លោក សម រង្ស៊ី៖ ទេសភាពនយោបាយនៅកម្ពុជាបានផ្លាស់ប្ដូរក្រោយការបោះឆ្នោតនិតិកាលទី៥
ដូចការគ្រោងទុក លោកសម រង្ស៊ី និងលោកកឹម សុខា ដែលជាប្រធាន និងអនុប្រធានគណបក្សសង្គ្រោះជាតិ បានជួបជុំជាមួយអ្នកគាំទ្ររបស់ខ្លួនប្រហែល១ម៉ឺននាក់ នៅទីលានប្រជាធិបតេយ្យ នៅរសៀលថ្ងៃចន្ទទី ២៦ សីហានេះ។ នៅក្នុងរាជធានីភ្នំពេញ ខ្លឹមសារនៃសុន្ទរកថាទាក់ទងនឹងលទ្ធផលនៃការបោះឆ្នោត របស់ប្រធានគណបក្សសង្គ្រោះជាតិ ហាក់ដូចជាធ្ងន់ជាងខ្លឹមសារដែលមេដឹកនាំគណបក្សប្រឆាំងធ្លាប់បានធ្វើកន្លងមក នៅតាមបណ្តាខេត្តនានា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៦
មនុស្សប្រហែល១ម៉ឺននាក់ បានមកជួបជុំគ្នានៅលើទីលានប្រជាធិបតេយ្យ ដើម្បីស្តាប់លោកសម រង្ស៊ី និងលោកកឹម សុខា ថ្លែងសារ អំពីគោលជំហរនយោបាយរបស់គណបក្សនេះ ទាក់ទងនឹងការបោះឆ្នោត។ ជាការជួបជុំជាលើកទី២ ដែលគណបក្សសង្គ្រោះជាតិអោយឈ្មោះថា "វេទិកាម្ចាស់ឆ្នោតដើម្បីស្វែងរកការពិត និងយុត្តិធម៌"។ ពីវេទិកាទល់មុខអ្នកគាំដ៏ច្រើន លោកសម រង្ស៊ី បានមិនបានខ្លាចនឹងស្រែកដាក់មេក្រូ ប្រាប់អ្នកគាំទ្រទេថា ទេសភាពនយោបាយនៅកម្ពុជាក្រោយការបោះឆ្នោតនីតិកាលទី៥នេះ បានផ្លាស់ប្តូរហើយ។
ការផ្លាស់ប្តូរ ដែលប្រធានគណបក្សប្រឆាំងរូបនេះមិនបាននិយាយដល់ការផ្លាស់ប្តូរមេដឹកនាំប្រទេសដូចមុនទៀតទេ ប៉ុន្តែ ជាការផ្លាស់ប្តូរទិដ្ឋភាពនយោបាយ ដែលទាក់ទងនឹងតុល្យភាពអំណាចនៅក្នុងរដ្ឋសភា តាមរយៈការបោះឆ្នោត។
លោកកឹម សុខា អនុប្រធានគណបក្សសង្គ្រោះជាតិរូបនេះ បានផ្តើមសុន្ទរកថា ដោយប្រកាសអំពីជ័យជំនះរបស់គណបក្សសង្គ្រោះជាតិ ដែលបានធ្វើអោយអ្នកគាំទ្រហ៊ោរយ៉ាងខ្លាំង។ ប៉ុន្តែជាជ័យជំនះរបស់គណបក្សនេះ នៅក្នុងទីក្រុងភ្នំពេញ។ ចំពោះលោកកឹម សុខា ជ័យជំនះរបស់គណបក្សសង្គ្រោះជាតិនៅក្នុងរាជធានី គឺតំណាងអោយជ័យជំនះពិតប្រាកដ ដែលចេញពីឆន្ទៈរបស់អ្នកបោះឆ្នោត។
គួររម្លឹកថា យោងតាមលទ្ធផលបណ្តោះអាសន្នដែលប្រកាសដោយគណៈកម្មាធិការជាតិរៀបចំការបោះឆ្នោត គណបក្សសង្គ្រោះជាតិបានទទួល៧អាសនៈ លើសគណបក្សប្រជាជនកម្ពុជាដែលបានទទួល៥អាសនៈ នៅរាជធានីភ្នំពេញ។
មេដឹកនាំគណបក្សសង្គ្រោះជាតិបានធ្វើដំណើរជួបជុំអ្នកគាំទ្រជាលើកទី២ នៅតាមបណ្តាខេត្តមួយចំនួន និងនៅភ្នំពេញនេះ ខណៈដែលគណបក្សនេះកំពុងតែតវ៉ាប្រឆាំងនឹងលទ្ធផលបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ