ចិននិងរុស្ស៊ីសាទរទំនាក់ទំនងដែលកាន់តែល្អឡើងជាងពេលណាៗទាំងអស់
នៅប្រទេសចិន ថ្ងៃពុធ ទី២០ ខែធ្នូ នាយករដ្ឋមន្ត្រីរុស្ស៊ី លោក មីកាអ៊ីល មីឈូស្ទីន បានសាទរទំនាក់ទំនងការទូតដ៏ល្អរបស់ប្រទេសទាំងពីរ និងបានគូសរំលេចឲ្យឃើញថា ទំនាក់ទំនងរវាងរដ្ឋបាលក្រុងម៉ូស្គូ និង ប៉េកាំង កាន់តែល្អឡើងជាងពេលណាៗទាំងអស់។ ថ្នាក់ដឹកនាំរុស្ស៊ីថ្លែងប្រសាសន៍បែបនេះ គឺធ្វើឡើងនៅក្នុងឱកាសដំណើរទស្សនកិច្ចផ្លូវរដ្ឋ រយៈពេល ២ ថ្ងៃ នៅរដ្ឋធានីប៉េកាំង ហើយនិងត្រូវប្រព័ន្ធឃោសនារដ្ឋរស្ស៊ីនិងចិន យកខ្លឹមសារទៅផ្សាយយ៉ាងព្រោងព្រាត។
ចុះផ្សាយនៅថ្ងៃ៖
ស្តាប់ - ០២:៤៧
បើតាមប្រភពពីទូរទស្សន៍រដ្ឋចិន CCTV ដែលស្រង់ប្រសាសន៍ថ្នាក់ដឹកនាំចិន គឺ ថ្នាក់ដឹកនាំជាតិទាំងពីរ បានប្រឹងប្រែងដើរនយោបាយកម្រិតខ្ពស់ ដែលជះឥទ្ធិពលយ៉ាងវិជ្ជមាន ហើយប្រទេសរុស្ស៊ីនិងចិននឹងបន្តសហការគ្នាឲ្យកាន់តែស៊ីជម្រៅថែមទៀត នៅលើវិស័យជាច្រើន រាប់ចាប់តាំងពីនយោបាយ សេដ្ឋកិច្ច ពាណិជ្ជកម្ម ថាមពល ការតភ្ជាប់គមនាគមន៍ ហើយនិងវិស័យសំខាន់ៗជាច្រើនផ្សេងទៀត។
នៅចំពោះសមភាគីរុស្ស៊ី នាយករដ្ឋមន្ត្រីចិន លី ឈាំង បានថ្លែងថា នៅក្រោមការដឹកនាំរដ្ឋរបស់ប្រធានាធិបតីចិន ស៊ី ជីនពីង និងប្រធានាធិបតីរុស្ស៊ី វ្ល៉ាឌីមៀរ ពូទីន គឺទំនាក់ទំនងទ្វេភាគីនឹងបន្តរក្សាកម្រិតខ្ពស់គ្រប់ជ្រុងជ្រោយ ហើយប្រទេសជាតិទាំងពីរ នឹងនៅតែរឹតចំណងទាក់ទងជាមិត្តភាពនេះឲ្យកាន់តែយូរអង្វែងរៀងរហូតទៅ ដើម្បីរក្សាឲ្យបានស្ថិរភាពនៅក្នុងពិភពលោក។
រឹងរឹតតែច្បាស់ ! តាមរយៈកញ្ចក់ទូរទស្សន៍ប្រព័ន្ធឃោសនាចិន CCTV លោកប្រធានាធិបតី ស៊ី ជីនពីង បានគូសបញ្ជាក់បន្ថែមថា ការរក្សាទំនាក់ទំនងល្អ និង ការរឹតបន្តឹងចំណងទូតឲ្យប្រសើរ រវាងប៉េកាំងនិងម៉ូស្គូ គឺជា «ជម្រើសយុទ្ធសាស្ត្រ» របស់រដ្ឋទាំងទ្វេ ដោយផ្អែកលើផលប្រយោជន៍រួមនៃ ប្រជាជាតិទាំងពីរ។
អ្នកវិភាគស្ថានការណ៍ជាទូទៅ កត់សម្គាល់ឃើញថា ទំនាក់ទំនងរុស្ស៊ី-ចិន កាន់តែស្អិតល្មួតឡើង និងរឹងមាំខ្លាំងជាងពេលណាៗ គឺបន្ទាប់ពី រុស្ស៊ី បញ្ឆេះភ្លើងសង្គ្រាមឈ្លានពានអ៊ុយក្រែន នៅដើមខែកុម្ភៈឆ្នាំ២០២២។ ចន្លោះពេលនេះ បើទោះបីជា បណ្តាប្រទេសបច្ចិមលោក បានថ្កោលទោស និងដាក់ទណ្ឌកម្មសព្វបែបយ៉ាងទៅលើ រុស្ស៊ី យ៉ាងណាក្តី ក៏មហាយក្សចិន នៅតែប្រកាន់ជំហរអព្យាក្រឹត និងមិនដែលពោលរិះគន់ថ្កោលទោសចំពោះ រុស្ស៊ី ម្តងណាឡើង ជុំវិញបញ្ហាសង្គ្រាមនៅអ៊ុយក្រែន។
គួររំឭកដែរ ទស្សនកិច្ចរបស់នាយករដ្ឋមន្ត្រីរុស្ស៊ីទៅស្រុកចិននាពេលនេះ គឺបន្ទាប់ពី លោកប្រធានាធិបតីរុស្ស៊ី វ្ល៉ាឌីមៀរ ពូទីន បានអញ្ជើញទៅក្រុងប៉េកាំង កាលពី ២ ខែមុន ហើយនិងក្រោយពី ឧត្តមសេនីយ៍កំពូលផុតលេខរបស់ចិន បានធ្វើដំណើរទៅក្រុងម៉ូស្គូ នៅខែវិច្ឆិកា ថ្មីៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ