អាមេរិក និងឥណ្ឌា ព្រមព្រៀងគ្នារៀបចំផែនការ សហប្រតិបត្តិការផ្នែកការពារជាតិ
ចេញពីសិង្ហបុរី លោករដ្ឋមន្ត្រីក្រសួងការពារជាតិអាមេរិក បានបន្តដំណើរទៅកាន់ទីក្រុងញូដេលី ប្រទេសឥណ្ឌា។ នៅទីនោះ លោកបានព្រមព្រៀងជាមួយសមភាគីឥណ្ឌា ថាប្រទេសទាំងពីរ នឹងរៀបចំផែនការ ដើម្បីបង្កើតសហប្រតិបត្តិការផ្នែកការពារជាតិ។ ឥណ្ឌា ក្នុងពេលបច្ចុប្បន្ន កំពុងតែរកវិធីងាកចេញពីការពឹងផ្អែក លើគ្រឿងសព្វាវុធរបស់រុស្ស៊ី ហើយការចាប់ដៃជាមួយអាមេរិកក្នុងវិស័យកងទ័ព ក៏គឺជាយុទ្ធសាស្ត្ររួមកម្លាំងគ្នា ទប់ទល់នឹងឥទ្ធិពលរបស់ចិនដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
នៅទីក្រុងញូដេលី លោកឡយ អូស្ទីន រដ្ឋមន្ត្រីក្រសួងការពារជាតិអាមេរិក បានប្រាប់អ្នកកាសែតថា សហរដ្ឋអាមេរិក និងឥណ្ឌា បានព្រមព្រៀងគ្នារៀបចំផែនការដ៏អស្ចារ្យមួយ ដើម្បីកសាងសហប្រតិបត្តិការផ្នែកកងទ័ព។ ផែនការដ៏ធំមហិមានេះ គឺនឹងអនុញ្ញាតឲ្យប្រទេសទាំង២ ពន្លឿនគម្រោងពិសេសៗជាច្រើន ក្នុងការរួមគ្នាស្រាវជ្រាវ និងរួមគ្នាផលិតគ្រឿងសព្វាវុធទំនើបៗ។
សូមបញ្ជាក់ថា ឥណ្ឌាកន្លងមក គឺមានសម្ព័ន្ធភាពផ្នែកកងទ័ពជាមួយរុស្ស៊ី ដោយប្រើប្រាស់សម្ភារៈ និងគ្រឿងសព្វាវុធជាច្រើនទិញមកពីរុស្ស៊ី។ ក៏ប៉ុន្តែប៉ុន្មានឆ្នាំចុងក្រោយនេះ ឥណ្ឌាបានព្យាយាមធ្វើទំនើបកម្ម ងាកទៅស្វែងរកអ្នកផ្គត់ផ្គង់ផ្សេង ក្រៅពីរុស្ស៊ី ដើម្បីរំដោះខ្លួនពីគំនៀបឥទ្ធិពលរុស្ស៊ីតែម្នាក់។ ប្រទេសលោកខាងលិចជាច្រើន បានចរចា ចង់លក់គ្រឿងសព្វាវុធទៅឲ្យឥណ្ឌា ក្នុងទឹកប្រាក់រាប់ពាន់លានដុល្លារ។ តែអ្វីដែលឥណ្ឌាតែងតែទាមទារ គឺការផ្ទេរចំណេះបច្ចេកវិទ្យា ពីប្រទេសអ្នកលក់ ទៅឲ្យឥណ្ឌា។ មានន័យថា នៅក្នុងកិច្ចសន្យា គឺត្រូវមានកំណត់ ថាមានមួយផ្នែក ត្រូវលើកទៅផលិតនៅឥណ្ឌា ដោយមានការសហការពីបុគ្គលិក និងអ្នកជំនាញឥណ្ឌា។
ផ្អែកតាមក្រសួងការពារជាតិអាមេរិក អនាគតសហប្រតិបត្តិការជាមួយឥណ្ឌា គឺនឹងផ្តោតជាពិសេស ទៅលើសហប្រតិបត្តិការស្រាវជ្រាវ និងផលិត នៅក្នុងវិស័យគ្រឿងសព្វាវុធវាយប្រហារលើអាកាស គ្រឿងសព្វាវុធចល័តលើដី សព្វាវុធបាតសមុទ្រ និងផ្នែកចារកិច្ចស៊ើបការណ៍ប្រមូលព័ត៌មាន។
យ៉ាងណាក៏ដោយ លោក Rahul Bedi អ្នកវិភាគម្នាក់នៅញូដេលី បានលើកឡើងថា នេះមិនមែនជាលើកទីមួយទេ ដែលរដ្ឋមន្ត្រីការពារជាតិអាមេរិក ប្រកាសសន្យាអញ្ចេញអញ្ចោះ ទាក់ទិននឹងផែនការសហប្រតិបត្តិការយោធាជាមួយឥណ្ឌា។ លោកសង្ឃឹមថា ការសន្យាលើកនេះ នឹងឈានក្លាយចេញជាកិច្ចព្រមព្រៀងជាក់ស្តែង មានកិច្ចសន្យាជាលាយលក្ខណ៍អក្សរ។
គួរកត់សំគាល់ថា ក្នុងបរិបទដែលចិនកំពុងតែវាតទីឥទ្ធិពល នៅក្នុងតំបន់ឥណ្ឌូប៉ាស៊ីហ្វិក គេសង្កេតឃើញថា ទាំងអាមេរិក ទាំងឥណ្ឌា គឺមានផលប្រយោជន៍ដូចគ្នា ដើម្បីឈានទៅចាប់ដៃគ្នាក្នុងវិស័យសហប្រតិបត្តិការសន្តិសុខនិងកងទ័ព។ ឆ្លើយទៅកាន់អ្នកកាសែត ក្រោយជួបជាមួយលោក Rajnath Singh រដ្ឋមន្ត្រីក្រសួងការពារជាតិឥណ្ឌា លោកឡយ អូស្ទីន បានលើកឡើងថា ការពង្រឹងសហប្រតិបត្តិការកងទ័ពរវាងឥណ្ឌា និងអាមេរិក គឺត្រូវផ្តួចផ្តើមឡើងក្នុងបរិបទមួយ ដែលចិនកំពុងតែ “គំរាមសំឡុត” នៅតំបន់ឥណ្ឌូប៉ាស៊ីហ្វិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ