អង្គការសហប្រជាជាតិថាការចូលរួមដោះស្រាយបញ្ហាអាកាសធាតុមានកម្រិតទាបខ្លាំង
ប្រទេសហត្ថលេខីនៃកិច្ចព្រមព្រៀងអាកាសធាតុទីក្រុងប៉ារីសបានសន្យា និងប្តេជ្ញាចូលរួមកាត់បន្ថយការបំភាយឧស្ម័នផ្ទះកញ្ចក់។ ក៏ប៉ុន្តែ អង្គការសហប្រជាជាតិ បានប្រកាសនៅថ្ងៃសុក្រ ២៦ កុម្ភៈថា ការចូលរួមរបស់ប្រទេសជាសមាជិក ស្ថិតនៅឆ្ងាយខ្លាំងណាស់ ពីគោលដៅដែលបានកំណត់ ដើម្បីអាចទប់ស្កាត់ការកើនឡើងកម្តៅនៃភពផែនដីបាន។
ចុះផ្សាយនៅថ្ងៃ៖
ស្តាប់ - ០២:១៤
ក្រោយពីបានវាយតម្លៃចំពោះការប្តេជ្ញាចិត្ត ដែលបានធ្វើឡើងកាលពីប៉ុន្មានខែថ្មីៗនេះដោយប្រទេសហត្ថលេខីប្រមាណ ២០០ អង្គការសហប្រជាជាតិបាននិយាយថាប្រទេសជាសមាជិក អាចបំពេញតាមកិច្ចសន្យាបានតែប្រមាណ ៣០ % តែប៉ុណ្ណោះ។
"វាគឺជារឿងពិបាកនឹងជឿ នៅពេលដែលដឹងថាប្រទេសជាច្រើន នៅតែមមាញឹកធ្វើជំនួញញាប់ដៃតាមវិធីសាស្ត្រធម្មតាដូចដែលពួកគេធ្លាប់តែធ្វើ បើទោះបីជាក្នុងអំឡុងពេលដែលមនុស្សជាតិ កំពុងប្រឈមមុខនឹងភាពអាសន្នដែលនៅទីបំផុត អាចបញ្ចប់ជីវិតមនុស្សលោកនៅលើភពផែនដីនេះដ៏ដោយចុះ…"។ នេះគឺជាប្រសាសន៍របស់ប្រធានផ្នែកអាកាសធាតុរបស់អង្គការសហប្រជាជាតិលោកស្រី ប៉ាទ្រីស៊ីយ៉ា អេសពីណូហ្សា (Patricia Espinosa)។
តាមរយៈកិច្ចព្រមព្រៀងអាកាសធាតុក្រុងប៉ារីសឆ្នាំ ២០១៥ ប្រទេសហត្ថលេខីប្រមាណ ២០០ បានសន្យាថានឹងចូលរួមជួយធ្វើយ៉ាងណាទប់ស្កាត់មិនឲ្យសីតុណ្ហភាពមធ្យមលើភពផែនដីកើនឡើងលើសពី ២ អង្សារ មុនយុគ្គឧស្សាហកម្ម។
ដើម្បីសម្រេចគោលដៅនេះ និងដើម្បីការពារកុំឲ្យសីតុណ្ហភាពមធ្យមលើភពផែនដីកើនឡើងលើសពី ១,៥អង្សារ នៅចុងសតវត្សរ៍នេះ មេដឹកនាំពិភពលោក បានប្តេជ្ញាចូលរួមជាថ្មីដើម្បីបុព្វហេតុអាកាសធាតុកាលពីខែ ធ្នូ ឆ្នាំ ២០២០ ក្នុងឱកាសប្រារព្ធខួប ៥ ឆ្នាំនៃកិច្ចព្រមព្រៀងអាកាសធាតុ។
ក៏ប៉ុន្តែ ក្នុងចំណោមប្រទេសជាសមាជិកទាំងអស់ មានតែ ៧៥ ប្រទេស ដែលតំណាងឲ្យ ៣០% នៃការបំភាយឧស្ម័នពិភពលោកប៉ុណ្ណោះ បានគោរពទៅតាមពាក្យសន្យារបស់ខ្លួន។
យោងតាមអង្គការសហប្រជាជាតិ ការចូលរួមរបស់ប្រទេសហត្ថលេខីទាំង ៧៥ ប្រទេស អាចនឹងជួយកាត់បន្ថយការបំភាយឧស្ម័នពុល តិចជាង ១ % នៅឆ្នាំ ២០៣០ បើប្រៀបធៀបនឹងឆ្នាំ ២០១០។ អត្រា១ %នេះ មានកម្រិតទាបខ្លាំងណាស់ ព្រោះថាគេចាំបាច់ត្រូវការ កាត់បន្ថយការបំភាយឧស្ម័នពុលចំនួន ៤៥ %ឯណោះ ទើបអាចទប់សីតុណ្ហភាពមធ្យមនៃភពផែនដី ឲ្យស្ថិតនៅក្រោម ១,៥ អង្សា និងដើម្បីអាចជួយការពារជីវិតមនុស្សលោកពីវិបត្តិអាកាសធាតុបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ