មនុស្សពាក់កណ្តាលផែនដីកំពុងប្រើបណ្តាញសង្គម
ចុះផ្សាយនៅថ្ងៃ៖
ស្តាប់ - ០៤:៥៨
ការសិក្សាមួយបានបង្ហាញថា មនុស្សប្រមាណ ជិត ៤ពាន់លាននាក់ ដែលតំណាងឲ្យជាងពាក់កណ្តាលនៃមនុស្សនៅលើផែនដី កំពុងប្រើបណ្តាញសង្គម។ តាមការសិក្សារបស់ក្រុមហ៊ុនផ្នែកទីផ្សារ ឈ្មោះ Global Web Index ដែលមានទីស្នាក់ការនៅទីក្រុងឡុងដ៍ មនុស្សកាន់តែច្រើន ប្រើបណ្តាញសង្គមកាន់តែច្រើនឡើង ចាប់តាំងពីកើតមានវិបត្តិជំងឺកូវីដ ១៩។ តើគេប្រើបណ្តាញសង្គម នៅក្នុង គោលដៅ និងផលប្រយោជន៍អ្វី? យើងស្តាប់បទអត្ថាធិប្បាយរបស់ឈាង បុប្ផា
ជំងឺកូវីដ១៩ដែលកំពុងរាតត្បាតពាសពេញ សកលលោក បានធ្វើឲ្យជីវិត ច្រួលច្របល់ ធ្វើឲ្យមនុស្សយើងផ្លាស់ប្តូរទម្លាប់ របៀបទាក់ទង ជាមួយបងប្អូន និងអ្នកខាងក្រៅ។ វិធានការបិទព្រំដែន បិទទីក្រុង ដាក់បង្ខាំងមនុស្សឲ្យនៅក្នុងផ្ទះ ដើម្បី ទប់ស្កាត់ការឆ្លងរាលដាលជំងឺកូវីដ នៅទូទាំងពិភពលោក បានរុញច្រានមនុស្ស ប្រុសស្រី មិនថា ចាស់ ឬក្មេង ឲ្យស្វែងរកមធ្យោបាយថ្មី ដើម្បី បន្តរក្សាទំនាក់ទំនង មិនឲ្យដាច់។ បណ្តាញសង្គម ជាមធ្យោបាយ ឆ្លើយតបនឹងកាលៈទេសៈកូវីដ១៩។
ជាលទ្ធផល មនុស្សច្រើនជាងពាក់កណ្តាលផែនដី កំពុងមានវត្តមាននៅលើបណ្តាញសង្គម ដែលចាប់ផ្តើមរីកចម្រើន ជាលំដាប់ នៅប៉ុន្មានឆ្នាំមកនេះ។ បណ្តាញសង្គមមានមុខជាប្រចាំ និងកាន់តែរីកធំធាត់ នៅក្នុងជីវិតរស់នៅរបស់មនុស្ស ជិត ៤ពាន់លាននាក់។ នេះបើតាមការសិក្សាឈ្មោះ Digital 2020 Global Statshot ដែលចងក្រងឡើងដោយក្រុមហ៊ុនឯកជនអង់គ្លេសមួយខាងផ្នែកទីផ្សារ។
ការសិក្សាខាងលើបង្ហាញថា នៅក្នុងរយៈពេល១ឆ្នាំចុងក្រោយនេះ (គិតពីខែ កក្កដា ឆ្នាំ ២០១៩ រហូតដល់ខែកក្កដា ឆ្នាំ ២០២០) ចំនួនមនុស្សប្រើបណ្តាញសង្គម កើនឡើង ជាង១០ភាគរយ ដែលត្រូវនឹងចំនួន ៣៧៦លាននាក់។ គេអាចថា គិតជាមធ្យម នៅមួយថ្ងៃ មនុស្ស១លាននាក់ បានចុះឈ្មោះជាអ្នកប្រើប្រាស់ថ្មីស្រឡាង របស់បណ្តាញសង្គម ឬនៅរៀងរាល់ ១វិនាទី ម្តង មានមនុស្ស១២នាក់ បានចុះឈ្មោះ ជាអ្នកប្រើប្រាស់ថ្មីនៅក្នុងបណ្តាញសង្គម។
បណ្តាញសង្គមជាចំណង់ចំណូលចិត្ត គ្រឿងញៀនប្រភេទថ្មី ដែលមនុស្សប្រុស ស្រី ក្មេង ចាស់ មិនដែលមើលរំលងហួស តាំងពីបើកភ្នែក រហូតដល់ ធ្មេធភ្នែកទៅវិញ។
នៅក្នុងការសិក្សាររបស់ Global Web Index ដែលចង់ដឹងផងដែរថា តើវិបត្តិកូវីដ ជះឥទ្ធិពលយ៉ាងណាទៅលើឥរិយាបថរបស់មនុស្ស គេឃើញថា ៤០%នៃអ្នកប្រើប្រាស់ ចំណាយពេលកាន់តែច្រើន នៅលើបណ្តាញសង្គម នៅប៉ុន្មានខែ ចុងក្រោយនេះ។ អ្នកប្រើប្រាស់បណ្តាញសង្គមចំណាយពេល ជាមធ្យម ២ម៉ោង និង២០នាទីនៅលើបណ្តាញសង្គម។ បើសិនគេបូកបញ្ចូល ពេលវេលាដែលមនុស្សនៅលើផែនដី ចំណាយ សម្រាប់បណ្តាញសង្គម គេរកឃើញថា ពេលវេលាសរុបដែលមនុស្សជិត៤ពាន់លាននាក់ បានចំណាយសម្រាប់បណ្តាញសង្គម ក្នុងមួយថ្ងៃ មានរយៈពេល ប្រមាណ ១លានឆ្នាំ។
តើគេប្រើបណ្តាញសង្គមដើម្បីអ្វី?
តាមការស្ទង់មតិរបស់ក្រុមហ៊ុនអង់គ្លេស មនុស្សភាគច្រើន អះអាងថា គោលដៅ សំខាន់របស់គេដែលចូលប្រើបណ្តាញសង្គម គឺដើម្បី រក្សាទំនាក់ទំនងជាមួយគ្រួសារ បងប្អូន មិត្តភក្តិ។ ចំណែកមនុស្សមួយចំនួន បានប្រើបណ្តាញសង្គម ជាមធ្យោបាយ សម្រាប់កំសាន្ត ឬទិញ លក់ផលិតផល។
នៅក្នុងកាលៈទេសៈដែលពិភពលោកកំពុងកើតមានជំងឺរាតត្បាតកូវីដ គេឃើញមនុស្សកាន់តែច្រើនចូលទៅប្រើបណ្តាញសង្គម ដើម្បី ស្វែងរកព័ត៌មានទាក់ទងនឹងកូវីដ។ នៅពេលTwitter ក្លាយជាបណ្តាញសង្គម ជំនាញខាងផ្តល់ព័ត៌មាន Facebook ឯណោះវិញ នៅតែជាបណ្តាញសង្គម នាំមុខគេ ជាមួយនឹងអ្នកប្រើប្រាស់ ជាង ២ពាន់ ៦រយលាននាក់ នៅក្នុងពិភពលោក។ Instagram របស់ក្រុមហ៊ុនហ្វេសប៊ុក ដែល តារាចម្រៀង តារាភាពយន្តល្បីៗភាគច្រើន និយមប្រើដើម្បី រក្សា ទំនាក់ទំនងជាមួយ អ្នកចូលចិត្តគាំទ្រខ្លួន មានអ្នកប្រើប្រាស់ជាង១ពាន់លាននាក់ ក្នុងមួយខែៗ ពោលគឺ នាំមុខបណ្តាញសង្គមTikTokរបស់ចិន ដែល មានចំនួនមនុស្សប្រើជាង ៨០០លាននាក់។ TikTok ដែលកាន់តែពេញនិយម នឹងអាចវ៉ាដាច់កម្មវិធី Instagrame របស់ហ្វេសប៊ុក ប៉ុន្តែ គេវាយតម្លៃថា វិធានការរបស់រដ្ឋាភិបាលឥណ្ឌា ដែលហាមមិនឲ្យប្រជាជនប្រើប្រាស់ កម្មវិធី TikTok នឹងទៅបង្អាក់បង្អន់សន្ទុះរបស់TikTok។
មនុស្សចូលចិត្តប្រើបណ្តាញសង្គម មិនមែនដើម្បីតែរក្សា ទំនាក់ទំនងជាមួយគ្រួសារ មិត្តិភក្តិ បងប្អូន ឬទទួលបានព័ត៌មាននោះទេ។ បណ្តាញសង្គមផ្តល់កម្មវិធីថ្មីៗ ប្លែក ជាពិសេស ការបង្កើតវីដេអូឃ្លីប រូបភាព សម្រាប់ផ្សព្វផ្សាយ ប្រយោជន៍របស់ អ្នកប្រើប្រាស់។ នៅពេលអ្នកប្រើប្រាស់សង្គម មានចំនួនច្រើនជាងកន្លះផែនដី គេវាយតម្លៃថា អ្នកប្រើប្រាស់បណ្តាញសង្គម សាមញ្ញធម្មតា មានកម្មវិធី បណ្តាញសង្គម យ៉ាង តិច ៩ នៅក្នុងទូរស័ព្ទ ដៃរបស់ពួកគេ។
ទោះជាការប្រើប្រាស់បណ្តាញសង្គមរីកចម្រើន លឿន នៅលើផែនដី ប៉ុន្តែ វិសមភាពនៅតែមាន។ នៅពេលទ្វីបអាមេរិក អឺរ៉ុប តំបន់អាស៊ីអាគ្នេយ៍ និងអាហ្វ្រិកខាងជើង មាន ចំនួន អ្នកប្រើប្រាស់បណ្តាញសង្គមកើនឡើង ចន្លោះ ពី៥២ ទៅ ៨៧% តំបន់អាហ្វ្រិកខាងលិច អាស៊ីខាងត្បូង ឯណោះវិញ មានចំនួនអ្នកប្រើប្រាស់បណ្តាញសង្គម យ៉ាងច្រើនបំផុត ៣៦%។ គេអាចថា ចំនួនអ្នកប្រើប្រាស់បណ្តាញសង្គម មានតិច ឬច្រើន ទៅតាមតំបន់ ភូមិសាស្រ្តនៅលើផែនដី។ នៅពីក្រោយ វិសមភាព គេឃើញមានបញ្ហាមួយទៀត។ ក្រៅតែពី មានចំនួនមនុស្សប្រើប្រាស់បណ្តាញសង្គម តិចតួច បើប្រៀបធៀបនឹងបណ្តាប្រទេសអ្នកមាន នៅអឺរ៉ុប នៅអាមេរិក បណ្តាប្រទេសនៅអាហ្វ្រិក និងនៅ អាស៊ីខាងត្បូង ជាកន្លែងដែលអ្នកប្រើប្រាស់ ភេទស្រ្តី មានចំនួនតិចជាង អ្នកប្រើប្រាស់ជាបុរស។ ការនេះផ្ទុយនឹងតំបន់អឺរ៉ុប ឬ អាមេរិកខាងជើង ជាទី ដែលមនុស្សស្រីប្រើប្រាស់បណ្តាញសង្គម ច្រើនជាងបុរស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ