លោកពូទីនប្រកាសពង្រឹងកម្លាំងទ័ពនៅព្រំដែនជាប់ហ្វាំងឡាំង
វិបត្តិភូមិសាស្រ្តនយោបាយបានចាប់ឡើងកំដៅ នៅព្រំដែនរុស្ស៊ី និងហ្វាំងឡង់ បន្ទាប់ពីប្រធានាធិបតីរុស្ស៊ី លោកពូទីនប្រកាសពង្រឹងកម្លាំងទ័ពរុស្ស៊ី នៅតំបន់ជាប់ព្រំដែនជាមួយប្រទេសហ្វាំងឡង់។ នៅក្នុងបទសម្ភាសន៍ជាមួយទូរទស្សន៍ជាតិរុស្ស៊ី នៅថ្ងៃអាទិត្យនេះ ប្រមុខដឹកនាំរុស្ស៊ីចោទប្រកាន់បស្ចិមលោកថា បានអូសទាញហ្វាំងឡង់ឲ្យចូលក្នុងសម្ព័ន្ធយោធា អូតង់។ សង្រ្គាមរុស្ស៊ីឈ្លានពានអ៊ុយក្រែនបានដាស់សតិហ្វាំងឡាំង ប្រទេសជិតខាងរបស់រុស្ស៊ី ឲ្យភ័យខ្លាច និងសុំចុះចូលជាសមាជិករបស់អូតង់ កាលពីខែ មេសា ឆ្នាំ ២០២៣។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០២
ប្រធានាធិបតីរុស្ស៊ី លោកវ្លាឌីមៀរ ពូទីនបានព្រមានពីការកើតមានបញ្ហាជាមួយប្រទេសហ្វាំងឡង់ បន្ទាប់ពីប្រទេសជិតខាងរបស់រុស្ស៊ីមួយនេះ បានចូលជាសមាជិកពេញសិទ្ធិរបស់សម្ព័ន្ធអាត្លង់ទិកអូតង់កាលពីថ្ងៃមេសា កន្លងទៅ។ នៅក្នុងបទសម្ភាសន៍ជាមួយទូរទស្សន៍ជាតិ រុស្ស៊ី ដែលចេញផ្សាយ នៅថ្ងៃអាទិត្យ លោកពូទីនចោទប្រកាន់ក្រុមប្រទេសលោកខាងលិចថា ជាអ្នកអូសទាញហ្វាំងឡង់ឲ្យចូលជាសមាជិករបស់ខ្លួន។
សម្រាប់មេដឹកនាំរុស្ស៊ី គេបានបង្កើតបញ្ហានៅកន្លែងដែលមិនធ្លាប់មានបញ្ហា កាលពីមុន ព្រោះថា រុស្ស៊ីនឹងបង្កើតយោធាថ្នាក់តំបន់ នៅឡេនីនក្រាត ដែលនឹងប្រមូលផ្តុំ ទៅដោយអង្គភាពយោធាជាច្រើន។ ឡេនីនក្រាត ឬសាំងពីទែរស្បួរ ជាទីក្រុងធំទី២របស់រុស្ស៊ី ដែលស្ថិតនៅភាគពាយ័ព្យ មិនឆ្ងាយប៉ុន្មានពីព្រំដែនជាមួយហ្វាំងឡង់។
មានព្រំដែនរួមគ្នាប្រមាណ ១៣៤០គីឡូម៉ែត្រ រុស្ស៊ី និងហ្វាំងឡង់មានទំនាក់ទំនងល្អក់កករ ចាប់តាំងពីរុស្ស៊ីធ្វើសង្រ្គាមឈ្លានពាន អ៊ុយក្រែន ប្រទេសជិតខាងរបស់រុស្ស៊ី កាលពី ខែ កុម្ភៈ ឆ្នាំមុន។ សង្រ្គាមឈ្លានពានរបស់រុស្ស៊ីបានដាស់សតិហ្វាំងឡង់ឲ្យភ្លឺភ្នែក និងប្រញាប់រួសរាន់សុំចូលជាសមាជិករបស់បក្សសម្ព័ន្ធអូតង់។ ក្លាយជាសមាជិករបស់អូតង់ ហ្វាំងឡង់នឹងទទួលបានការការពារ ដោយមាត្រា៥នៃសន្ធិសញ្ញា ពោលគឺក្នុងករណីមានការវាយប្រហារមកលើហ្វាំងឡង់ គឺសមាជិកអូតង់នឹងរួមកម្លាំងគ្នាជួយប្រយុទ្ធ ការពារហ្វាំងឡង់។
ម្យ៉ាង សំដីគំរាមរបស់ប្រធានាធិបតីរុស្ស៊ី នៅថ្ងៃអាទិត្យ កើតឡើង នៅ២ថ្ងៃក្រោយពី ហ្វាំងឡង់សម្រេចបិទព្រំដែនទាំងស្រុងជាមួយរុស្ស៊ី រហូតដល់ថ្ងៃទី១៤មករាឆ្នាំ២០២៤។ នៅថ្ងៃសុក្រ ហ្វាំងឡង់សម្រេចបិទច្រកព្រំដែនទាំងស្រុងជាមួយ រុស្ស៊ី នៅក្នុងបទចោទប្រកាន់ រុស្ស៊ីថា មានចេតនាបញ្ជូន រុញច្រានជនអន្តោប្រវេសន៍ ទៅក្នុងទឹកដីហ្វាំងឡង់។
សម្រាប់ហ៊ែលសាំងគី ម៉ូស្គូកំពុងវាយប្រហារហ្វាំងឡង់ តាមរយៈការយកជនអន្តោប្រវេសន៍ ធ្វើជាឈ្នាន់ នៅក្នុងគោលដៅធ្វើឲ្យហ្វាំងឡង់ជួបអស្ថិរភាព។ ក្រេមឡាំងបានបដិសេធការចោទប្រកាន់របស់ហ្វាំងឡង់។
គួរបញ្ជាក់ថា នៅក្រោយហ្វាំងឡង់ចូលជាសមាជិករបស់អូតង់ ម៉ូស្គូធ្លាប់បានសន្យាចាត់វិធានការតបវិញ។ នៅដើមខែធ្នូនេះ ប្រធានាធិបតីអាមេរិក លោកចូ បៃដិនធ្លាប់លើកឡើងថា រុស្ស៊ីអាចវាយប្រហារប្រទេសមួយដែលជាសមាជិករបស់អូតង់។ មួយទៀត បើតាមមេដឹកនាំអាមេរិក ការឈប់ផ្គត់ផ្គង់អាវុធទៅឲ្យអ៊ុយក្រែន មានន័យស្មើការផ្តល់អំណោយដល់ប្រធានាធិបតីរុស្ស៊ី ព្រោះថា លោកពូទីននឹងមិនបញ្ឈប់សង្រ្គាមឈ្លានពាននៅត្រឹមអ៊ុយក្រែននោះទេ។ ប៉ុន្តែ សម្រាប់លោកពូទីន ការលើកឡើងរបស់អាមេរិកជាការចោទប្រកាន់ដែលគេធ្វើឡើងដើម្បីការពារនយោបាយប្រឆាំងរុស្ស៊ីតែប៉ុណ្ណោះ ព្រោះលោកផ្ទាល់មើលមិនឃើញថា នឹងទទួលបានផលប្រយោជន៍សេដ្ឋកិច្ច ភូមិសាស្រ្តនយោបាយ និងយោធា ពីការធ្វើសង្រ្គាមជាមួយក្រុមប្រទេសអូតង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ