លោកអេម៉ានុយអែល ម៉ាក្រុង ទៅទស្សនកិច្ចនៅប្រទេសម៉ុងហ្គោលី ជាលើកទី១
ចេញពីទីក្រុងហ៊ីរ៉ូស៊ីម៉ា ក្រោយការបិទបញ្ចប់ជំនួបកំពូល G7 លោកប្រធានាធិបតីបារាំង អេម៉ានុយអែល ម៉ាក្រុង បានចេញដំណើរឆ្ពោះទៅកាន់ទីក្រុងអ៊ូឡង់បាទ័រ ប្រទេសម៉ុងហ្គោលី។ នេះគឺជាដំណើរទស្សនកិច្ចលើកទី១ហើយ សម្រាប់ប្រធានាធិបតីបារាំង នៅក្នុងប្រទេសដ៏ធំ ហ៊ំព័ទ្ធដោយរុស្ស៊ីនិងចិនមួយនេះ។ យោងតាមវិមានប្រធានាធិបតីបារាំង ម៉ុងហ្គោលី គឺជាប្រទេសយុទ្ធសាស្ត្រមួយ សម្រាប់បារាំង នៅក្នុងផែនថាមពល និងអាកាសធាតុ។
ចុះផ្សាយនៅថ្ងៃ៖
ស្តាប់ - ០១:៥៨
ជាទស្សនកិច្ចដែលមានរយៈពេលខ្លី តែមានន័យជានិម្មិតរូបធំបំផុត សម្រាប់បារាំង និងម៉ុងហ្គោលី ព្រោះនេះជាលើកទីមួយហើយ ដែលប្រធានាធិបតីបារាំង ទៅទស្សនកិច្ចនៅម៉ុងហ្គោលី។ លោកម៉ាក្រុង នឹងស្ថិតនៅទីក្រុងអ៊ូឡង់បាទ័រ តែមួយល្ងាចប៉ុណ្ណោះ ដោយលោកនឹងជួបពិសារភោជនីអាហារ ពិភាក្សាការងារ ជាមួយលោកប្រធានាធិបតីម៉ុងហ្គោលី Ukhnaa Khurelsukh និងបន្ទាប់មកទៀតជួបលោកនាយករដ្ឋមន្ត្រីម៉ុងហ្គោលី មុននឹងទៅទស្សនាសារមន្ទីរ Gengis Khan។
យោងតាមមន្ត្រីអមដំណើរលោកម៉ាក្រុង ការចូលទៅទស្សនកិច្ចនៅម៉ុងហ្គោលី គឺមានខ្លឹមសារសំខាន់ណាស់ ។ ប្រទេសដ៏ធំ អតីតសមាជិកសហភាពសហភាពសូវៀតមួយនេះ ស្ថិតនៅហ៊ំព័ទ្ធដោយ ចិននិងរុស្ស៊ី ក៏ប៉ុន្តែប្រទេសនេះខិតខំពង្រឹងលទ្ធិប្រជាធិបតេយ្យ មានការបោះឆ្នោតត្រឹមត្រូវ មានរបបដឹកនាំបែបសេរីនិយម។
សម្រាប់បារាំង ម៉ុងហ្គោលី មានសារសំខាន់សម្រាប់ភូមិសាស្ត្រនយោបាយ ក្នុងខណៈដែលបារាំង រួមទាំងក្រុមប្រទេសលោកខាងលិច កំពុងតែព្យាយាមពង្រីកបណ្តាញផ្គត់ផ្គង់ ឈប់ពឹងផ្អែកតែទៅលើប្រទេសមួយ មិនថា ចិន មិនថារុស្ស៊ី។ ម៉ុងហ្គោលលី មានស្តុករ៉ែអ៊ុយរ៉ានីញ៉ូមដ៏ធំបំផុតមួយ។ ក្រុមហ៊ុនថាមពលនុយក្លេអ៊ែរបារាំង Orano កំពុងតែរៀបចំគម្រោងជីករ៉ែអ៊ុយរ៉ានីញ៉ូមម៉ុងហ្គោលី។
ទន្ទឹមគ្នានេះ ម៉ុងហ្គោលី រំពឹងយ៉ាងខ្លាំង ទៅលើថាមពលធ្យូងថ្ម សម្រាប់ដុតផលិតជាចរន្តអគ្គិសនី ពោលគឺប្រមាណ៩០%ឯណោះ។ បារាំងមានគម្រោងផ្តល់សន្ទុះដល់ការវិនិយោគនៅម៉ុងហ្គោលី ដើម្បីផលិតថាមពលដែលស្អាតស្អំ មិនបំពុលបរិស្ថាន ព្រោះចំហេះធ្យូងថ្ម វាបញ្ចេញឧស្ម័នកាបូនិកច្រើនខ្លាំងណាស់។ បន្ថែមពីនេះ ៨៦%នៃការនាំចេញទំនិញរបស់ម៉ុងហ្គោលី គឺសំដៅទៅចិនទាំងអស់ ដែលពាក់កណ្តាលគឺជារ៉ែធ្យូងថ្ម។ សហរដ្ឋអាមេរិក និងបារាំង មានបំណងផ្តល់ផ្លូវដើរផ្សេងទៀតឲ្យម៉ុងហ្គោលី ដោយមិនត្រូវពឹងផ្អែកខ្លាំងហួសហេតុពេក តែទៅលើមហាយក្សចិន និងរុស្ស៊ីក្បែរខាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ