សេចក្តីព្រាងច្បាប់បឋមស្តីពីគ.ជ.ប ៧ជំពូកនិង៦៦មាត្រាបានបញ្ចប់ តែនៅខ្វែងគ្នាលើខ្លឹមសារ
សេចក្តីព្រាងច្បាប់បឋមស្តីពីការរៀបចំនិងការប្រព្រឹត្តទៅរបស់គណៈកម្មាធិការជាតិរៀបចំការបោះឆ្នោត ហៅកាត់ថាគ.ជ.បបានបញ្ចប់ហើយ ក្រោយពីក្រុមការងារគណបក្សប្រជាជនកម្ពុជា និងគណបក្សសង្គ្រោះជាតិបានត្រួតពិនិត្យរួចរាល់ នៅក្នុងកិច្ចពិភាក្សាកាលពីថ្ងៃចន្ទ ក៍ប៉ុន្តែខ្លឹមសារនៃសេចក្តីព្រាងច្បាប់នេះ នៅមានចំណុចខ្វែងមួយចំនួន។ ចំណុចខ្វែងគំនិតគ្នា នឹងត្រូវដាក់ទៅក្នុងកិច្ចពិភាក្សាថ្នាក់កំពូលសម្រេចនៅពេលខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
សេចក្តីព្រាងច្បាប់បឋម ស្តីពីការរៀបចំនិងការប្រព្រឹត្តទៅរបស់គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប នេះ មាន៧ជំពូក និង៦៦មាត្រា ត្រូវបានក្រុមការងារគណបក្សប្រជាជនកម្ពុជា និងគណបក្សសង្គ្រោះជាតិ តាក់តែងរួចរាល់ហើយ ក្រោយពីភាគីទាំងពីរបានដាក់សំណើររៀងៗខ្លួន។ ប៉ុន្តែសេចក្តីព្រាងច្បាប់បឋមនេះ មិនទាន់ចាប់ជាស្ថាពរនៅឡើយទេ ដោយភាគីទាំងពីរ នៅមិនទាន់ឯកភាពគ្នាលើខ្លឹមសារមួយចំនួន។ នេះបើតាមការបញ្ជាក់ពី កញ្ញា កឹម មនោវិទ្យា សមាជិកគណៈកម្មាធិការអចិន្ត្រៃយ៍ គណបក្សសង្គ្រោះជាតិ និងជាសមាជិកក្រុមការងារកំណែរទម្រង់ គជប ខាងគណបក្សសង្គ្រោះជាតិ។
កញ្ញា កឹម មនោវិទ្យា ដែលជាកូនស្រីរបស់លោក កឹម សុខា អនុប្រធានគណបក្សសង្គ្រោះជាតិផងនោះ បានអោយដឹងថា ចំណុចខ្វែងគ្នាលើខ្លឹមសារទាំងនោះ នឹងត្រូវដាក់ជូនទៅថ្នាក់ដឹកនាំកំពូលធ្វើការសម្រេចនៅពេលខាងមុខ ហើយនៅថ្ងៃទី១០វិច្ឆិការខាងមុខ ភាគីទាំងពីរនឹងជួបពិភាក្សាគ្នា ម្តងទៀត ដើម្បីធ្វើការសំអាតទៅលើខ្លឹមសារមួយចំនួន ដែលមិនទាន់ឯកភាពគ្នា។
សូមបញ្ជាក់ថា នៅក្នុងកិច្ចប្រជុំ កាលពីថ្ងៃចន្ទទី២៧តុលា ភាគីគណបក្សសង្គ្រោះជាតិដែលដឹកនាំដោយលោក គួយ ប៊ុនរឿន និងភាគីគណបក្សប្រជាជនកម្ពុជាដឹកនាំដោយលោក ប៊ិន ឈិន បានបញ្ចប់សេចក្តីព្រាងច្បាប់បឋមនេះ ដោយផ្អែកលើគោលការណ៍បី, ទី១ លើកិច្ចព្រមព្រៀងកាលពីថ្អៃទី២២កក្កដា ទី២ ផ្អែកលើច្បាប់រដ្ឋធម្មនុញ្ញកម្ពុជា និងទី៣ ផ្អែកលើ មូលដ្ឋានច្បាប់បោះឆ្នោតចាស់។
យ៉ាងណាក៍ដោយ កញ្ញា កឹម មនោវិទ្យា មិនបានបញ្ជាក់ទេថា អ្វីជាចំណុចខ្វែងគំនិតគ្នាសំខាន់នោះទេ ប៉ុន្តែនៅក្រោយកិច្ចពិភាក្សារវាងក្រុមការងារនៃគណបក្សទាំងពីរ កាលពីថ្ងៃចន្ទ ទី២៧តុលា បញ្ហាសញ្ជាតិ ការកំរិតអាយុ ការសិក្សា និងបទពិសោធន៍ការងាររបស់អគ្គលេខាធិការ និងអគ្គលេខាធិការរង គជប គឺជារឿងសំខាន់។
បើតាមកញ្ញា កឹម មនោវិទ្យា ក្រោយពីភាគីទាំងពីរឯកភាពគ្នាទាំងស្រុងលើសេចក្តីព្រាងច្បាប់បឋមនេះហើយ សេចក្តីព្រាងច្បាប់នេះ នឹងបន្តលើកយកទៅពិភាក្សាជាមួយអង្គការសង្គមស៊ីវិលបន្តទៀត មុនពេលបញ្ជូនទៅអោយរដ្ឋសភា ដើម្បីធ្វើការពិភាក្សានិងអនុម័ត ចេញជាច្បាប់ពេញលេញមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ