អាស៊ានមិនអាចដោះស្រាយបញ្ចប់ជម្លោះព្រំដែនកម្ពុជា-ថៃបានទេ
ចុះផ្សាយនៅថ្ងៃ៖
ស្តាប់ - ០៤:៣៤
តបទៅនឹងសំណើរបស់លោកនាយករដ្ឋមន្ត្រី ហ៊ុន សែន ដែលស្នើឱ្យក្រុមប្រឹក្សាសន្តិសុខអង្គការសហប្រជាជាតិកោះប្រជុំជាបន្ទាន់ ដើម្បីដោះស្រាយបញ្ឈប់ការឈ្លានពានរបស់ថៃ ប្រធានក្រុមប្រឹក្សាសន្តិសុខអង្គការសហប្រជាជាតិបានបង្វែរសំណុំរឿងទៅឱ្យ សមាគមអាស៊ានជាអ្នកដោះស្រាយសិន។ យ៉ាងណាក៏ដោយស្ថាប័នកំពូលរបស់ពិភពលោកមួយនេះបានត្រៀមរួចហើយថា នឹងកោះប្រជុំដោះស្រាយបញ្ហាព្រះវិហារក្នុងករណីដែលអាស៊ានមិនអាច ដោះស្រាយបាន។ សម្រាប់ក្រុមអ្នកវិភាគ សមាគមអាស៊ានមិនអាចដោះស្រាយបញ្ចប់ជម្លោះព្រំដែនរវាងកម្ពុជានិងថៃ បានឡើយ។
បន្ទាប់ពីបានប្រជុំពិគ្រោះយោបល់ផ្ទៃក្នុងរបស់ខ្លួនរួចមក ក្រុមប្រឹក្សាសន្តិសុខអង្គការសហប្រជាជាតិបានរុញសំណុំរឿងនៃជម្លោះព្រំដែនខ្មែរនិងថៃទៅឱ្យសមាគមអាស៊ានជាអ្នកដោះស្រាយសិនមុននឹងខ្លួនចាប់ផ្តើមកោះប្រជុំដើម្បីដោះស្រាយបញ្ហានេះ។
ការបោះបាល់ទៅឱ្យសមាគមអាស៊ានជារឿងពិធីការប៉ុណ្ណោះ ពីព្រោះថាអង្គការសហប្រជាជាតិមិនអាចយកសំណុំរឿងនេះមកដោះស្រាយភ្លាមៗដោយមើលរំលងសមាគមអាស៊ានបានទេ។ រីឯកម្ពុជាក៏មិនអាចប្រកែកមិនទទួលយកសំណើបែបនេះបានដែរ ពីព្រោះថាការបដិសេធមិនទទួលយកតួនាទីរបស់អាស៊ានមានន័យស្មើនឹងការមិនផ្តល់សារៈសំខាន់ដល់អាស៊ានដែលខ្លួនជាសមាជិក។ ម្យ៉ាងទៀត កម្ពុជាតែងសម្តែងភាពទន់ភ្លន់ចំពោះដំណោះស្រាយបញ្ហាជាមួយថៃដោយយល់ព្រមទទួលយកគ្រប់យន្តការទាំងអស់ឱ្យតែអាចទៅរួច។
ប៉ុន្តែ ប្រសិនណាបើគេពិនិត្យទៅលើជម្រៅនៃបញ្ហាជម្លោះនៅព្រះវិហារ និងពិនិត្យទៅលើតួនាទីរបស់អាស៊ាន សមាគមនេះពិតជាមិនអាចដោះស្រាយបញ្ចប់បញ្ហាខ្មែរ និងថៃបានឡើយ។ ហេតុផលនៅទីនេះវាសាមញ្ញនិងងាយយល់ជាទីបំផុត។ ជាបឋម គេត្រូវយល់ថាទំនាស់អំពីបញ្ហាទឹកដីមិនមែនជាទំនាស់បែងចែកនំគ្នានោះឡើយ ជាពិសេសទៅទៀត រឿងព្រះវិហារដែលកំពុងកើតឡើងរវាងខ្មែរនិងថៃនៅពេលនេះមិនមែនជារឿងដែលអាចបញ្ចប់ដោយការធ្វើសម្បទានកាត់ដីចែកគ្នាបានទេ។ បញ្ហានៅត្រង់ថាព្រំដែនរវាងប្រទេសទាំងពីរត្រូវបានគូស វាសចេញជាផែនទីរួចរាល់អស់ហើយតាំងពីជាង១០០ឆ្នាំមុនមកម៉្លេះ។ ផែនទីនេះហើយដែល តុលាការយុត្តិធម៌អន្តរជាតិក្រុងឡាអេបានកាត់សេចក្តីឱ្យកម្ពុជាឈ្នះថៃលើសំណុំរឿងព្រះវិហារកាលពីឆ្នាំ១៩៦២។ ដូច្នេះបញ្ហានៅទីនេះ គឺការឈ្លានពានរបស់ថៃដែលកម្ពុជាមិនអាចធ្វើសម្បទានណាមួយបានឡើយ។
ដើម្បីដោះស្រាយទំនាស់ប្រភេទនេះវាទាមទារឱ្យមានយន្តការមួយដែលមានអំណាចពិតប្រាកដក្នុងការអារកាត់ថាដីនេះជារបស់ខ្មែរនិងបង្ខំឱ្យថៃបញ្ឈប់ការឈ្លានពាន។ ស្ថាប័នដែលមានសិទ្ធិអំណាចធ្វើរឿងនេះបានគឺមានតែក្រុមប្រឹក្សាសន្តិសុខអង្គការសហប្រជាជាតិតែប៉ុណ្ណោះ ដែលត្រូវបង្ខំឱ្យថៃគោរពសេចក្តីសម្រេចរបស់តុលាការក្រុងឡាអេ។
ងាកទៅមើលសមាគមអាស៊ានវិញ សមាគមនេះពិតជាមិនអាចដោះស្រាយបញ្ចប់បញ្ហារវាងខ្មែរនិងថៃបានទេ មិនបានដោយហេតុថាអាស៊ានគ្មានអំណាចអ្វីដែលត្រូវអារកាត់រឿងរបៀបនេះឡើយ។ ម៉្យាងទៀត អាស៊ានគឺជាសមាគមដែលប្រកាន់យកគោលការណ៍មិនជ្រៀតជ្រែកកិច្ចការផ្ទៃក្នុងរបស់គ្នាជាធំ។ គោលការណ៍នេះមិនអនុញ្ញាតឱ្យសមាគមអាស៊ានដោះស្រាយបញ្ហាផ្ទៃក្នុងរបស់រដ្ឋមួយ ឬទំនាស់រវាងសមាជិកមួយជាមួយនឹងសមាជិកមួយទៀតបានឡើយ។ ជាពិសេសទៅទៀត ថៃក៏មិនដែលទទួលយកតួនាទីរបស់អាស៊ានក្នុងការដោះស្រាយបញ្ហាព្រះវិហារម្តងណាទេ។ ក្នុងបរិបទបែបនេះ តើអាស៊ានអាចធ្វើអ្វីបាន?
ជាការពិត អ្វីដែលអាស៊ានអាចធ្វើបាន គឺអាចនឹងប្រើវិធីលួងលោមតាមបែបការទូតឱ្យភាគីនីមួយៗអត់ធ្មត់ និងឈប់បាញ់គ្នាមួយរយៈបាន។ ប៉ុន្តែ បែបនេះមិនមែនជាដំណោះស្រាយពិតប្រាកដដែលកម្ពុជាចង់បានឡើយពីព្រោះថាយូរឬឆាប់បញ្ហាវានឹងផ្ទុះឡើងវិញតែដដែល។ ដូច្នេះ កម្ពុជាមិនត្រូវបោះជំហានថយក្រោយវិញជាដាច់ខាតទោះជាក្នុងតម្លៃណាក៏ដោយ។ រដ្ឋាភិបាលកម្ពុជាត្រូវរៀបចំយុទ្ធសាស្ត្របន្តទៀតដោយធ្វើយ៉ាងណាជំរុញឱ្យមានដំណោះស្រាយដាច់ស្រេចមួយអំពីបញ្ហាព្រះវិហារពីព្រោះវាទាក់ទងនឹងភាពសុខសាន្តនៃប្រទេសជាតិរបស់ខ្លួន។
រីឯការបដិសេធរបស់ថៃមិនទទួលយកដំណោះស្រាយតាមយន្តការអន្តរជាតិគ្មានអ្វីចម្លែកទេ ពីព្រោះប្រទេសនេះមិនហ៊ានលេងតាមផ្លូវច្បាប់អន្តរជាតិឡើយដោយហេតុថាថៃបានដឹងមុនថាគេនឹងចាញ់កម្ពុជា។ ឥឡូវនេះ ក្រុមប្រឹក្សាសន្តិសុខអង្គការសហប្រជាជាតិបានត្រៀមខ្លួនហើយថានឹងកោះប្រជុំដោះស្រាយបញ្ហាខ្មែរថៃក្នុងករណីដែលអាស៊ានដោះស្រាយមិនបាន។
ដោយសារគេបានដឹងមុនជាស្រេចថាអាស៊ានមិនអាចដោះស្រាយបញ្ហាខ្មែរនិងថៃបាន រដ្ឋាភិបាលកម្ពុជាត្រូវត្រៀមលក្ខណៈឱ្យបានល្អប្រកបដោយជំហរម៉ឺងម៉ាត់និងភាពប៉ិនប្រសប់ក្នុងការតទល់ជាមួយថៃនៅឯក្រុមប្រឹក្សាសន្តិសុខសហប្រជាជាតិ។ ការដកថយក្នុងរឿងនេះមិនខុសអ្វីពីការទុកឱ្យកម្ទេចភ្លើងឆាបឆេះក្លាយជាអគ្គិភ័យនោះឡើយ។ សហគមន៍អន្តរជាតិក៏ត្រូវមានចំណែកទទួលខុសត្រូវដែរចំពោះរឿងនេះប្រសិនបើពួកគេបណ្តែតបណ្តោយមិនព្រមដោះស្រាយបញ្ហាព្រះវិហារឱ្យបានដាច់ស្រេចទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ