តៃវ៉ាន់ធ្វើសមយុទ្ធនៅអាកាសយានដ្ឋានដ៏ធំរបស់ខ្លួនដើម្បីបង្ការពីការវាយប្រហាររបស់ចិន
នៅថ្ងៃពុធ ទី២៦ កក្កដា តៃវ៉ាន់បានរៀបចំសមយុទ្ធនៅអាកាសយានដ្ឋានដ៏ធំឈ្មោះតាវយ័ន។ សមយុទ្ធនេះជាការហាត់សមដើម្បីត្រៀមបង្ការនៅក្នុងករណីដែលមានការវាយប្រហារពីចិនដីគោក។ នេះជាទី១ ដែលរដ្ឋអំណាចតៃវ៉ាន់បានរៀបចំសមយុទ្ធរបៀបនេះឡើងនៅអាកាសយានដ្ឋានដ៏ធំរបស់ខ្លួនដែលស្ថិតក្បែរទីក្រុងតៃប៉ិក។ អ្វីជាការកត់សម្គាល់ សមយុទ្ធនេះបានធ្វើឡើងនៅក្នុងបរិបទដែលតៃវ៉ានបានទទួលគំនាបផ្លូវយោធា និងនយោបាយកាន់តែខ្លាំងពីចិនដីគោក។
ចុះផ្សាយនៅថ្ងៃ៖
ស្តាប់ - ០២:១៤
សមយុទ្ធរៀបចំនៅអាកាសយានដ្ឋានតាវយ័នធ្វើឡើងនៅក្នុងក្របខណ្ឌនៃសមយុទ្ធប្រចាំឆ្នាំដែលតៃវ៉ាន់រៀបចំរយៈពេលមួយសប្តាហ៍។ តែអ្វីដែលថ្មីនៅក្នុងសមយុទ្ធឆ្នាំ ២០២៣ នេះ គឺការដាក់បញ្ចូលហេដ្ឋារចនាសម្ព័ន្ធស៊ីវិលយុទ្ធសាស្រ្ត ដូចយ៉ាងអាកាសយានដ្ឋានស៊ីវិលទៅក្នុងវិធានការការពារពីការវាយប្រហាររបស់ចិនដីគោក។ អ៊ីចឹងហើយបានជានៅក្នុងសមយុទ្ធរយៈពេលប្រមាណជា ៣០នាទីនៅអាកាសយានដ្ឋានតាវយ័ន គេឃើញមានការចូលរួមពីកម្លាំងប៉ូលិសនៅអាកាសយានដ្ឋាន ក្រុមអ្នកពន្លត់អគ្គីភ័យ កម្លាំងស៊ីវិល និងកម្លាំងទ័ព។ មានសម្លៀកបំពាក់កងទ័ព ប្រមុខដឹកនាំតៃវ៉ាន់លោកស្រីសៃ អ៊ីងវេនដែលមានវត្តមាននៅក្នុងសមយុទ្ធបានថ្លែងថា ការចូលរួមពីគ្រប់មជ្ឈដ្ឋានជារឿងចាំបាច់ដើម្បីការពារអធិបតេយ្យភាព និងបូរណៈភាពទឹកដីតៃវ៉ាន់។
អ្នកជំនាញយោធាលោក Alexander Huang បានបញ្ជាក់ថា សមយុទ្ធដែលរដ្ឋអំណាចតៃវ៉ាន់បានរៀបចំនៅអាកាសយានដ្ឋាននេះជាសមយុទ្ធដើម្បីបង្ការការចូលឈ្លានពានរបស់ចិនដូចដែលរុស្ស៊ីបានចូលឈ្លានពានអ៊ុយក្រែន។ តាមលោក Alexander Huang បើសត្រូវអាចវាយចូលកាន់កាប់អាកាសយានដ្ឋានបាន សត្រូវអាចបញ្ជូនទ័ពយ៉ាងច្រើនសម្បើមតាមផ្លូវអាកាសសម្រាប់បើកប្រតិបត្តិការឈ្លានពានរបស់ខ្លួន។ អ្នកជំនាញយោធារូបនេះដដែលបានបន្ថែមថា ការធ្វើសមយុទ្ធនៅអាកាសយានដ្ឋានដូចដែលតៃវ៉ាន់បានធ្វើពេលនេះជារឿងល្អ។
គួរបញ្ជាក់ថា តៃវ៉ាន់តែងរៀបចំសមយុទ្ធញឹកញាប់ និងគ្រប់រូបភាពទាំងអស់ដើម្បីបង្ការនឹងការវាយប្រហារជាយថាហេតុពីសំណាក់ចិនដីគោក។ តាំងពីលោកស្រីសៃ អ៊ីងវេនឡើងកាន់តំណែងប្រមុខដឹកនាំតៃវ៉ាន់ក្នុងឆ្នាំ ២០១៦ មក តៃវ៉ាន់បានទទួលគំនាបយោធា និងនយោបាយកាន់តែខ្លាំងពីចិនដីគោក។ ចិនដីគោកដែលបានអះអាងច្រើនដងតាំងពីដើមមកថា តៃវ៉ាន់ជាខេត្តឧទ្ទាមរបស់ខ្លួន និងដែលខ្លួនមិនញញើតប្រើទ័ពដើម្បីវាយប្រហារយកទេ បើកោះមួយនេះហ៊ានប្រកាសឯករាជ្យនៅថ្ងៃណាមួយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ