អាមេរិកចុះកិច្ចព្រមព្រៀងក្នុងវិស័យសន្តិសុខជាមួយប្រទេសមីក្រូណេស៊ី នៅប៉ាស៊ីហ្វិក
សហរដ្ឋអាមេរិកបានប្រកាសនៅថ្ងៃពុធទី ២៤ឧសភា២០២៣នេះ ចុះហត្ថលេខាលើកិច្ចព្រមព្រៀងសន្តិសុខជាមួយរដ្ឋសហព័ន្ធមីក្រូណេស៊ី។ មីក្រូណេស៊ីជាប្រទេសកូនកោះតូចមួយ ស្ថិតនៅក្នុងមហាសមុទ្ទប៉ាស៊ីហ្វិកដែលអាមេរិកចង់ដាក់វត្តមានដើម្បីខ្ទប់ឥទ្ធិពលចិន។
ចុះផ្សាយនៅថ្ងៃ៖
ស្តាប់ - ០២:១០
អាមេរិកនិងមីក្រូណេស៊ីបានចុះហត្ថលេខានៅថ្ងៃពុធនេះ លើឯកសារបី ដែលជាការបន្តកិច្ចព្រមព្រៀង កាលពី២០ឆ្នាំ ស្តីពីការធានាផ្តល់ការពារសន្តិសុខនិងហិរញ្ញវត្ថុដល់មីក្រូណេស៊ីជាថ្នូរនឹងការផ្តល់ទីតាំងថ្មីឱ្យទាហានអាមេរិកឈរជើង ក្នុងតំបន់ប៉ាស៊ីហ្វិកនេះ ដោយនឹងអាចដាក់មូលដ្ឋានទ័ពផង។
មានប្រជាពលរដ្ឋប្រមាណ១សែននាក់ មីក្រូណេស៊ីជាសម្ព័ន្ធមិត្តរបស់វ៉ាស៊ីនតោន និងមានទំនាក់ទំនងយ៉ាងជិតស្និទ្ធជាមួយអាមេរិកតាំងពីបានទទួលឯករាជ្យនៅឆ្នាំ១៩៨៦មក។ កាលពីខែមីនា ប្រធានាធិបតីផុតអាណាត្តិមីក្រូណេស៊ីលោក ដាវីដដ ប៉ានួអេឡូ បានសរសេរលិខិត ចោទប្រកាន់ចិនថាបានដឹកនាំនយោបាយបែបវាយលុក និងបែបពុករលួយ ព្រមទាំងបែបបំពារបំពានលើប្រទេសមីក្រូណេស៊ី ប្រាប់ទៅសភា។
នារយៈពេលប៉ុន្មានឆ្នាំចុងក្រោយមកនេះ ចិនបានពង្រីកឥទ្ធិពលសេដ្ឋកិច្ចយោធាកាន់តែខ្លាំងក្នុងតំបន់ប៉ាស៊ីហ្វិក ដែលជាហេតុធ្វើឱ្យមានភាពប្រកួតប្រជែងយ៉ាងខ្លាំងជាមួយនឹងសហរដ្ឋអាមេរិក។ អាមេរិកក៏ចាប់ពង្រឹងវត្តមានរបស់ខ្លួន ក្នុងតំបន់ឡើងវិញដែរ។ ក្រៅអំពីកិច្ចព្រមព្រៀងក្នុងវិស័យសន្តិសុខជាមួយមីក្រូណេស៊ី អាមេរិកក៏មានកិច្ចព្រមព្រៀងប្រហាក់ប្រហែលគ្នាមួយទៀត ជាមួយនឹងក្រុមប្រទេសកូនកោះតូចៗផ្សេងទៀត មានជាអាទិ៍កោះMarshall និង គឺPalaos ដែលត្រូវអស់សុពលភាពនៅដំណាច់ឆ្នាំ២០២៣។
អាមេរិកអាចបន្តកិច្ចព្រមព្រៀងជាមួយកោះPalaos ដោយស្រួល។ ប៉ុន្តែជាមួយកោះMarshall ការចរចាត្រូវរាំងស្ទះដោយផលវិបាកដ៏ធ្ងន់ធ្ងរនៃការសាកល្បងនុយក្លេអ៊ែរ។ ខាងMarshall ចង់ឱ្យអាមេរិកពន្លឿនការបង់ប្រាក់សំណងប៉ះប៉ូវការខូចខាតបង្កឡើងដោយការសាកល្បងនុយក្លេអ៊ែរ។ ស្របតាមសេចក្តីសម្រេចរបស់តុលាការទារសំណងនុយក្លេអ៊ែរអន្តរជាតិ អាមេរិកត្រូវបង់ជាងបីពាន់លានដុល្លារឱ្យMarshall តែកោះទើបទទួលបានប្រមាណតែ២៥០លានប៉ុណ្ណោះ។ នៅរវាងពីឆ្នាំ១៩៤៦-៥៨ អាមេរិកបានធ្វើការសាកល្បងនុយក្លេអ៊ែរសរុប ៦៧លើកនៅលើកោះ Marshall ដោយបន្សល់ទុកនូវផលវិបាកដ៏អាក្រក់សម្រាប់បរិស្ថាននិងសុខភាពរបស់ប្រជាពលរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ