ទូរទស្សន៍បក្សប្រឆាំងនៅមិនទាន់ច្បាស់ពីពេលវេលាចេញផ្សាយ
គណបក្សសង្គ្រោះជាតិត្រូវការពេលវេលាយូរទៀត ដើម្បីធ្វើឲ្យទូរទស្សន៍បក្សប្រឆាំងដំបូងត្រូវបានមហាជនមើលឃើញនៅប្រទេសកម្ពុជា។ មន្ត្រីជាន់ខ្ពស់គណបក្សសង្គ្រោះជាតិ មិនបានបញ្ជាក់ពីពេលវេលាច្បាស់លាស់នៃការដំណើរការផ្សាយទូរទស្សន៍អាណាឡូករបស់ខ្លួន ដោយបញ្ជាក់ថា កំពុងតែរត់ការសុំអាជ្ញាប័ណ្ណនៅឡើយ ហើយក្រុមហ៊ុនគ្រប់គ្រងអាជ្ញាប័ណ្ណ នឹងបន្តរកដៃគូវិនិយោគបន្ថែមទៀត ដើម្បីឲ្យការផ្សាយអាចដំណើរការទៅបានដោយអព្យាក្រិត្យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
មន្ត្រីជាន់ខ្ពស់គណបក្សសង្គ្រោះជាតិថ្លែងថា គណបក្សរបស់លោកត្រូវការពេលវេលាច្រើនបន្ថែមទៀត ដើម្បីរៀបចំឲ្យទូរទស្សន៍មួយអាចដំណើរការទៅបានជាសាធារណៈ។ លោក យឹម សុវណ្ណ អ្នកនាំពាក្យគណបក្សសង្គ្រោះជាតិថ្លែងប្រាប់វិទ្យុបារាំងអន្តរជាតិ RFI នៅថ្ងៃនេះថា លោកមិនអាចកំណត់ច្បាស់លាស់ថា ទូរទស្សន៍សង្គ្រោះជាតិនឹងអាចចេញផ្សាយនៅពេលណាបានទេ។
ក៏ប៉ុន្តែអ្នកនាំពាក្យរូបនេះបានបញ្ជាក់ថា ពេលនេះក្រុមហ៊ុន Cambodian Independent Media Co., Ltd ដែលទទួលបន្ទុកដំណើរការទូរទស្សន៍បក្សប្រឆាំងនេះ កំពុងតែបំពេញបែបបទ ដើម្បីស្នើសុំអាជ្ញាប័ណ្ណទៅក្រសួងព័ត៌មាន។ លោក យឹម សុវណ្ណ បន្ថែមថា ក្រុមហ៊ុនគ្រប់គ្រងអាជ្ញាប័ណ្ណនេះ ក៏កំពុងស្វែងរកដៃគូវិនិយោគបន្ថែមទៀត ដើម្បីធ្វើយ៉ាងណាឲ្យទូរទស្សន៍នេះចេញផ្សាយបានឆាប់រហ័សដែលអាចធ្វើទៅបាន។
បញ្ហាថវិកាគឺជាឧបសគ្គដ៏ចំបងក្នុងការដំណើរការទូរទស្សន៍ ដែលបញ្ហានេះគណបក្សសង្គ្រោះជាតិ បានសំលឹងមើលក្រុមហ៊ុនក្នុងស្រុកនិងក្រុមហ៊ុនខ្មែរនៅបរទេសហើយ ហើយក៏មិនបានផ្តោតទៅលើក្រុមហ៊ុនបរទេសទេ។ តែកត្តាពេលវេលាបានចោទច្រើនជាង នេះបើតាមលោក យឹម សុវណ្ណ។
សូមរំលឹកថា ក្រុមហ៊ុន Cambodian Independent Media Co., Ltd ត្រូវបានអនុញ្ញាតដោយក្រសួងព័ត៌មាន និងចំណារយល់ព្រមពីលោកនាយករដ្ឋមន្ត្រីហ៊ុន សែន កាលពីថ្ងៃទី២៧វិច្ឆិកា ឲ្យបំពេញបែបបទសុំទៅក្រសួងព័ត៌មាន ដើម្បីទទួលបានអាជ្ញាប័ណ្ណទូរទស្សន៍ ដែលអាចផ្សាយតាម កាណាល់ UHF-41 នៃប្រព័ន្ធ អាណាឡូក។
ទោះយ៉ាងនេះក្តី គណបក្សសង្គ្រោះជាតិបានទុកលទ្ធភាពឲ្យអ្នកវិនិយោគដែលចាប់អារម្មណ៍មកពីគ្រប់និន្នាការ ជជែកគ្នាជាមួយម្ចាស់អាជ្ញាប័ណ្ណ ដើម្បីរៀបចំកម្មវិធីផ្សាយផ្សេងៗ។ ដោយឡែក ចំពោះកម្មវិធីព័ត៌មានវិញ ត្រូវមន្ត្រីគណបក្សប្រឆាំងអះអាងថា នឹងផ្សាយតែព័ត៌មានណាដែលឯករាជ្យ មានប្រយោជន៍ដល់សង្គម ចៀសវាងការវាយប្រហារគ្នា និងមានតុល្យភាពផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ