ឃុបឃិតធ្វើឃាតលោក ហ្សេឡេនស្គី៖ អ៊ុយក្រែនដកតំណែងប្រធានអង្គរក្សប្រធានាធិបតី
លោក វ៉ូឡូឌីមៀរ ហ្សេឡេនស្គី បានចេញក្រឹត្យប្រធានាធិបតី បណ្តេញប្រធានអង្គភាពអង្គរក្សការពារសន្តិសុខប្រធានាធិបតីនិងថ្នាក់ដឹកនាំជាន់ខ្ពស់ ចេញពីតំណែង។ ការដកតំណែងមេអង្គរក្សនេះ ធ្វើឡើងបន្ទាប់ពីភ្នាក់ងារស៊ើបការណ៍សម្ងាត់អ៊ុយក្រែន បានចាប់ខ្លួនឃាត់មន្ត្រីជាន់ខ្ពស់២នាក់ ដែលជាប់សង្ស័យពីការរៀបចំគម្រោងឃុបឃិតធ្វើឃាតលោក ហ្សេឡេនស្គី និងមន្ត្រីកំពូលៗរបស់អ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:២៩
ដោយគ្មានពន្យល់បញ្ជាក់មូលហេតុអ្វីទាំងអស់ ប្រមុខរដ្ឋអ៊ុយក្រែន លោក វ៉ូឡូឌីមៀរ ហ្សេឡេនស្គី ចេញក្រឹត្យប្រធានាធិបតី ដកតំណែងប្រធានអង្គរក្សប្រធានាធិបតីនិងការពារសន្តិសុខថ្នាក់ដឹកនាំជាន់ខ្ពស់។ ក្រឹត្យបញ្ចប់មុខតំណែងនេះ ចុះនៅថ្ងៃទី៩ឧសភា ពោលគឺធ្វើឡើងតែប៉ុន្មានថ្ងៃប៉ុណ្ណោះ ក្រោយពី ភ្នាក់ងារសន្តិសុខអ៊ុយក្រែន SBU បានចាប់ឃាត់ខ្លួន មន្ត្រីជាន់ខ្ពស់ ២នាក់ បម្រើការនៅក្នុងអង្គភាពអង្គរក្សប្រធានាធិបតី។ មានឋានន្តរស័ក្តិកម្រិត វរសេនីយ៍ឯក ពួកគេទាំង ២នោះ ត្រូវជាប់សង្ស័យរៀបចំគម្រោងធ្វើឃាតថ្នាក់ដឹកនាំកំពូលៗរបស់អ៊ុយក្រែន។
បើយោងតាមសេចក្តីប្រកាសព័ត៌មានរបស់រដ្ឋអ៊ុយក្រែន, មន្ត្រីជាន់ខ្ពស់ទាំង២ដែលត្រូវភ្នាក់ងារស៊ើបការណ៍សម្ងាត់អ៊ុយក្រែន ចាប់ឃុំខ្លួននោះ បានរៀបចំគម្រោងធ្វើឃាតប្រមុខរដ្ឋអ៊ុយក្រែននិងថ្នាក់ដឹកនាំផ្សេងទៀត ដើម្បីជាអបអរអំណោយចំពោះលោក វ្ល៉ាឌីមៀរ ពូទីន ក្នុងឱកាសដែលចៅហ្វាយវិមានក្រេមឡាំង ឡើងកាន់អំណាចប្រធានាធិបតីរុស្ស៊ី អាណត្តិទី៥ នៅថ្ងៃទី៧ឧសភា។ ផែនការរបស់ពួកគេ គឺរៀបចំគម្រោងការចាប់ខ្លួនប្រធានាធិបតី លោក ហ្សេឡេនស្គី និងសម្លាប់រូបលោក ហើយនិងបំផុះគ្រាប់ ព្រមទាំងផ្តល់សញ្ញាឲ្យទ័ពរុស្ស៊ី ឲ្យបញ្ចូនយន្តហោះដ្រូនទម្លាក់គ្រាប់ ដើម្បីសម្លាប់កម្ទេច បំបាត់ភស្តុតាង។ ប្រតិបត្តិការនេះ ត្រូវធ្វើឲ្យលឿនរហ័ស ប្រើត្រឹមតែ២០និង៣០នាទីតែប៉ុណ្ណោះ។ ដើម្បីរៀបចំផែនការនេះបាន ពួកគេត្រូវបញ្ចុះបញ្ចូលទិញក្បាលពួកអង្គរក្សផ្សេងទៀត ដែលធ្វើការនៅក្បែរៗនឹងប្រមុខរដ្ឋ ហ្សេឡេនស្គី។
ក្នុងភស្តុតាងខ្សែអាត់វីដេអូ ដែលភ្នាក់ងារស៊ើបការណ៍សម្ងាត់អ៊ុយក្រែនចាប់បាន គឺ វរសេនីយ៍ឯក ទាំង ២ អាចនឹងទទួលបានលុយ ចន្លោះពី ៥ ម៉ឺន ទៅ៨ ម៉ឺនដុល្លារ ចំពោះសកម្មភាពដ៏ខ្មៅងងឹតរបស់ពួកគេ។ ផ្ទុយទៅវិញ គម្រោងការនេះមិនបានសម្រេច ហើយពួកគេត្រូវជាប់បទប្រកាន់ពីបទប្រព្រឹត្តអំពើក្បត់ជាតិ និងប្រព្រឹត្តអំពើភេរវកម្ម ដែលអាចនឹងត្រូវជាប់ពន្ធនាគារអស់មួយជីវិត។
ចាប់តាំងពីផ្ទុះសង្គ្រាមឈ្លានពានរុស្ស៊ីនៅអ៊ុយក្រែន នាដើមឆ្នាំ២០២២ រដ្ឋបាលទីក្រុងគៀវបញ្ជាក់ថា ការប៉ុនប៉ងធ្វើឃាតថ្នាក់ដឹកនាំអ៊ុយក្រែន មានជាច្រើនលើករួចមកហើយ។ ខែមុននេះ បុរសម្នាក់បានជួយចូលដៃជាមួយភ្នាក់ងារស៊ើបការណ៍សម្ងាត់រុស្ស៊ី ដើម្បីវាយប្រហារសម្លាប់លោក ហ្សេឡេនស្គី តែត្រូវនគរបាលប៉ូឡូញនិងអ៊ុយក្រែន សហការចាប់ខ្លួននៅប្រទេសប៉ូឡូញ។ ព្រឹត្តិការណ៍ទាំងលើកមុននិងលើកនេះ ត្រូវវិមានក្រេមឡាំង របស់រុស្ស៊ី បដិសេធទាត់ចោល ថាគ្មានពាក់ព័ន្ធនឹងខ្លួនទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ