ក្រុមហ៊ុនប្រេងឥន្ធនៈធំៗនៅអឺរ៉ុប បត់ទៅរកថាមពលបៃតង
ចុះផ្សាយនៅថ្ងៃ៖
ស្តាប់ - ០៤:៤១
ក្រុមហ៊ុនយក្យផ្នែកប្រេងឥន្ធនៈអង់គ្លេស BP ផ្តើមធ្វើវិនិយោគលើថាមពលដើរដោយខ្យល់ក្នុងសមុទ្ទ ជាលើកទីមួយ ក្នុងប្រវត្តិរបស់ក្រុមហ៊ុន។ BPបានសម្រេចបោះទុនដាក់កញ្ចប់ថវិកា តម្លៃជាង១ពាន់លានដុល្លារ សម្រាប់វិនិយោគគម្រោងសាងសង់កង្ហារទាញយកថាមពលនៅតាមបណ្តោយសមុទ្ទខាងកើតនៃសហរដ្ឋអាមេរិកជាមួយក្រុមហ៊ុនន័រវែស Equinor។ ក្រុមហ៊ុនប្រេងឥន្ធនៈដ៏ធំបំផុតរបស់អង់គ្លេស បានប្តូរយុទ្ធសាស្ត្រងាកទៅចាប់យកថាមពលអគ្គិសនីស្អាតម្តង។
កាលពីខែសីហាកន្លងទៅថ្មីៗនេះ បន្ទាប់ពីបានរងកការខាតបង់យ៉ាងធ្ងន់ធ្ងរអស់មួយត្រីមាស ដោយហេតុតែតម្លៃប្រេងឥន្ធនៈលើទីផ្សារដាំក្បាលចុះខ្លាំង ក្រុមហ៊ុន BP បានកំណត់យុទ្ធសាស្ត្រថ្មី។ ក្រុមហ៊ុនបានប្រកាស ថានឹងលែងចុះរុករកប្រភពអណ្តូងប្រេងថ្មី ក្នុងប្រទេសផ្សេងៗទៀតហើយ និងបានប្តេជ្ញាបង្កើនសមត្ថភាព ស្វែងរកនិងផលិតថាមពលអគ្គីសនីដែលបញ្ចេញឧស្ម័នពុលកាបូនិកទាប ក្នុងរយៈពេល១០ឆ្នាំទៅមុខ (ឆ្នាំ២០៣០) ឱ្យ២០ដងលើសពេលបច្ចុប្បន្ន។
“ការវិនិយោគក្នុងវិស័យថាមពលដើរដោយខ្យល់នៅក្នុងសមុទ្ទ នៅសហរដ្ឋអាមេរិក គឺជាជំហានទីមួយដ៏សំខាន់ នាំឆ្ពោះទៅសម្រេចយុទ្ធសាស្ត្រថ្មី” ! នេះបើតាមសេចក្តីប្រកាសរបស់ក្រុមហ៊ុន BP។
តាមការពិត BP ងាកទៅចាប់អារម្មណ៍លើវិស័យថាមពលស្អាត និយាយដោយចំថាមពលដើរដោយខ្យល់ តាំងពីយូរមកហើយដែរ។ ក្រុមហ៊ុនបានចូលរួមចំណែកវិនិយោគច្រើនមកហើយការទាញយកថាមពលដោយខ្យល់នៅលើដី តែថ្ងៃនេះជាជាលើកទីមួយ ក្រុមហ៊ុនចូលប្រលូកក្នុងគម្រោងអេអូលីយ៉េនក្នុងសមុទ្ទ។ ក្រុមហ៊ុនអង់គ្លេសមានចំណែកដល់ទៅ៥០%នៅក្នុងគម្រោងពីររបស់ក្រុមហ៊ុនអេគីណ័រ Equinor ន័រវែស។
ទីមួយគឺគម្រោង Wind Empire នៅតាមបណ្តោយសមុទ្ទញូវយ៉ក និងទីពីរគឺ គម្រោង Beacon Wind នៅតាមបណ្តោយឆ្នេររដ្ឋម៉ាសាហ្សុសេត Massachusets។ គម្រោងទាំងពីរនេះ នឹងផ្តល់ថាមពល ៤,៤ Gigawatts ដែលអាចផ្តល់អគ្គីសនី ដល់ប្រជាពលរដ្ឋអាមេរិកប្រមាណ២លានផ្ទះប្រើប្រាស់។
ហេតុអ្វី BP ជ្រើសរើសសហការវិនិយោគជាមួយក្រុមហ៊ុនន័រវែស ?
ធ្វើជាដៃគូអេគីណ័រ Equinor មិនមែនជាជម្រើសចៃដន្យទេ ឬ គ្រាន់តែដើម្បីបានគ្នាសហការទេ។ Equinor អេគីណ័រជាក្រុមហ៊ុនប្រេងឥន្ធនៈសាធារណៈដ៏ធំមួយ របស់ន័រវែស ដែលពីមុនមានឈ្មោះថា Statoil។ នៅខែឧសភាឆ្នាំ២០១៨ ក្រុមហ៊ុនន័រវែសបានប្តូរឈ្មោះមកជា អេគីណ័រ និងបានធ្វើវិនិយោគយ៉ាងសម្បើមក្រៃក្នុងវិស័យថាមពលដើរដោយខ្យល់ រហូតបានក្លាយជាជើងឯកពិភពលោក និងនាំមុខគេបំផុតក្នុងវិស័យនេះ។ ហើយបច្ចុប្បន្ន អេគីណ័រមានសមត្ថភាពហៅក្រុមហ៊ុនផ្សេងៗឱ្យមកចូលរួមវាយចំណែកក្នុងគម្រោងផ្សេងៗរបស់ខ្លួនបានទៀត។ ក្រុមហ៊ុនកំពុងបើកកិច្ចចរចាមួយ ដើម្បីចែករំលែកភាគហ៊ុនវិនិយោគលើគម្រោងសាងសង់ កសិដ្ឋានកង្ហារអគ្គិសនី ដ៏ធំបំផុតមួយអង់គ្លេស។
ថាមពលខ្យល់ក្នុងសមុទ្ទ ទីផ្សារអនាគត
គម្រោងសង់កង្ហាអេអូលីយ៉េនទាញយកថាមពលពីខ្យល់នៅក្នុងសមុទ្ទ កំពុងទាក់ទាញខ្លាំងឡើងៗក្រុមហ៊ុនប្រេងឥន្ធនៈធំៗនៅលើពិភលោក។ ទីផ្សារនេះនឹងមានកំណើនប្រមាណ២០%ក្នុងមួយឆ្នាំៗ។ នេះបើតាមការប៉ាន់ស្មានរបស់ក្រុមហ៊ុន BP។ ក្រុមហ៊ុនប្រេងឥន្ធនៈធំៗរបស់អឺរ៉ុប បានដើរជួរមុខក្នុងការប្តូរផ្លាស់យុទ្ធសាស្ត្រទៅរកថាមពលស្អាត និងសកម្មខ្លាំងជាងក្រុមហ៊ុនប្រេងឥន្ធនៈអាមេរិក។
ក្រុមហ៊ុនប្រេងឥន្ធនៈកូនកាត់អង់គ្លេសហូឡង់ Shell បានទិញកសិដ្ឋានដាំកង្ហារទាញថាមពល ដ៏ធំមួយនៅតាមបណ្តោយឆ្នេរប្រទេសហូឡង់។ ក្រុមហ៊ុនប្រេងឥន្ធនៈបារាំង តូតាល់ ដែលសកម្មខ្លាំងរួចទៅហើយក្នុងវិស័យថាមពលសូឡា ក៏បានធ្វើវិនិយោគក្នុងផ្នែកថាមពលដើរដោយខ្យល់នេះ នៅក្នុងសមុទ្ទអេកូស និងទើបបានចុះហត្ថលេខា កាលពីពីរបីថ្ងៃមុន ទទួលវិនិយោគគម្រោងសាងសង់មជ្ឈមណ្ឌលថាមពលខ្យល់ក្នុងសមុទ្ទ ដោយត្រូវកង្ហារបណ្តែតទឹក ក្នុងទំហំដ៏មហាសាលបំផុត នៅតាមបណ្តោយឆ្នេរកូរ៉េខាងត្បូង។ ជាគម្រោងថាមពលដែលនឹងផ្តល់អគ្គីសនីដល់ទៅ ២ gigawatts។ ពីមុនមក បារាំងក៏ធ្លាប់ធ្វើវិនិយោគគម្រោងថាមពលអេអូលីយ៉េនច្រើន តែក្នុងទម្រង់តូចៗទេ។
សូមបញ្ជាក់ថា នៅអឺរ៉ុប បារាំងជាមហាអំណាចថាមពលដើរដោយខ្យល់ លំដាប់ទីបួន បន្ទាប់ពី អង់គ្លេស អេស្ប៉ាញ និងអាល្លឺម៉ង់។ ប៉ុន្តែទោះបីជា ជាប់ឈ្មោះជាជើងឯក ប្រើថាមពលដើរដោយនុយក្លេអ៊ែរ ដល់ជាង៧០% ក៏ការអភិវឌ្ឍថាមពលបៃតង និយាយដោយថាមពលដើរដោយខ្យល់ បានកើនឡើងជាលំដាប់នៅប្រទេសបារាំង និងក្នុងកំរិត១១%នៅឆ្នាំ២០១៩ បើប្រៀបទៅនឹងឆ្នាំ២០១៨។ រដ្ឋាភិបាលបារាំងមានផែនការជួយសម្រួលសំណុំបែបបទដើម្បីធ្វើយ៉ាងណាឱ្យបារាំងអាចចាប់ផ្តើមអភិវឌ្ឍមជ្ឈមណ្ឌលថាមពលដើរដោយខ្យល់ ដំបូងរបស់ខ្លួននៅក្នុងសមុទ្ទ។ កម្មវត្ថុ បង្កើនសមត្ថភាពអេអូលីយ៉េនលើដីមួយជាពីរត្រឹមឆ្នាំ២០២៨ និងមានផ្តល់ការវិនិយោគអេអូលីយ៉េន ដែលអាចទាញយកថាមពលអគ្គីសនី ១ gigawatt មួយឆ្នាំមួយៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ