រដ្ឋសភាយល់ព្រមកែប្រែច្បាប់ការងារ ដើម្បីការពារផលប្រយោជន៍កម្មករពីការរត់ចោលរបស់ថៅកែរោងចក្រ
សេចក្តីព្រាងច្បាប់ស្តីពីវិសោធនកម្មនៃច្បាប់ស្តីពីការងារ ត្រូវបានរដ្ឋសភាកម្ពុជាសម្រេចអនុម័តទាំងស្រុងដោយសំឡេងគាំទ្រ១០៧សំឡេងលើ១០៩សំឡេងនៅព្រឹកថ្ងៃព្រហស្បតិ៍នេះ។ ការធ្វើវិសោធនកម្មច្បាប់ការងារនេះ មានគោលដៅការពារផលប្រយោជន៍កម្មករ-កម្មការិនីខ្មែរ ពីការរត់ចោលរបស់ថៅកែរោងចក្រ។ ក្រៅពីសេចក្តីព្រាងវិសោធនកម្មច្បាប់នេះ រដ្ឋសភាខ្មែរក៏បានសម្រេចអនុម័តសេចក្តីព្រាងច្បាប់ស្តីពីប្រាក់ឈ្នួលអប្បរមា និងសេចក្តីព្រាងច្បាប់ស្តីពីវិសោធនកម្មច្បាប់ស្តង់ដារកម្ពុជា ក្នុងពេលជាមួយគ្នានេះផងដែរ។
ចុះផ្សាយនៅថ្ងៃ៖
ស្តាប់ - ០២:១៦
ច្បាប់ស្តីការងារ ត្រូវបានរដ្ឋាភិបាលកម្ពុជាសម្រេចធ្វើការកែប្រែលើមាត្រាចំនួន៨ រួមមានមាត្រា៨៧ មាត្រា៨៩ មាត្រា៩០ មាត្រា៩១ មាត្រា៩៤ មាត្រា១១០ មាត្រា១២០ និងមាត្រា១២។ រដ្ឋាភិបាលកម្ពុជាបានអះអាងថា វិសោធនកម្មមាត្រាទាំងនេះ ធ្វើឡើងក្នុងគោលបំណងធំៗចំនួន ៣ គឺទីមួយដើម្បីបង្ការហានិភ័យរបស់កម្មករនិយោជិត ជាពិសេសក្នុងករណីរោងចក្រ សហគ្រាសបិទទ្វារដោយម្ចាស់រត់ចោល ដោយទទួលបានការទូទាត់ប្រាក់បំណាច់អតីតភាពការងារជារៀងរាល់៦ខែម្ដង ផ្អែកតាមអតីតភាពការងារ ដោយមិនមានកំណត់កម្រិតអតិបរមានៃប្រាក់បំណាច់អតីតភាពការងារ បើទោះបីជាកម្មករនិយោជិតត្រូវបានបញ្ឈប់ ឬលាឈប់ពីការងារ។
ទីពីរ គឺដើម្បីសម្រាលបន្ទុកនិយោជកក្នុងការទូទាត់ប្រាក់បំណាច់អតីតភាពការងារ ជៀសវាងការរក្សាទុកប្រាក់បំណាច់អតីតភាពរហូតដល់ពេលបញ្ឈប់កិច្ចសន្យា។ និងទីបី គឺដើម្បីលើកកម្ពស់ភាពសុខដុមរមនាក្នុងទំនាក់ទំនងវិជ្ជាជីវៈ ដោយកាត់បន្ថយការតវ៉ាទាមទារការទូទាត់ប្រាក់បំណាច់ផ្សេងៗ ក៏ដូចជាការកាត់បន្ថយការចំណាយរបស់រាជរដ្ឋាភិបាលក្នុងការចូលរួមដោះស្រាយជំនួសម្ចាស់រោងចក្រ សហគ្រាស ក្នុងករណីម្ចាស់រោងចក្រ សហគ្រាស រត់ចោលកម្មករនិយោជិត ជាយថាហេតុ។
សូមកត់សម្គាល់ថា ការធ្វើវិសោធនកម្មច្បាប់ការងារនេះ ធ្វើឡើងក្រោយពីកម្មករ-កម្មការិនីខ្មែរមួយចំនួនបានរងគ្រោះដោយសារតែថៅរោងចក្របានបិទរោងចក្ររត់ចោលជាបន្តបន្ទាប់។ តាមក្រសួងការងារ គិតមកដល់ពេលនេះ គឺមានរោចចក្រចំនួន១២ហើយដែលបានបិទទ្វារដោយមិនបានផ្តល់ប្រាក់ខែដល់កម្មករ-កម្មការិនី។ បន្ទុកនេះបានធ្លាក់មកលើរដ្ឋាភិបាលកម្ពុជា ដោយគ្រាន់តែរយៈពេល៥ខែកន្លងទៅនេះ រដ្ឋាភិបាលខ្មែរបានផ្តល់ថវិកាបុរេប្រទានចំនួន៦លាន២សែនដុល្លារ សម្រាប់បើកជូនកម្មករជិត៦ពាន់នាក់ ដែលត្រូវបានថៅកែបោះបង់ចោលព្រោះតែក្ស័យធន។
យ៉ាងណាក៏ដោយ ក្រសួងការងារបានគូសបញ្ជាក់ថា ករណីថៅកែរោងចក្ររត់ចោលកម្មករនេះ នឹងលែងក្លាយជាបញ្ហាគួរឲ្យព្រួយបារម្ភទៀតហើយ ។ លែងព្រួយបារម្ភ ព្រោះបើតាមអ្នកនាំពាក្យក្រសួងការងារ ក្រោយពីរដ្ឋសភាជាតិកម្ពុជាអនុម័តសេចក្ដីព្រាងវិសោធនកម្មច្បាប់ស្ដីពីការងារនេះរួច ផលប្រយោជន៍កម្មករ-កម្មការិនិខ្មែរទាំងអស់ដែលរងគ្រោះព្រោះថៅកែរត់ចោល នឹងត្រូវកាពារដោយច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ