អ្នកវិទ្យាសាស្រ្តរកឃើញបាក់តេរី ដែលជួយការពារមូសមិនឲ្យផ្ទុកមេរោគគ្រុនចាញ់
ចុះផ្សាយនៅថ្ងៃ៖
ស្តាប់ - ០៣:៤៨
អ្នកវិទ្យាសាស្រ្តទើបរកឃើញគន្លឹះសំខាន់ថ្មីមួយ ដើម្បីប្រយុទ្ធប្រឆាំងជំងឺគ្រុនចាញ់។ តាមការសិក្សា របស់អ្នកស្រាវជ្រាវ អង់គ្លេស និងកេនយ៉ា គេបានរកឃើញថា មានបាក់តេរីម្យ៉ាង ដែលបានជួយឲ្យសត្វមូស មិនអាចទទួលផ្ទុកមេរោគគ្រុនចាញ់។ នេះជាការរកឃើញដ៏សំខាន់មួយសម្រាប់បង្កើតលទ្ធភាពប្រយុទ្ធប្រឆាំងនចាញ់ ដែលសម្លាប់មនុស្សប្រមាណ៤សែននាក់ ក្នុងមួយឆ្នាំ។ តើបាក់តេរីតែម្យ៉ាងនឹងអាចជួយទៅទប់ស្កាត់ មិនឲ្យមានការចម្លងមេរោគគ្រុនចាញ់បានយ៉ាងម៉េច?
អ្នកស្រាវជ្រាវ អង់គ្លេស និងកេនយ៉ា ដែល ធ្វើការសិក្សាផ្ទាល់នៅតំបន់ ក្បែរបឹងមួយ នៅក្នុងប្រទេសកេនយ៉ា បានរកឃើញមានបាក់តេរីមួយប្រភេទ ដែលបានជួយទប់ស្កាត់ទាំងស្រុង មិនឲ្យប៉ារ៉ាស៊ីត ដែលជាមេរោគគ្រុនចាញ់អាចចូលទៅទុំក្នុងខ្លួនសត្វមូស។ មូសជាភ្នាក់ងារចម្លងមេរោគគ្រុនចាញ់ទៅមនុស្ស។ បើសិន គេអាចការពារមូស កុំឲ្យផ្ទុកប៉ារ៉ាស៊ីត ដែលជាមេរោគគ្រុនចាញ់ នោះគឺដូចជាការពារមនុស្សពីជំងឺគ្រុនចាញ់ដែរ។
តាមការសិក្សារបស់អ្នកវិទ្យាសាស្រ្ត ដែលត្រូវបានចុះផ្សាយ កាលពីថ្ងៃចន្ទ នៅក្នុង កាសែត វិទ្យាសាស្រ្ត Nature Communications បាក់តេរី ឈ្មោះ Microsporidia ជាផ្សិត ស្រដៀងគ្នានឹងប៉ារ៉ាស៊ីត។ គេបានរកឃើញបាក់តេរីប្រភេទនេះ នៅក្នុងពោះវៀន និងប្រដាប់បន្តពូជរបស់សត្វល្អិត ប្រមាណ៥ភាគរយ ដែលគេបានជ្រើសរើសយកមកសិក្សាពិសោធន៍។ អ្វីដែលទាក់ទាញចំណាប់អារម្មណ៍របស់អ្នកវិទ្យាសាស្រ្ត គឺរាល់សត្វមូស ដែលមានបាក់តេរី Microsporidia នៅក្នុងខ្លួន គឺគ្មានផ្ទុកប៉ារ៉ាស៊ីត ដែលជាមេរោគគ្រុនចាញ់នោះទេ។ សម្រាប់សាស្រា្តចារ្យ Jeremy Herren ដែលបាននិយាយប្រាប់ទូរទស្សន៍អង់គ្លេស BBC ទិន្នន័យបង្ហាញថា បាក់តេរី រាំងខ្ទប់ ១០០ភាគរយ មិនឲ្យមេរោគគ្រុនចាញ់ចូលទៅក្នុងខ្លួនសត្វមូស។ ការរកឃើញថ្មីនឹងជួយបើកផ្លូវ ឲ្យគេមានវិធីសាស្រ្តថ្មី ដើម្បីប្រយុទ្ធប្រឆាំងជំងឺគ្រុនចាញ់ ដែលសម្លាប់មនុស្ស ក្នុងពិភពលោក ប្រមាណ៤សែននាក់ ក្នុងមួយឆ្នាំ ដែលនៅក្នុងនោះ ភាគច្រើន ជាកុមារ អាយុ ក្រោម ៥ឆ្នាំ។
សព្វថ្ងៃនេះ គេអាចទប់ មិនឲ្យជំងឺគ្រុនចាញ់ ឆ្លងខ្លាំង បានតាមរយៈ យុទ្ធនាការប្រើមុងជ្រលក់ថ្នាំប្រឆាំងមូស និងការបាញ់ថ្នាំសម្លាប់មូស នៅតាមផ្ទះរបស់ប្រជាជន។ ប៉ុន្តែ គេនៅមិនទាន់មានមធ្យោបាយដើម្បីបំបាត់ជំងឺគ្រុនចាញ់ទាំងស្រុងនោះទេ។
នៅពេលជំងឺគ្រុនចាញ់កាន់តែស៊ាំនឹងថ្នាំពេទ្យ កាន់តែគ្រោះថ្នាក់ គេត្រូវការមធ្យោបាយថ្មី បន្ទាន់ មួយ ដើម្បីប្រយុទ្ធប្រឆាំងនឹងជំងឺគ្រុនចាញ់។ ការរកឃើញបាក់តេរី ដែលអាចជួយរារាំង មិនឲ្យមូសឆ្លងផ្ទុកប៉ារីស៊ីត ដែលជាមេរោគគ្រុនចាញ់ ជាក្តីសង្ឃឹមថ្មីរបស់អ្នកវិទ្យាសាស្រ្ត។
បាក់តេរីMicrosporidia អាចជួយពង្រឹងប្រព័ន្ធការពារ កុំឲ្យសត្វមូសងាយឆ្លងជំងឺ។ តាមការសិក្សា បាក់តេរី បានទៅផ្លាស់ប្តូរប្រព័ន្ធរំលាយអាហាររបស់សត្វមូស រហូតធ្វើឲ្យវាមិនអាចទទួលយកប៉ារ៉ាស៊ីត ដែលជាមេរោគគ្រុនចាញ់។ អ្វីដែលសំខាន់ គឺបាក់តេរី មានវត្តមានយូរក្នុងខ្លួនមូស ដែលធ្វើឲ្យមូស មិនងាយនឹងឆ្លងមេរោគគ្រុនចាញ់។ ជាមួយនឹងអំណោយផលខាងលើ អ្នកវិទ្យាសាស្រ្តកំពុងអង្កេត និងពិចារណា ថា គេត្រូវធ្វើយ៉ាងម៉េចដើម្បី មូស នៅក្នុងធម្មជាតិ អាចផ្ទុកបាក់តេរី ដែលជាសត្រូវរបស់ប៉ារ៉ាស៊ីត ដែលជាមេរោគគ្រុនចាញ់។ អ្នកវិទ្យាសាស្រ្តវាយតម្លៃថា ដើម្បីឲ្យការប្រយុទ្ធប្រឆាំងនឹងមេរោគគ្រុនចាញ់ មានប្រសិទ្ធិភាព គេត្រូវការឲ្យមាន មូស ចំនួន ៤០% នៅក្នុងធម្មជាតិ ដែលមានផ្ទុកបាក់តេរី Microsporidia។ ដើម្បីធ្វើដូច្នេះបាន គេអាចលែងសត្វមូសឈ្មោលដែលមានបាក់តេរី ឲ្យទៅចម្លងមូសដែកគោលញី ដែលជាភ្នាក់ងារចម្លងជំងឺគ្រុនចាញ់ទៅមនុស្ស។ មួយវិញទៀត មូសញី អាចបញ្ជូនបន្តបាក់តេរី ទៅឲ្យកូនចៅរបស់ខ្លួន ដើម្បីការពារ ពីការឆ្លងមេរោគគ្រុនចាញ់។
វិធីសាស្រ្តបញ្ជូនបាក់តេរី ទៅក្នុងខ្លួនសត្វមូស ធ្លាប់ត្រូវបានគេអនុវត្តរួចហើយ ដើម្បី ប្រយុទ្ធប្រឆាំងនឹងជំងឺគ្រុនឈាម ដែលបង្កដោយមូសខ្លាញី។ អ្នកវិទ្យាសាស្រ្ត បានជួយធ្វើឲ្យមូសឈ្មោល មានបាក់តេរី ឈ្មោះ Wolbachia មុននឹងបញ្ជូនទៅបាចសាច ក្នុងព្រៃ ដើម្បីចម្លងបន្តទៅមូសញី។ វិធីនេះ បានទៅជួយកាត់បន្ថយចំនួនមូសខ្លាញី ដែលជាភ្នាក់ងារចម្លងជំងឺគ្រុនឈាម។
ភាពខុសប្លែក របស់បាក់តេរី Microsporidia ថ្មី គឺគេមិនចាំបាច់សម្លាប់ កាត់បន្ថយសត្វមូសនោះទេ គឺគ្រាន់តែឲ្យមូសមានបាក់តេរី ដើម្បីការពារកុំឲ្យឆ្លងមេរោគគ្រុនចាញ់ គឺជាការស្រេច។ ចំណុច សំខាន់ណាស់សម្រាប់ រក្សាប្រព័ន្ធ អេកូសាស្រ្ត ព្រោះថា មូស ក៏ជាប្រភពចំណីរបស់ពពួកសត្វផ្សេងទៀត ដែលដើរតួសំខាន់ នៅក្នុងការរក្សាជីវិតនៅលើផែនដី។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ