របត់ផ្លូវដ៏រលាក់អាចបង្កគ្រោះថ្នាក់ដល់គណបក្សសង្គ្រោះជាតិ
ចុះផ្សាយនៅថ្ងៃ៖
ស្តាប់ - ០៥:១១
គណបក្សសង្គ្រោះជាតិដែលមានសន្ទុះយ៉ាងខ្លាំងគួរឲ្យកត់សម្គាល់កាលពីការបោះឆ្នោតខែកក្កដាឆ្នាំ ២០១៣ ពេលនេះកំពុងប្រឈមនឹងការបក់បោកនៃរលកនយោបាយសាជាថ្មី។ នេះអាចចាត់ទុកថាជារបត់ដ៏សំខាន់មួយដែលអាចបង្កគ្រោះថ្នាក់ដល់អនាគតគណបក្សប្រឆាំងដ៏ធំមួយនេះ។ រលកនយោបាយថ្មីនេះក៏ជាវិញ្ញាសាសាកល្បងសមត្ថភាព ដោះស្រាយបញ្ហារបស់មេដឹកនាំទាំងពីររបស់គណបក្សង្គ្រោះជាតិផងដែរ។
ប្រជាប្រិយភាពខ្ពស់ ត្រដែតរបស់គណបក្សសង្គ្រោះជាតិក្រោយការបោះឆ្នោតខែកក្កដាឆ្នាំ ២០១៣ ពេលនេះកំពុងឈានដល់របត់ផ្លូវរលាក់យ៉ាងខ្លាំង។ រលាក់ដោយកត្តាគួបផ្សំច្រើនយ៉ាងរួមទាំងកត្តាខាងក្នុងផងនិងកត្តាខាងក្រៅផង។
កត្តាសំខាន់ទី១៖ គឺមកពីស្នាមប្រះស្រាំនៃមុខរបួសចាស់នៃសម្ព័ន្ធភាពរវាងគណបក្សសម រង្ស៊ី និងគណបក្សសិទ្ធិមនុស្ស។ សូមកុំភ្លេចថា សម្ព័ន្ធភាពគឺជាចំណុចស្លាប់រស់របស់គណបក្សសង្គ្រោះជាតិ។ ដូច្នេះ ការបែកបាក់នឹងធ្វើឲ្យប៉ះពាល់ដល់សំឡេងឆ្នោតគណបក្សនេះយ៉ាងពិតប្រាកដ។
កត្តាសំខាន់ទី២ គឺមកពីការខកចិត្តរបស់អ្នកបោះឆ្នោតមួយចំនួន ។ ខកចិត្តម្យ៉ាងដោយសារតែគោលនយោបាយរបស់គណបក្សសង្គ្រោះជាតិដែលសន្យាផ្តល់ប្រាក់ឧត្ថម្ភចាស់ជរា និងការផ្តល់សេវាសុខាភិបាលឥតគិតថ្លៃជាដើមនោះមិនទាន់អាចក្លាយជាការពិតនៅឡើយ។
តាមពិតនេះមិនមែនជាកំហុសរបស់គណបក្សសង្គ្រោះជាតិទេពីព្រោះគណបក្សនេះមិនបានឈ្នះឆ្នោតដឹកនាំប្រទេសឯណា? ប៉ុន្តែ សម្រាប់អ្នកបោះឆ្នោតមួយចំនួន បើសន្លឹកឆ្នោតរបស់ខ្លួនមិនបានអ្វីដូចការសន្យា ពួកគេក៏កើតមានការខកចិត្ត។ ខកចិត្តម្យ៉ាងទៀត គឺដោយសារសង្គ្រោះជាតិយល់ព្រមចូលរដ្ឋសភាដែលខុសពីការសន្យាកាលពីដំបូងទី។
កត្តាសំខាន់ទី៣៖ ខណៈដែលសកម្មជននិងអ្នកគាំទ្រគណបក្សសង្គ្រោះជាតិជាច្រើន ខកចិត្តស្រាប់តែរលកចលនានយោបាយថ្មីមួយដែលដឹកនាំដោយក្រុមបណ្ឌិត បញ្ញវន្តមានកេរ្តិ៍ឈ្មោះមួយក្រុមបានចាប់កំណើតឡើង។ សម្រាប់អ្នកខកចិត្តជាមួយគណបក្សសង្គ្រោះជាតិ ចលនានយោបាយថ្មីនេះគឺជាក្តីសង្ឃឹមថ្មីរបស់ពួកគេ។
កត្តាសំខាន់ៗទាំងនេះប្រៀបបាននឹងព្យុះកំពុងបោកបក់ទៅលើគណបក្សសង្គ្រោះជាតិ។ ព្យុះនេះអាចគ្រាន់តែជាព្យុះក្នុងកែវដែលមិនអាចធ្វើឲ្យដើមឈើដ៏ធំរបស់គណបក្សសង្គ្រោះជាតិរង្គើឡើយប្រសិនបើមេដឹកនាំគណបក្សនេះអាចគ្រប់គ្រងសភាពការណ៍បាន។ ប៉ុន្តែ រលកចលនាថ្មីនេះអាចក្លាយជាព្យុះដ៏កំណាចមួយដែលធ្វើឲ្យមែកឈើសង្គ្រោះជាតិបាក់ធ្លាក់យ៉ាងដំណំក៏ថាបានប្រសិនបើគ្មានអ្វីអាចទប់សភាពការណ៍បានទេនោះ។
ជាការពិតណាស់ ដូចដែលគេបានមើលឃើញតាំងពីដើមទីម្ល៉េះថា គណបក្សប្រឆាំងមានសន្ទុះខ្លាំងលើផ្លូវដ៏រលាក់។ រលាក់ដោយសាតែគណបក្សនេះត្រូវឆ្លងកាត់ឧបសគ្គច្រើនយ៉ាងណាស់ក្នុងដំណើរឈោងទៅកាន់អំណាច។ ឧបសគ្គសំខាន់ៗមានដូចជា កង្វះធនធានមនុស្សក្នុងបរិបទដែលរដ្ឋបាលកម្ពុជាត្រូវបានគ្រប់គ្រងទាំងស្រុងដោយបក្សកាន់អំណាច សម្ព័ន្ធភាពដែលនៅតែផុយស្រួយ និងបញ្ហាប្រជាធិបតេយ្យផ្ទៃក្នុងបក្ស។ល។
បច្ចុប្បន្ននេះ គណបក្សសង្គ្រោះជាតិដែលទើបតែទទួលជោគជ័យធំធេងរហូតដល់៥៥កៅអីក្នុងរដ្ឋសភាកំពុងឆ្លងកាត់ដំណាក់កាលដ៏រលាក់នេះហើយ។ ប្រឈមមុខចំពោះបញ្ហានេះ មេដឹកនាំគណបក្សសង្គ្រោះជាតិត្រូវគ្រប់គ្រងសភាពការណ៍មួយចំនួនឲ្យបាន៖ ទី១ ត្រូវព្យាយាមផ្សារភ្ជិតមុខតំណប្រេះស្រាំនៃសម្ព័ន្ធភាពរវាងគណបក្សសម រង្ស៊ី និងគណបក្សសិទ្ធិមនុស្សពីព្រោះមុខតំណនេះជាចំណុចគ្រោះថ្នាក់របស់គណបក្សសង្គ្រោះជាតិ។
ទី២៖ សង្គ្រោះជាតិត្រូវតែបង្ហាញដល់អ្នកគាំទ្ររបស់ខ្លួនអំពីលទ្ធផលជាក់ស្តែងដែលកើតចេញពីការតស៊ូមតិរបស់ខ្លួនក្រោយពេលចូលរដ្ឋសភាដើម្បីកាត់បន្ថយការខកចិត្តរបស់ពួកគេ។ និងទី៣៖ គណបក្សសង្គ្រោះជាតិត្រូវសម្រេចឲ្យបាននូវកំណែទម្រង់ស៊ីជម្រៅមួយនៅផ្ទៃក្នុងបក្សដើម្បីក្លាយជាគណបក្សស្អាតស្អំ និងប្រជាធិបតេយ្យពិតប្រាកដដែលគ្មានអ្នកណាអាចប្រជែងបាន។
ប៉ុន្តែ បញ្ហានៅត្រង់ថា ដើម្បីឲ្យសម្ព័ន្ធភាពរលាយសាច់មួយវាទាមទារឆន្ទៈដែលចេញពីបេះដូងគឺមិនមែនដោយសារស្ថានការណ៍ចាប់បង្ខំទេ។ ម្យ៉ាងទៀត តើសង្គ្រោះជាតិអាចពន្យល់អ្នកគាំទ្រអំពីលទ្ធផលនៃការចូលសភាយ៉ាងដូចម្តេចទៅបើរហូតមកដល់ពេលនេះនៅតែមានសកម្មជនរបស់ខ្លួនស្ថិតនៅក្នុងពន្ធនាគារនៅឡើយនោះ? តើសង្គ្រោះជាតិអាចបង្ហាញថាខ្លួនជាបក្សប្រជាធិបតេយ្យនិងស្អាតស្អំបានដែរឬទេខណៈដែលការចោទប្រកាន់ពីពុករលួយនិងបក្ខពួកចេះតែលេចលឺជាបន្តបន្ទាប់បែបនេះសំណួរទាំងអស់នេះជាវិញ្ញាសាដ៏លំបាកដែលមេដឹកនាំគណបក្សសង្គ្រោះជាតិត្រូវពុះពារដើម្បីការពារប្រជាប្រិយភាពរបស់ខ្លួនសម្រាប់ការបោះឆ្នោតខាងមុខ។ ផ្ទុយទៅវិញ ប្រសិនបើស្ថានភាពលំបាកនេះមិនត្រូវបានគ្រប់គ្រងទាន់ពេលទេនោះ របត់ផ្លូវដ៏រលាក់នេះអាចបង្កគ្រោះថ្នាក់ដល់រថយន្តគណបក្សសង្គ្រោះជាតិដោយចៀសមិនផុត។ យ៉ាងហោចណាស់វាអាចធ្វើឲ្យរថយន្តសង្គ្រោះជាតិរបេះកង់ឬរបូតខ្ចៅខ្លះជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ