តុលាការវៀតណាម កាត់ទោសអតីតរដ្ឋមន្ត្រីសុខាភិបាល ឲ្យជាប់ពន្ធនាគារ ១៨ឆ្នាំ
១៨ ឆ្នាំក្រោយចម្រឹងដែក ជាស្ថានទម្ងន់ទោសជាប់ពន្ធនាគារចំពោះអតីតរដ្ឋមន្ត្រីក្រសួងសុខាភិបាល លោក ង្វៀន ថាញ់ឡុង។ លោកធ្លាប់ធ្វើជារដ្ឋមន្ត្រី ចំនួន ២ ឆ្នាំ ចន្លោះឆ្នាំ២០២០ ដល់ឆ្នាំ២០២២ ហើយត្រូវផ្តន្ទាទោសពាក់ព័ន្ធនឹងបទល្មើសពុករលួយស៊ីសំណូកសូកប៉ាន់។ អតីតមន្ត្រីសំខាន់ៗទទួលបន្ទុកសុខាភិបាល និងអ្នកជំនួញ សរុប ៣៨ នាក់ ក៏ត្រូវជាប់ពន្ធនាគារ តិចឬច្រើនឆ្នាំតាមកម្រិតទោសល្មើសរបស់ពួកគេនីមួយៗ។ នេះបើតាមសេចក្តីសម្រេចរបស់តុលាការក្រុងហាណូយ នៅថ្ងៃសុក្រ ទី១២ មករា។
ចុះផ្សាយនៅថ្ងៃ៖
ស្តាប់ - ០២:៥៩
សាលក្រមជម្រះក្តីឧក្រិដ្ឋនេះ គឺឋិតក្នុងសំណុំរឿងអាស្រូវពុករលួយរបស់ក្រុមហ៊ុន Viet A។ ក្នុងរដូវកាលផ្ទុះជំងឺរាតត្បាតសកលកូវីដ១៩ ក្រុមហ៊ុន Viet A បានចុះកិច្ចសន្យាជាមួយមន្ត្រីសុខាភិបាលវៀតណាម ក្នុងទំហំទឹកប្រាក់រាប់រយលានដុល្លារ ដើម្បីធានាផលិត ផ្គត់ផ្គង់ និង លក់ ប្រដាប់ធ្វើតេស្តមើលកូវីដ១៩។ កិច្ចសន្យានេះ បានផ្តល់ផលចំណេញ ១៧២ លានដុល្លារ ដល់ក្រុមហ៊ុន ហើយក្នុងនោះ លុយ ៣៤ លានដុល្លារ សម្រាប់សូកពួកមន្ត្រីពុករលួយ។
ក្នុងសំណុំរឿងអាស្រូវនេះ អតីតរដ្ឋមន្ត្រីក្រសួងសុខាភិបាល លោក ង្វៀន ថាញ់ឡុង គឺត្រូវចោទប្រកាន់ថាបានទទួលសំណូក ទឹកប្រាក់ ២ ២៥០ ០០០ ដុល្លារ។ ពេលអង្គសវនាការ ចៅក្រមសម្រេចលោកឲ្យថ្លែងសារជាចុងក្រោយ គឺ អតីតរដ្ឋមន្ត្រី បានថ្លែងក្តីសោកស្តាយ និងឈឺចាប់ចំពោះអ្វីដែលខ្លួនបានប្រព្រឹត្ត។ ក៏ប៉ុន្តែ មេធាវីរបស់រូបលោក បានបន្តការពារថា លោក ថាញ់ឡុង ពុំបានទទួលសំណូកឡើយ ហើយគាត់ក៏ពុំបានបង្គាប់គេឲ្យ«ថ្លៃទឹកតែ»មករូបលោកដែរ។ ប្រាក់ដែលលោកធ្លាប់បានទទួលនោះ គឺគ្រាន់តែជា«អំណោយទឹកចិត្តដើម្បីជាការដឹងគុណ»តែប៉ុណ្ណោះ។
តុលាការក្រុងហាណូយ ត្រូវប្រើពេលបើកសវនាការ ចំនួន ១៨ ថ្ងៃ ដើម្បីជម្រះសំណុំរឿងនេះ។ រឿងនេះ ក៏ពាក់ព័ន្ធនឹងអភិបាលរដ្ឋធានីហាណូយ លោក ជូ ង៉ុកអាញ់។ លោក ង៉ុកអាញ់ ក៏ត្រូវកាត់ទោសឲ្យជាប់ ៣ ឆ្នាំ ក្រោយចម្រឹងដែក ហើយមន្ត្រីផ្សេងទៀត ជាប់ទោសពន្ធនាគារ ចន្លោះពី ២ ទៅ ៥ឆ្នាំ។
ចំណែក អគ្គនាយកក្រុមហ៊ុន ផាន់ ង៉ុក វៀត ត្រូវកាត់ទោសឲ្យជាប់ទោស ២៩ ឆ្នាំ ពីបទពុករលួយ និងបំពានច្បាប់ដេញថ្លៃលទ្ធកម្ម។ នេះគឺទម្ងន់ទោសបន្ថែម បន្ទាប់ពី តុលាការយោធា បានកាត់ទោសដាក់គុក ២៥ឆ្នាំ កាលពីខែធ្នូ កន្លងទៅ។
នៅវៀតណាម យុទ្ធនាការប្រឆាំងបំបាត់អំពើពុករលួយ គឺក្រោមការដឹកនាំផ្ទាល់របស់ប្រធានាធិបតី ង្វៀន ភូចុង។ ពីពេលថ្មីៗនេះ លោកបានសន្យាបន្តកម្ទេចអំពើពុករលួយឲ្យបានឆាប់ និងឲ្យមានប្រសិទ្ធភាព។ ចាប់ពីឆ្នាំ២០២១មក មនុស្ស ៣ ៥០០នាក់ ត្រូវជាប់បទចោទប្រកាន់។ ក្នុងនោះ ១ ៣០០ ពាក់ព័ន្ធនឹងអំពើពុករលួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ