អាមេរិកអះអាងថា គីម ជុងអ៊ុន ចង់ទៅជួបពូទីន ដើម្បីនិយាយពីរឿងលក់អាវុធ
មេដឹកនាំរបបផ្តាច់ការកូរ៉េខាងជើង គីម ជុងអ៊ុន មានបំណងចង់ទៅរុស្ស៊ី ដើម្បីជួបជាមួយលោកពូទីន និយាយពីរឿងអាវុធ ដែលកូរ៉េខាងជើង ចង់លក់ទៅឲ្យរុស្ស៊ី។ នេះបើផ្អែកតាមការអះអាង នៅថ្ងៃចន្ទទី៥កញ្ញា ពីសំណាក់សេតវិមាន។
ចុះផ្សាយនៅថ្ងៃ៖
ស្តាប់ - ០២:៥២
លោកស្រី Adrienne Watson អ្នកនាំពាក្យម្នាក់នៃក្រុមប្រឹក្សាសន្តិសុខជាតិ នៅសេតវិមានអាមេរិក បានអះអាងថា ការចរចាទិញលក់គ្រឿងសព្វាវុធ រវាងរុស្ស៊ី និងកូរ៉េខាងជើង បាននិងកំពុងប្រព្រឹត្តិធ្វើទៅយ៉ាងសកម្ម។ ផ្អែកតាមអ្នកនាំពាក្យរូបនេះ គេដឹងច្បាស់ថា មេដឹកនាំផ្តាច់ការ គីម ជុងអ៊ុន មានបំណងចង់ឲ្យការចរចានេះ បន្តទៅមុខ ដោយមានជាអាទិ៍ ការពិភាក្សាការទូត ជាន់ខ្ពស់បំផុត រវាងព្យុងយ៉ាង និងម៉ូស្គូ។
គួរបញ្ជាក់ថា កាលពីថ្ងៃពុធសប្តាហ៍កន្លងទៅ លោក John Kirby អ្នកនាំពាក្យម្នាក់ទៀត នៃក្រុមប្រឹក្សាសន្តិសុខជាតិអាមេរិក បានបញ្ជាក់ អំពីដំណើរឈានទៅមុខកាន់តែខ្លាំង ស្តីអំពីការចរចាលក់អាវុធ ដែលកូរ៉េខាងជើង និងបញ្ជូនទៅឲ្យរុស្ស៊ី។ ដំណើរការគ្រោះថ្នាក់ ដែលរដ្ឋាភិបាលអាមេរិក បានអំពាវនាវ ឲ្យរបបផ្តាច់ការព្យុងយ៉ាង ត្រូវតែបញ្ឈប់ជាបន្ទាន់។
ផ្អែកតាមលោក John Kirby បើការចរចាបានសម្រេច កូរ៉េខាងជើងអាចនឹងលក់គ្រឿងសព្វាវុធក្នុងទំហំដ៏ធំ ទៅឲ្យរុស្ស៊ី ដែលមានជាអាទិ៍ គ្រាប់កាំភ្លើងធំ គ្រាប់កាំភ្លើងត្បាល់ ព្រមទាំងវត្ថុធាតុដើមចាំបាច់ផ្សេងទៀត ដែលប្រើប្រាស់ក្នុងវិស័យកងទ័ព។ លោកស្រី Linda Thomas-Greenfield អគ្គរដ្ឋទូតអាមេរិកប្រចាំអង្គការសហប្រជាជាតិ បានបន្ថែមថា គ្រឿងសព្វាវុធទាំងអស់នេះ គឺរុស្ស៊ី នឹងយកទៅធ្វើសង្គ្រាមនៅអ៊ុយក្រែន។
យោងតាមការចុះផ្សាយរបស់កាសែត New York Times មេដឹកនាំកូរ៉េខាងជើង គីម ជុងអ៊ុន អាចនឹងធ្វើដំណើរតាមរថភ្លើង ទៅទីក្រុងវ្លាឌីវ៉ូស្តុក ដែលស្ថិតនៅភាគខាងកើតបង្អស់ នៃទឹកដីរុស្ស៊ី ដើម្បីជួបលោកពូទីន ក្នុងរវាងខែកញ្ញានេះ។ ប្រភពដដែលនេះ លើកឡើងថា លោកពូទីនចង់ទិញពីកូរ៉េខាងជើង នូវគ្រាប់កាំភ្លើងធំ និងមីស៊ីលបាញ់កម្ទេចរថក្រោះ។ មន្ត្រីជាន់ខ្ពស់កូរ៉េខាងត្បូងម្នាក់ ធ្វើការនៅក្រសួងបង្រួបបង្រួមកូរ៉េ បានអះអាងប្រាប់ទីភ្នាក់ងារព័ត៌មានបារាំង AFP ថាពិតជាមានការចរចាលក់អាវុធ រវាងកូរ៉េខាងជើងនិងរុស្ស៊ី មែន។ ជាថ្នូរវិញ កូរ៉េខាងជើង ចង់បានការជួយពីរុស្ស៊ី នៅក្នុងវិស័យបច្ចេកវិទ្យាទំនើប ប្រើលើផ្កាយរណប និងនាវាមុជទឹកបាតសមុទ្រ ព្រមទាំងជំនួយស្បៀងអាហារផងដែរ។
គួររំលឹកថា កាលពីចុងខែកក្កដា រដ្ឋមន្ត្រីការពារជាតិរុស្ស៊ី លោក ស៊ែរហ្កី ឆយហ្គូ បានទៅមើលការដង្ហែរក្បួនព្យុហយាត្រាកងទ័ព ជាមួយលោកគីម ជុងអ៊ុន នៅព្យុងយ៉ាង ដែលតាមការអះអាងរបស់វ៉ាស៊ីនតោន ក្នុងឱកាសនោះ លោក ស៊ែរហ្កី ឆយហ្គូ ទំនងជាបានបញ្ចុះបញ្ចូលឲ្យកូរ៉េខាងជើងលក់គ្រាប់កាំភ្លើងធំឲ្យ។ ហើយក្រោយដំណើររបស់លោកស៊ែរហ្កី ឆយហ្គូ គណប្រតិភូរុស្ស៊ីមួយក្រុមទៀត បានទៅកូរ៉េខាងជើងដើម្បីបន្តចរចាទិញអាវុធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ