អនុប្រធានាធិបតីតៃវ៉ាន់នឹងឆៀងចូលអាមេរិក មិនខ្វល់នឹងការប្រឆាំងចិន
ចិនប្រឆាំងដាច់ខាតមិនឱ្យតៃវ៉ាន់មានការទាក់ទង់ជាផ្លូវការណាមួយជាបរទេសទេ។ ប៉ុន្តែលោក វីលីយ៉ាំ ឡៃ អនុប្រធានាធិបតីតៃវ៉ាន់ កំពុងធ្វើដំណើរឆ្ពោះទៅកាន់សហរដ្ឋអាមេរិកនៅថ្ងៃសៅរ៍នេះ។ ជាផ្លូវការលោក ឡៃ គ្រាន់តែចុះសំចតនៅទីក្រុងញូវយ៉កមួយភ្លែត មុននឹងបន្តទៅប្រទេសប៉ារ៉ាហ្គាយប៉ុណ្ណោះ។ ប៉ារ៉ាហ្គាយជាប្រទេសតែមួយគត់នៅលើទ្វីបអាមេរិកឡាទីនដែលទទួលស្គាល់តៃវ៉ាន់ជាផ្លូវការ។
ចុះផ្សាយនៅថ្ងៃ៖
ស្តាប់ - ០២:២៤
សហរដ្ឋអាមេរិកមិនមែនជាទិសដៅដំណើរទស្សនកិច្ចជាផ្លូវការ របស់លោក ឡៃ អនុប្រធានាធិបតីតៃវ៉ាន់ នាថ្ងៃសៅរ៍នេះទេ។ ប៉ុន្តែ មុននឹងដំណើរទៅដល់ប្រទេសប៉ារ៉ាហ្កាយដើម្បីចូលរួមក្នុងកម្មវិធីចូលកាន់តំណែងរបស់ប្រធានាធិបតីប៉ារ៉ាហ្កាយថ្មីលោក សង់ត្យាហ្កោ ប៉េញ៉ា លោកអនុប្រធានាធិបតីតៃវ់ាន់ឆ្លៀតឆៀងចូលទឹកដីអាមេរិក ដើម្បីជួបឥស្សរជនអាមេរិកមួយចំនួន។
នៅក្នុងសារបង្ហោះតាមប្រព័ន្ធx (ឈ្មោះថ្មីរបស់បណ្តាញទ្វីតទ័រ) លោកឡៃ បានអះអាងត្រៀមជួបជាមួយមិត្តអាមេរិក។ ជាចម្លើយតបនឹងលោកឡៃតាមបណ្តាញដដែលនេះ ប្រធានវិទ្យាស្ថានអាមេរិកនៅតៃវ៉ាន់ ដែលដោយជាក់ស្តែងមានការងារជាស្ថានទូតអាមេរិកសម្រាប់តៃវ៉ាន់ និងមានទីតាំងនៅVirginie លោកស្រី ឡូរ៉ា រ៉ូសិនប៊ែរហ្គឺរ បានឡើយតបថា វិទ្យាស្ថានអាមេរិករង់ចាំទទួលស្វាគមន៍លោកអនុប្រធានាធិបតីក្នុងពេលធ្វើដំណើរសំចតដើម្បីទៅប៉ារ៉ាហ្គាយ។
ពោលគឺដូចដំណើរទស្សនកិច្ចរបស់លោកស្រី ប្រធានាធិបតីកាលពីខែមេសាដែរ ដែលក្នុងពេលសំចតលើទឹកដីអាមេរិក លោកស្រីសៃអ៊ីនវេនបានឆ្លៀតជួបសន្ទនាជាមួយប្រធានសភាអាមេរិកលោក ខេវីន ម៉ាកកាទី ជាហេតុធ្វើឱ្យចិនក្តៅក្រហាយយ៉ាងខ្លាំង។
ចិនបានថ្កោលទោសតាំងពីថ្ងៃទី៣សីហា ដំណើរសំចតរបស់លោកអនុប្រធានាធិបតីតៃវ៉ាន់នៅអាមេរិក ដោយអំពាវនាវឱ្យមេដឹកនាំអាមេរិកបញ្ឈប់ការផ្តោះប្តូរទំនាក់ទំនងផ្លូវការជាមួយតៃវ៉ាន់ ដោយគោរពគោលការណ៍ចិនតែមួយ។ ឈរលើគោលការណ៍នេះ តៃវ៉ាន់ជាផ្នែកមួយនៃទឹកដីចិនដែលប៉េកាំងអាចនឹងចាប់ក្រសោបយកមកវិញដោយកម្លាំងបើចាំបាច់។ ជាមួយនឹងពាក្យបរិហារ ចិនបានបង្កើនវត្តមានយោធានៅជុំវិញដែនទឹក និងដែនអាកាសតៃវ៉ាន់ យ៉ាងច្រើនសន្ធឹកសន្ធាប់លើសធម្មតាខ្លាំងណាស់ នៅសប្តាហ៍នេះ។ ក្រសួងការពារជាតិតៃវ៉ាន់ សម្គាល់ឃើញមានយន្តហោះ៣៣គ្រឿងនិងនាវាសង្គ្រាម៦គ្រឿងរបស់ចិន នៅជុំវិញកោះតៃវ៉ាន់ តាំងពីថ្ងៃពុធរហូតដល់ថ្ងៃសុក្រម្សិលមិញ។
សម្រាប់អ្នកនាំពាក្យក្រសួងការបរទេសតៃវ៉ាន់ ដំណើរសំចតរបស់លោកឡៃលើទឹកអាមេរិកគ្មានពិសេសសោះ លោកធ្លាប់ធ្វើដូច្នេះ១១ដងមកហើយ។ នៅលើកនេះ លោក ឡៃ ត្រូវចុះសំចតនៅក្រុងញូវយ៉កពេលទៅ និងសំចតនៅសាន់ហ្វាន់ស៊ីស្កូពេលត្រលប់មកពីបំពេញទស្សនកិច្ចនៅប៉ារ៉ាហ្គាយវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ