ក្រុងធំៗនៅអាស៊ីកំពុងឈានដល់ភាពហួសចំណុះ
ការអភិវឌ្ឍន៍សេដ្ឋកិច្ចដ៏លឿនរហ័ស កត្តាអាកាសធាតុប្រែប្រួល និងចលនាចំណាកស្រុកមកកាន់ទីក្រុង បាននិងកំពុងធ្វើឱ្យទីប្រជុំជនធំៗនៅតាមបណ្តាប្រទេសអាស៊ី មានអាទិ៍ប្រទេសថៃ ហ្វីលីពីន ឥណ្ឌា ។ល។ និង។ល។ ងាយប្រឈមមុខកាន់តែខ្លាំងឡើងៗ នឹងគ្រោះធម្មជាតិផង និងគ្រោះសង្គមផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
ក្រុងធំៗនៅអាស៊ី ដែលមានប្រជាជនរស់នៅយ៉ាងច្រើនកុះករ ងាយនឹងទទួលរងគ្រោះធម្មជាតិ គឺបណ្តាលមកពីកង្វះផែនការនគរូបនីយកម្ម វិនិយោគហេដ្ឋារចនាសម្ព័ន្ធ មិនគ្រប់គ្រាន់ និងបណ្តាលមកពីគ្មានចេតនានយោបាយ។ នេះបើយោងតាមអ្នកឯកទេស។
ស្ថានភាពទឹកជំនន់ជន់លិចទីក្រុង នៅបាងកក កាលពីឆ្នាំមុន និងនៅម៉ានីល ពេលនេះ ការដាច់ភ្លើងអគ្គីសនីប្រើប្រាស់មួយចំហៀងប្រទេសនៅឥណ្ឌា គឺពិតជាមិនសក្តិសមនឹងការអភិវឌ្ឍន៍មានបានដ៏លឿនរហ័សរបស់ប្រទេស ដែលមានប្រជាជនជាច្រើនលាននាក់ ក្នុងមួយឆ្នាំៗចេញផុតពីភាពក្រីក្រនោះឡើយ ប៉ុន្តែសម្រាប់អ្នកឯកទេសនគរូបនីយកម្មនៅសាកលវិទ្យាល័យមែលប៊ន ប្រទេសអូស្ត្រាលី ទាំងនេះគឺបណ្តាលមកពី ផែនការនយោបាយនគរូបនីយកម្ម ក្នុងតំបន់មានជាប់ពាក់ព័ន្ធ ច្របូកច្របល់ជាមួយនឹងកម្មវត្ថុនយោបាយ និងសេដ្ឋកិច្ច។ ជាពិសេស កង្វះទស្សនវិស័យ និងផែនការមើលឱ្យបានវែងឆ្ងាយសម្រាប់អនាគត។ ការអភិវឌ្ឍន៍ហេដ្ឋារចនាសម្ព័ន្ធប្រព័ន្ធលូ ផ្លូវថ្នល់ និងអគ្គិសនី នៅមានការយឺតយ៉ាវខ្លាំង។
នៅប្រទេសថៃ ក្រុងបាងកកស្រុតចុះកាន់តែទាបៗទៅ ងាយទទួលរងគ្រោះទឹកជំនន់ នឹងអាចទាបជាងទឹកសមុទ្ទនៅអំឡុងពេល៥០ឆ្នាំទៀត។ នេះគឺបណ្តាលមកពីការបូមស្រូបទាញយកទឹកមកចិញ្ចឹមប្រជាជនផង និងតម្រូវការឧស្សាហកម្មផង ព្រមទាំងបូងខូងសាងសង់អចលនទ្រព្យ។ ក្រុមហ៊ុនអចលនទ្រព្យដែលធំជាងបង្អស់មួយ កាន់កាប់ដោយគ្រួសារនាយករដ្ឋមន្ត្រី ថាក់ស៊ីន។ អភិវឌ្ឍន៍នគរូបនីយកម្មលឿនរហន់ពេក អាចធ្វើឱ្យស្ទះផ្លូវទឹកធម្មជាតិ និងប្រព័ន្ធបង្ហូរទឹក ក៏ជាបុព្វហេតុនាំឱ្យងាយជួបគ្រោះទឹកជំនន់។ នេះជាករណីប្រទេសហ្វីលីពីន។
ចំណែកនៅប្រទេសឥណ្ឌាវិញ អង្គការសហប្រជាជាតិបានចេញរបាយការណ៍មួយកាលពីឆ្នាំ២០១១ អំពីកំណើនប្រជាជននៅរស់ទីក្រុង ថានឹងអាចកើនឡើងពី៣០ ទៅ៦០% នៅឆ្នាំ២០៣០។ បញ្ហាសង្គមបានចោទកាន់តែខ្លាំង បានធ្វើឥណ្ឌាមួយចំហៀងទើបធ្លាក់ក្នុងពិភពខ្មៅងងឹត ព្រោះដាច់ភ្លើង។ តម្រូវការផ្នែកថាមពលកាន់ខ្លាំង តែប្រព័ន្ធអគ្គិសនីមិនសមស្រប។
បញ្ហាសង្គមមួយទៀត ដែលគេសង្កេតឃើញមានកាន់ញឹកញាប់ និងនៅតាមគ្រប់ក្រុងរបស់អាស៊ី ស្ទើរក្លាយជាប្រពៃណី បង្កឡើងដោយកង្វះហេដ្ឋារចនាសម្ព័ន្ធនោះ គឺ មធ្យោបាយធ្វើដំណើរនិងការកកស្ទះចរាចរណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ