ADB៖សេដ្ឋកិច្ចកម្ពុជា នឹងបន្តរឹងមាំក្នុងពេល ២ឆ្នាំទៀត
យោងតាមរបាយការណ៍ថ្មីមួយរបស់ធនាគារអភិវឌ្ឍន៍អាស៊ី (ADB) ដែលចេញនៅថ្ងៃទី ៣០មីនានេះ បានបង្ហាញថា សេដ្ឋកិច្ចកម្ពុជា នឹងនៅតែបន្តមានភាពរឹងមាំ ក្នុងរយៈពេល ២ឆ្នាំខាងមុខនេះ។ រឹងមាំ ដោយសារតែកម្ពុជា មានកំណើនក្នុងវិស័យឧស្សាហកម្ម កាត់ដេរ និងសេវាកម្ម ជាដើម។ យ៉ាងណាក៏ដោយ ADB បានផ្តល់អនុសាសន៍ថា ដើម្បីរក្សានិរន្តភាពនៃកំណើននេះ កម្ពុជា ចាំបាច់ត្រូវបន្តការពង្រឹងសេដ្ឋកិច្ច និងពង្រីកឱកាសការងារបន្ថែមទៀត តាមរយៈការទាក់ទាញឧស្សាហកម្មថ្មីៗ។
ចុះផ្សាយនៅថ្ងៃ៖
ស្តាប់ - ០២:២២
របាយការណ៏សេដ្ឋកិច្ច ដែលបោះពុម្ពផ្សាយប្រចាំឆ្នាំរបស់ ADB មានឈ្មោះថា ទស្សនវិស័យអភិវឌ្ឍន៍អាស៊ី ២០១៦ បានព្យាករថា ផលិតផលសរុបក្នុងស្រុក ឬហៅថា ផសស នឹងមានការកើនឡើង ៧ភាគរយ ក្នុងឆ្នាំ ២០១៦ ពោល គឺដូចគ្នានឹងកម្រិតដែលសម្រេចបាន ក្នុងឆ្នាំ ២០១៥ ហើយអាចឡើងតិចតួច ក្នុងឆ្នាំ ២០១៧។
នាយក ADB ប្រចាំកម្ពុជា បានលើកឡើងថា ភាពនៅតែរឹងមាំរបស់សេដ្ឋកិច្ចកម្ពុជា ក្នុងរយៈពេល ២ឆ្នាំនេះ ដោយសារតែមានកំណើនក្នុងវិស័យឧស្សាហកម្ម និងសេវាកម្ម ការធ្វើពិពិធកម្ម ក្នុងវិស័យឧស្សាហកម្មធន់ស្រាល និងកាត់ដេរ រួមទាំងទិសដៅនាំចេញ។ ប៉ុន្តែដើម្បីរក្សានិរន្តភាពនៃកំណើននេះ កម្ពុជា ចាំបាច់ ត្រូវបន្តធ្វើពិពិធកម្មសេដ្ឋកិច្ច និងពង្រីកឱកាសការងារបន្ថែមទៀត តាមរយៈការទាក់ទាញឧស្សាហកម្មថ្មីៗ។
ចំពោះវិស័យឧស្សាហកម្ម ត្រូវបាន ADB ព្យាករថា មានកំណើន ៩,៥ភាគរយ នៅឆ្នាំនេះ ដោយសារមានការបន្តធ្វើពិពិធកម្មផលិតផល ដែលមានតម្លៃបន្ថែមខ្ពស់ជាង ដូចជាផលិតផលសម្លៀកបំពាក់ ស្បែកជើង និងអេឡិចត្រូនិច។ ចំណែក កំណើនក្នុងវិស័យសេវាកម្ម ត្រូវបានរំពឹងថា នឹងកើនឡើង ៧,៨ភាគរយ។ វិស័យកសិកម្ម នឹងកើនឡើង ១,៦ភាគរយ ដោយការសន្មត់ថា អាកាសធាតុអាចមានភាពអំណោយផលវិញ។ ដោយឡែក កំណើនវិស័យសំណង់ រំពឹងថា នឹងបន្តថមថយមកវិញ បើធៀបនឹងកំណើនខ្ពស់ខ្លំាង ក្នុងរយៈពេលប៉ុន្មានឆ្នាំចុងក្រោយនេះ។
ចំពោះ ឱនភាពសារពើពន្ធ ដោយមិនរាប់បញ្ចូលជំនួយឥតសំណង ត្រូវបានប៉ាន់ស្មានថា នឹងកើនឡើងដល់ ៤,៣ភាគរយ នៃ ផសស ក្នុងឆ្នាំ ២០១៦។ ឱនភាពគណនីចរន្ត អាចមិនមានការប្រែប្រួលគួរអោយកត់សម្គាល់ទេ ក្នុងឆ្នាំ ២០១៦ ប៉ុន្តែនឹងធ្លាក់ចុះ ក្នុងឆ្នាំ ២០១៧ ដោយសារតែឱកាសនាំចេញ មានលក្ខណៈល្អប្រសើរជាងមុន។ អតិផរណា បានកើនឡើងតិចតួចវិញនៅចុងឆ្នាំ២០១៥។ ចំណែក ការថយចុះនូវថ្លៃស្បៀងអាហារ និងឥន្ធនៈសកល ត្រូវបានរំពឹងថា នឹងនាំឲ្យអតិផរណាធ្លាក់ចុះ ២,៥ភាគរយ ក្នុងឆ្នាំ ២០១៦ ហើយអាចកើនឡើងដល់ ៣,០ភាគរយ ក្នុងឆ្នាំ ២០១៧។
កំណើនដ៏ឆាប់រហ័សនៃឥណទាន និងវិស័យអចលនទ្រព្យ នាំឲ្យហានិភ័យនៃវិស័យហិរញ្ញវត្ថុ មានការកើនឡើង។ ដូច្នេះ កិច្ចខិតខំប្រឹងប្រែងបង្កើតគោលនយោបាយ ដើម្បីធានាសេ្ថរភាពវិស័យហរិញ្ញវត្ថុគួរតែបន្ត។ ទន្ទឹមនឹងនោះ ADB ស្នើឲ្យកម្ពុជា ក៏គួរចំាបាច់ត្រូវតែបង្កើនគុណភាពការងារ តាមរយៈការឆ្លើយតបចំពោះចំណុចខ្វះខាតក្នុងវិស័យអប់រំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ