បុរសជនជាតិអាមេរិកម្នាក់ បានឆ្លងព្រំដែនចូលដីកូរ៉េខាងជើង នៅតំបន់សពុះចែកកូរ៉េទាំង២
ផ្អែកតាមអង្គការសហប្រជាជាតិ កាលពីថ្ងៃអង្គារទី១៨កក្កដាម្សិលមិញ មានបុរសជនជាតិអាមេរិកម្នាក់ បានលួចឆ្លងព្រំដែន ចូលទៅខាងទឹកដីកូរ៉េខាងជើង ដោយគ្មានការអនុញ្ញាត ក្នុងពេលដែលបុរសរូបនេះ បានចូលទៅទស្សនាតំបន់ស ឬ “តំបន់គ្មានកងទ័ព” ដែលពុះចែកប្រទេសកូរ៉េទាំង២។ យោងតាមអង្គការសហប្រជាជាតិ ដែលគ្រប់គ្រងតំបន់នេះ គឺបុរសជនជាតិអាមេរិករូបនេះ ប្រហែលជាត្រូវបានអាជ្ញាធរ កូរ៉េខាងជើង ចាប់ដាក់ឃុំហើយ។
ចុះផ្សាយនៅថ្ងៃ៖
ស្តាប់ - ០២:៥១
បុរសជនជាតិអាមេរិកម្នាក់ បានឆ្លងព្រំដែនចូលទៅខាងទឹកដីកូរ៉េខាងជើង ដោយគ្មានការអនុញ្ញាត។ ហេតុការណ៍នេះ បានកើតឡើង នៅពេលបុរសរូបនេះ បានធ្វើដំណើរទៅទស្សនា ដែលគេអនុញ្ញាតរៀបចំធ្វើជាក្រុម នៅឯ “តំបន់សន្តិសុខរួម” ដែលស្ថិតនៅខាងក្នុងតំបន់ស ឬតំបន់គ្មានកងទ័ព ពុះចែកព្រំដែនរវាងកូរ៉េទាំង២។ តំបន់គ្មានកងទ័ពនេះ ស្ថិតនៅក្នុងការគ្រប់គ្រងរបស់អង្គការសហប្រជាជាតិ។
យ៉ាងណាមិញ អគ្គបញ្ជការដ្ឋានកងរក្សាសន្តិភាព នៃអង្គការសហប្រជាជាតិ ដែលប្រចាំនៅតំបន់នេះ បានអះអាងថា គឺបុរសដែលបានលួចឆ្លងព្រំដែននេះ ប្រាកដជាត្រូវបានសមត្ថកិច្ចកូរ៉េខាងជើងចាប់ឃាត់ខ្លួនហើយ។ ក្រុមការងារអង្គការសហប្រជាជាតិ កំពុងតែព្យាយាមទាក់ទងជាមួយ កងទ័ពកូរ៉េខាងជើង ដើម្បីបានដំណឹងលំអិត និងឈានទៅដោះស្រាយឧប្បត្តិហេតុនេះ។
យោងតាមបណ្តាញព័ត៌មានកូរ៉េខាងត្បូង គឺបុរសជនជាតិអាមេរិក ដែលបានឆ្លងព្រំដែននេះ គឺជាទាហានអាមេរិក។ ដោយឡែក ក្រសួងការពារជាតិកូរ៉េខាងត្បូង បានបដិសេធ មិនធ្វើអត្ថាធិប្បាយអ្វីទាំងអស់ គិតត្រឹមពេលនេះ។
សូមរំលឹកថា កាលពីឆ្នាំ២០១៩ លោក ដូណាល់ ត្រាំ បានទៅជួបមេដឹកនាំកូរ៉េខាងជើង គីម ជុងអ៊ុន នៅភូមិ Panmunjom ដែលស្ថិតនៅក្នុងតំបន់ស ហើយថែមទាំងបានឈានជើងចូលជាន់ទឹកដីខាងកូរ៉េខាងជើងថែមទៀតផង។ តែក្រោយផ្ទុះវិបត្តិកូវីដ១៩ កូរ៉េខាងជើងបានបិទព្រំដែនជាប់ជាប្រចាំ ព្រមទាំងបានកាត់បន្ថយកងឆ្មាំការពារច្រកព្រំដែន នៅតំបន់សន្តិសុខរួម។ យ៉ាងណាមិញ ផ្អែកតាមលោក Choi Gi-il សាស្ត្រាចារ្យនៅសកលវិទ្យាល័យ Sangji គឺជនជាតិអាមេរិករូបនេះទំនងជាបានឆ្លងចូលទៅខាងកូរ៉េខាងជើង ត្រង់ចំណុចភូមិ Panmunjom នេះឯង ព្រោះវាចំណុចតែមួយគត់ ដែលអាចឆ្លងកាត់បាន នៅក្នុងពេលទស្សនាតំបន់សន្តិសុខរួម។
សូមបញ្ជាក់ថា ជារៀងរាល់ថ្ងៃ មានអ្នកទេសចរជាច្រើនរយនាក់ ដែលត្រូវបានគេអនុញ្ញាតឲ្យចូលទៅទស្សនា នៅ “តំបន់សន្តិសុខរួម” ដែលស្ថិតក្នុងតំបន់ស គ្មានកងទ័ព។ ពីទីនោះ អ្នកទេសចរអាចឆ្លុះកែវយឹត សម្លឹងមើលទៅកាន់ទឹកដីកូរ៉េខាងជើង ដែលត្រូវរបបផ្តាច់ការព្យុងយ៉ាងបិទខ្ទប់យ៉ាងតឹងណែន។
គួរបញ្ជាក់ថា ប្រទេសកូរ៉េបងប្អូនទាំង២ បានយល់ព្រមទំលាក់អាវុធឈប់បាញ់នៅឆ្នាំ១៩៥៣មែន តែរហូតមកទល់ពេលនេះ នៅតែគ្មានសន្ធិសញ្ញាសន្តិភាពនឹងគ្នាទេ។ មានន័យថា ប្រទេសកូរ៉េបងប្អូនទាំង២ ស្ថិតនៅក្នុងស្ថានការណ៍សង្គ្រាមនឹងគ្នាជានិច្ច។ កាលពីឆ្នាំ ២០១៥ និស្សិតអាមេរិកម្នាក់ឈ្មោះ Otto Warmbier ត្រូវបានអាជ្ញាធរកូរ៉េខាងជើងចាប់ខ្លួន ក្នុងពេលចូលទៅទស្សនាបែបទេសចរណ៍ក្នុងទឹកដីកូរ៉េខាងជើង។ និស្សិតជនជាតិអាមេរិករូបនេះ ត្រូវបានដោះលែងមកវិញនៅឆ្នាំ២០១៧ ជាមួយនឹងស្ថានភាពជម្ងឺ បាត់បង់ស្មារតីដេកស្តូកស្តឹង ហើយបានស្លាប់ប៉ុន្មានថ្ងៃក្រោយមក ពេលត្រូវគេបញ្ជូនទៅដល់សហរដ្ឋអាមេរិកវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ