អនុប្រធានាធិបតីចិនបើកទំព័រថ្មីនៃទំនាក់ទំនងរវាងចិន និងអាមេរិក
ចុះផ្សាយនៅថ្ងៃ៖
ស្តាប់ - ០៣:២៤
លោកអនុប្រធានាធិបតីចិន ស្ហ៊ី ជីនពីង បានបញ្ចប់ទស្សនកិច្ចរយៈពេលបីថ្ងៃរបស់លោកនៅអាមេរិក។ ទាំងទីក្រុងវ៉ាស៊ីនតោននិងទាំងទីក្រុងប៉េកាំងដែលកំពុងមើលមុខគ្នាមិនចំ ចង់ឲ្យទស្សនកិច្ចនេះរបស់អនាគតបុរសខ្លាំងនៃប្រទេសចិនបានទទួលជោគជ័យ ដើម្បីសម្រាលភាពតានតឹងរវាងគ្នា។ ក៏ប៉ុន្តែ នៅលើសាច់ការជាក់ស្តែង គ្មានឡើយលទ្ធផលជាដុំកំភួន មានត្រឹមតែលទ្ធផលជានិមិត្តរូប។ និមិត្តរូបនៃការបើកទំព័រថ្មីនៅក្នុងប្រវត្តិទំនាក់ទំនងរវាងអាមេរិកនិងចិន ពីព្រោះគឺលោក ស្ហ៊ី ជីនពីង នេះហើយដែលនឹងក្លាយជាប្រធានាធិបតីនៃប្រទេសចិនជំនួសលោកហ៊ូ ជិនតាវ នៅឆ្នាំក្រោយ។
ចប់ដាច់ស្រេចអស់ហើយទស្សនកិច្ចជាផ្លូវការរបស់លោកស្ហ៊ី ជីនពីងនៅសហរដ្ឋអាមេរិក។ គ្មានលទ្ធផលជាដុំកំភួនអ្វីទេ តែមានរូបភាព និងសញ្ញាមួយចំនួន។ រូបភាព គឺអាមេរិកបានទទួលលោកអនុប្រធានាធិបតីចិនប្រៀបបាននឹងប្រមុខរដ្ឋ។ ទាំងនេះ ក៏ពីព្រោះតែលោក ស្ហ៊ី ជីនពីង នឹងក្លាយជាប្រធានាធិបតីចិនជំនួសលោកហ៊ូ ជិនតាវ នៅជាងមួយឆ្នាំទៀតខាងមុខនេះ។ រីឯសញ្ញាវិញ សញ្ញាសំខាន់ដែលស្តែងចេញពីទស្សនកិច្ចនេះ គឺទាំងអាមេរិក និងទាំងចិន សុទ្ធតែចង់បើកទំព័រមួយថ្មីនៃទំនាក់ទំនងរវាងគ្នា។ បំណងរួមនេះ គឺជាការមួយចាំបាច់ ពីព្រោះរយៈពេលចុងក្រោយនេះ អាមេរិកនិងចិនមើលមុខគ្នាមិនចំទេ។ ទីក្រុងវ៉ាស៊ីនតោនខឹងទីក្រុងប៉េកាំងដែលបន្តទប់លុយយ័នឲ្យនៅទាបធៀបនឹងលុយដុល្លារ ដើម្បីងាយនឹងនាំទំនិញចិនចេញទៅលក់នៅអាមេរិក ដែលជាហេតុធ្វើឲ្យឧុនភាពនៃជញ្ជីងពាណិជ្ជកម្មអាមេរិកាំងមានលក្ខណៈកាន់តែធ្ងន់ធ្ងរឡើងជាលំដាប់។ រីឯចិនវិញ មិនសប្បាយចិត្តនឹងអាមេរិកទេ ពីព្រោះមហាអំណាចពិភពលោកទីមួយនេះ កំពុងបែរទៅពង្រីកនិងពង្រឹងវត្តមានសេដ្ឋកិច្ចយោធា ការទូតនិងនយោបាយរបស់ខ្លួននៅអាស៊ីដែលចិនចាត់ទុកថា ជាដែនអំណាចរបស់ខ្លួន។ ហើយនេះ មិនទាន់និយាយដល់វេតូដែលចិនបានប្រើដើម្បីខ្ទប់ដំណោះស្រាយអន្តរជាតិក្នុងវិបត្តិស៊ីរីផង។ ក្រៅពីនេះ នៅមានសំណុំរឿងចម្រូងចម្រាសច្រើនទៀតដែលបន្តបំពុលទំនាក់ទំនងរវាងអាមេរិកនិងចិន រួមមានជាអាទិ៍តៃវ៉ាន់ដែលអាមេរិកនៅតែលក់អាវុធឲ្យ នុយក្លេអ៊ែរកូរ៉េខាងជើង និងនុយក្លេអ៊ែរអ៊ីរ៉ង់ បញ្ហាសិទ្ធិមនុស្សនៅទីបេ និងនៅស៊ីងជាំង។
តែយ៉ាងណាក៏ដោយ គេអាចនិយាយបានថា វត្តមានរបស់លោក ស្ហ៊ី ជីនពីង នៅអាមេរិកប៉ុន្មានថ្ងៃចុងក្រោយនេះ គឺជាការផ្តើមឡើងនៃទំនាក់ទំនងថ្មីមួយរវាងទីក្រុងវ៉ាស៊ីនតោននិងទីក្រុងប៉េកាំង។ ពីព្រោះជួនកាល ល្អឬអាក្រក់ តានតឹង ឬធូរស្រាល ទំនាក់ទំនងរវាងប្រទេសមួយនិងប្រទេសមួយទៀត អាស្រ័យទៅលើបុគ្គលិកលក្ខណៈរបស់អ្នកដឹកនាំ។ និយាយបែបផ្សេង បើសិនជាជាប់ឆ្នោតម្តងទៀតជាប្រធានាធិបតីនៅខែវិច្ឆិកាខាងមុខនេះ លោកអូបាម៉ាអាចនឹងត្រូវរ៉ូវគ្នាល្អជាមួយលោកស្ហ៊ី ជីនពីង ដ្បិតអនាគតប្រធានាធិបតីចិនរូបនេះស្គាល់ច្បាស់សហរដ្ឋអាមេរិក ជាទីដែលកូនស្រីរបស់លោកកំពុងបន្តការសិក្សា និងជាទីដែលលោកធ្លាប់ទៅប្រាំដងរួចមកហើយ។
ក៏ប៉ុន្តែ ទោះជាយ៉ាងណាក៏ដោយ នៅលើសាច់ការជាក់ស្តែង នឹងមិនអាចមានទៅកើតទេ ការប្រែប្រួលធំដុំនៅក្នុងទំនាក់ទំនងរវាងអាមេរិកនិងចិន នាពេលដែលលោកស្ហ៊ី ជីនពីងនឹងឡើងមកគ្រប់គ្រងប្រទេសចិននៅឆ្នាំក្រោយ។ ប្រវត្តិសាស្រ្តបានបង្ហាញច្បាស់ហើយថា ក្នុងអំឡុងពេលជាង៦០ឆ្នាំកន្លងទៅនេះ ទំនាក់ទំនងរវាងមហាយក្សទាំងពីរបានស្គាល់ស្ថិរភាពល្អ តែនៅពេលណាដែលផលប្រយោជន៍របស់អាមេរិក និងរបស់ចិនបាញ់ទៅរកទិសដៅមួយដូចគ្នា។ ឧទាហរណ៍ជាក់ស្តែង គឺពីឆ្នាំ១៩៧២ដល់ឆ្នាំ១៩៩១។ កាលសម័យនោះទីក្រុងវ៉ាស៊ីនតោន និងទីក្រុងប៉េកាំងបានបោះដៃរកគ្នាក្នុងនាមជាដៃគូយុទ្ធសាស្រ្តដើម្បីទប់ទល់នឹងសត្រូវរួម នោះគឺសហភាពសូវៀត។ ផ្ទុយទៅវិញ តាំងពីចប់សង្គ្រាមត្រជាក់រហូតមកដល់សព្វថ្ងៃ ចង់ឬមិនចង់ អាមេរិកនិងចិនជាគូប្រជែងយុទ្ធសាស្រ្ត មានន័យថា ពីពេលនេះតទៅ ពិភពលោកជាភ្នំមួយដែលមានខ្លាពីរ គឺអាមេរិកនិងចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ