោយ។ លោកបន្ថែមថា បច្ចុប្បន្ន ដោយសារតែការបែកបាក់គ្នានេះ តៃវ៉ាន់ត្រូវប្រឈមនឹងសង្គ្រាម ដោយសារតែបរិបទអន្តរជាតិ ចំណែកយុវជនតៃវ៉ាន់វិញ រស់នៅដោយគ្មានក្តីសង្ឃឹម។
សូមបញ្ជាក់ដែរថា លោកស្រី សៃ អ៊ីងវេន ដែលកាន់តំណែងបាន២អាណត្តិហើយ មិនអាចឈរឈ្មោះមួយអាណត្តិទៀតបានទេ។ បេក្ខជនប្រធានាធិបតីរបស់គណបក្សលោកស្រីសៃ អ៊ីងវេន គឺលោក Lai William អាយុ៦៣ឆ្នាំ បច្ចុប្បន្នជាអនុប្រធានាធិបតី។ ទាក់ទិននឹងសំណុំរឿងចិន លោកម្នាក់នេះ មានគោលជំហររឹងខ្លាំង ហើយប្រាថ្នាចង់ឲ្យតៃវ៉ាន់មានឯករាជ្យពេញបរិបូរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ