បុណ្យ១០០ថ្ងៃលោកកែម ឡី គ្រោងធ្វើឡើងនៅថ្ងៃទី១៤-១៧ខែតុលា
សមាជិកគណៈកម្មការរៀបចំបុណ្យសព និងប្អូនប្រុសលោកបណ្ឌិតកែម ឡី បានឲ្យដឹងថាពិធីបុណ្យ១០០ថ្ងៃ លោកបណ្ឌិតកែម ឡី នឹងធ្វើឡើងនៅថ្ងៃទី១៤ ដល់ថ្ងៃទី១៧ ខែតុលា។ ពីធីបុណ្យ១០០ថ្ងៃនេះ នឹងធ្វើឡើងក្នុងរាជធានីភ្នំពេញ និងក្នុងខេត្តតាកែវ ដែលជាស្រុកកំណើតរបស់លោកកែម ឡី។
ចុះផ្សាយនៅថ្ងៃ៖
ស្តាប់ - ០២:០៥
លោកប៉ា ងួនទៀង សមាជិកគណៈកម្មការរៀបចំបុណ្យសពលោកបណ្ឌិតកែម ឡីបានឲ្យដឹងថាពីធីបុណ្យខួបគំរប់១០០ថ្ងៃរបស់លោកបណ្ឌិតកែម ឡី ធ្វើឡើងរយៈពេល៤ថ្ងៃ ចាប់ពីថ្ងៃទី១៤ ដល់ថ្ងៃទី១៧ ខែតុលា។ យ៉ាងណាមិញ លោក ងួនទៀង មិនអាចបញ្ជាក់ថាពិធីបុណ្យនេះ នឹងគ្រោងធ្វើនៅរាជធានីភ្នំពេញ ឬនៅខេត្តតែកែវនោះទេ។
ប៉ុន្តែលោកកែម រិទ្ធិសិត ជាប្អូនប្រុសលោកកែម ឡី និងជាតំណាងគ្រួសារសពបានថ្លែងប្រាប់វិទ្យុបារាំងអន្តរជាតិថា ពិធីបុណ្យ១០០ថ្ងៃរបស់លោកបណ្ឌិតកែម ឡី នឹងធ្វើឡើងនៅរាជធានីភ្នំពេញ ២ថ្ងៃកន្លះ ហើយមកធ្វើនៅខេត្តតាកែវជាកិច្ចបញ្ចប់បុណ្យ។ លោកបញ្ជាក់ថាការធ្វើពីធីបុណ្យនៅក្នុងរាជធានីភ្នំពេញ ដោយសារតែមានរូបសំណាក់របស់គាត់ ដែលត្រូវរៀបចំដូចពិធីអភិសេក នៅថ្ងៃទី១៤ និងថ្ងៃទី១៥ ខែតុលា។
លោកបានឲ្យដឹងទៀតថា រូបសំណាក់របស់លោកកែម ឡី នឹងត្រូវហែចេញពីរាជធានីភ្នំពេញ នៅវេលាម៉ោង៧ព្រឹក ថ្ងៃទី១៦ ខែតុលា ហើយពីធីបុណ្យនឹងត្រូវបញ្ចប់នៅថ្ងៃទី១៧ ខែតុលា ក្នុងខេត្តតាកែវ ជាស្រុកកំណើតរបស់លោកកែម ឡី។ យ៉ាងណាមិញ លោកបញ្ជាក់ថាលោកមិនបានចាត់ចែងកម្មវិធីបុណ្យ១០០ថ្ងៃនេះទេ ដោយប្រគល់សិទ្ធិឲ្យគណៈកម្មការរៀបចំបុណ្យសព ហើយរូបលោកគ្រាន់តែចាំទទួលភ្ញៀវតែប៉ុណ្ណោះ។
សូមបញ្ជាក់ថា លោកែម ឡីត្រូវបានឃាតករបាញ់សម្លាប់នៅក្នុងម៉ាតនៃស្ថានីយប្រេងស្តុបបូកគោ វេលាម៉ោង ៨និង៤០នាទីព្រឹក ថ្ងៃទី១០ ខែកក្កដា ហើយសពរបស់លោកបានតម្កល់ទុកនៅវត្តចាស់ក្នុងរាជធានីភ្នំពេញ។ នៅថ្ងៃទី២៤ ខែកក្កដា សពលោកកែម ឡីត្រូវបានយកទៅបញ្ចុះនៅស្រុកកំណើតរបស់លោកក្នុងខេត្តតាកែវ។
ជុំវិញព័ត៌មាន ភរិយាលោកកែម ឡីចាកចេញពីប្រទេសកម្ពុជានោះ លោកកែម រិទ្ធិសិត មិនអាចអធិប្បាយបានទេ។ ចំណែកលោកប៉ា ងួនទៀង បញ្ជាក់ថាលោកមិនបានក្តាប់ព័ត៌មាននេះបានទេ។
គួររំលឹកជូនថាអ្នកស្រីប៊ូ រចនា ភរិយា លោកកែម ឡី ធ្លាប់បានថ្លែងប្រាប់វិទ្យុបារាំងអន្តរជាតិកាលពីថ្ងៃទី១៣ ខែកក្កដាថា ស្ថានទូតអូស្តា្រលីបានមកជួបទាក់ទង ដើម្បីយកលោកស្រីនិងកូនៗ ទៅរស់នៅប្រទេសអូស្ត្រាលី។ យ៉ាងណាមិញ មិនទាន់មានការបញ្ជាក់ជាផ្លូវការណាមួយទេ ចំពោះការចាកចេញពីកម្ពុជារបស់លោកស្រីប៊ូ រចនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ