វ៉ាក់សាំងកូវីដ១៩ ៖ លេចសញ្ញាព្រួយបារម្ភជុំវិញកង្វះវត្ថុធាតុដើមសម្រាប់ផលិតថ្នាំ
ធាតុផ្សំ កែវសម្រាប់ផលិតកូនដប ប្លាស្ទិក ឬឆ្នុក វត្ថុធាតុដើមសម្រាប់ផលិតថ្នាំបង្ការប្រឆាំងនឹងកូវីដ១៩ ចាប់ផ្តើមអស់ ពីស្តុកបណ្តើរៗហើយ។ ក្រុមអ្នកផលិតនិងតំណាងតួអង្គក្នុងវិស័យផលិតកម្មថ្នាំវ៉ាក់សាំង បាននាំគ្នាសម្តែងក្តីព្រួយបារម្ភ នៅក្នុងអង្គប្រជុំនាថ្ងៃអង្គារទី ៩ មីនា ២០២១។ អង្គប្រជុំបានបិទបញ្ចប់ទៅដោយចេញសេចក្តីថ្លែងការណ៍អំពាវនាវឱ្យពិភពលោកលើករនាំងឧបសគ្គនៃការធ្វើពាណិជ្ជកម្មវត្ថុធាតុដើមចាំបាច់ទាំងនោះ។
ចុះផ្សាយនៅថ្ងៃ៖
ស្តាប់ - ០២:៣៥
ដៃគូរបស់ប្រព័ន្ធចែកចាយថ្នាំបង្ការកូវីដរបស់អង្គការសហប្រជាជាតិហៅកាត់ថាCovax សហព័ន្ធអន្តរជាតិនៃឧស្សាហកម្មឱសថ(IFPMA) ព្រមទាំងក្រុមអ្នកផលិតថ្នាំបង្ការធម្មតាក្នុងប្រទេសកំពុងអភិវឌ្ឍ អ្នកជំនាញនិងតំណាងរដ្ឋាភិបាលជាច្រើនបានជួបប្រជុំគ្នាតាមអនឡាញ រយៈពេលពីរថ្ងៃ (ចន្ទនិងអង្គារទី ៨-៩មីនា២០២១)ដើម្បីពិចារណានិងរកវិធីផលិតថ្នាំបង្ការ ក្នុងបរិមាណដ៏ច្រើនមហិមាមិនធ្លាប់មាន។
នៅឆ្នាំ២០២១នេះ ឧស្សាហកម្មឱសថគិតថាត្រូវផលិតថ្នាំបង្ការ (គ្រប់មុខទាំងអស់) ចំនួន ១០លានដូស ពោលគឺពីរដងនៃសមត្ថភាពផលិតកាលពីឆ្នាំ២០១៩។ ជាកំណើនផលិតកម្មដ៏ខ្លាំងក្លា មិនដែលធ្លាប់ជួបប្រទះសោះ។ មូលហេតុបណ្តាលមកពីជំងឺរាតត្បាតកូវីដ១៩ ដែលក្នុងរយៈពេលតែមួយជាងមួយឆ្នាំបានសម្លាប់ជីវិតមនុស្សអស់ជាង២លាន៦សែននាក់ បានបង្ខំពិភពលោកឱ្យចាំបាច់ត្រូវមានថ្នាំបង្ការ។
ប៉ុន្តែដើម្បីផលិតថ្នាំបង្ការបាន គេមិនមែនត្រូវការតែធាតុផ្សំថ្នាំក្នុងបរិមាណដ៏ច្រើនមិនធ្លាប់មានមួយមុខទេ តែក៏ត្រូវការវត្ថុធាតុដើមផ្សេងទៀតក្នុងបរិមាណច្រើនលើសលុបជាងមុនដែរ ដូចជាវត្ថុធាតុដើមជាកែវសម្រាប់ធ្វើកូនដបច្រកថ្នាំ ប្លាស្ទិក ឆ្នុកឬគំរប ។ល។ និង។ល។ ក្រុមហ៊ុនផលិតថ្នាំបង្ការចាប់ផ្តល់សញ្ញាថាមានកង្វះ ធាតុផ្សំចាំបាច់ វត្ថុធាតុដើម និងសម្ភារៈបរិក្ខារចាំបាច់ ដោយដុបៗហើយ។ ការរាតត្បាតនៃជំងឺកូវីដ១៩ បានធ្វើឱ្យបណ្តាញផ្គត់ផ្គង់វត្ថុធាតុដើមទាំងនេះ រងអស្ថិរភាព និងរអាក់រអួលខ្លាំង នារយៈពេលប៉ុន្មានខែចុងក្រោយនេះផង និងបណ្តាលមកពីប្រទេសខ្លះចង់ដាក់បម្រាមត្រួតពិនិត្យនាំចេញ ដូចសហរដ្ឋអាមេរិកផង ទើបធ្វើឱ្យប្រព័ន្ធផ្គង់ផ្គង់ជួបបញ្ហាខ្លាំង។ បើតាមលោកស្រីប្រធានអង្គការពាណិជ្ជកម្មពិភពលោកថ្មី បម្រាមនាំចេញត្រូវបានបន្ធូរបន្ថយក្នុងបរិបទកូវីដ១៩នេះ តែនៅមានប្រកាន់ខ្លាំងក្នុងយ៉ាងហោច៦០ប្រទេស។
នៅក្នុងសេចក្តីថ្លែងការណ៍រួម ក្រៅអំពីអំពាវនាវឱ្យគ្រប់ប្រទេសសម្រួលការធ្វើចរាចរណ៍វត្ថុធាតុដើមនិងកម្លាំងពលកម្ម តួអង្គក្នុងវិស័យផលិតថ្នាំបង្ការបានលើកទឹកចិត្តឱ្យមានការផ្ទេរបច្ចេកវិទ្យា និងដៃគូផលិតកម្មរវាងមន្ទីរពិសោធន៍និងអ្នកផលិតថ្នាំបង្ការ តាមគំរូរបស់ក្រុមហ៊ុនAstraZeneca ជាមួយSerum Institute ឥណ្ឌា។ ប៉ុន្តែ គ្មានទេការសុំលើកកម្មសិទ្ធិបញ្ញាថ្នាំវ៉ាក់សាំង ជាបណ្តោះអាសន្ន ដូចសំណើរបស់ឥណ្ឌានិងអាហ្វ្រិកខាងត្បូងឡើយ។
លោកស្រីOkonjo-Iweala នាយិកាអង្គការពាណិជ្ជកម្មពិភពលោកក៏បានជំរុញឱ្យអ្នកផលិតថ្នាំបង្ការពន្លឿនផលិតកម្មថ្នាំនៅតាមបណ្តាប្រទេសកំពុងអភិវឌ្ឍ តាមរយៈកិច្ចព្រមព្រៀងផ្តល់អាជ្ញាបណ្ណ ជាជាងចំណាយពេលដ៏យូរក្នុងការដំឡើងរចនាសម្ព័ន្ធថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ