កម្ពុជាស្នើឥណ្ឌូណេស៊ីអោយស្វែងរកការព្រមព្រៀងពីថៃអោយបានឆាប់លើបញ្ហាដកទ័ព
កម្ពុជាបានឆ្លើយព្រមព្រៀងជាថ្មីម្តងទៀតលើលក្ខខណ្ឌប្រតិបត្តិស្តីពីការដកកងទ័ពចេញពីតំបន់ព្រំដែនប្រាសាទព្រះវិហារ។ កម្ពុជាបានឆ្លើយព្រមព្រៀងយ៉ាងនេះ តាមរយៈលិខិតផ្លូវការមួយទៅរដ្ឋមន្ត្រីការបរទេសឥណ្ឌូណេស៊ីលោក Marty Natalegawaកាលពីថ្ងៃទី២៦មីនា។ ស្របពេលជាមួយគ្នា ប្រមុខការទូតកម្ពុជាលោកឧបនាយករដ្ឋមន្ត្រីហោ ណាំហុងបានស្នើឥណ្ឌូណេស៊ីឲ្យជួយជំរុញអោយមានការចុះហត្ថលេខាលើលក្ខខណ្ឌប្រតិបត្តិនេះអោយបានឆាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ប្រមុខការទូតកម្ពុជា លោកឧបនាយករដ្ឋមន្ត្រីហោ ណាំហុងបានស្នើរដ្ឋមន្ត្រីការបរទេសឥណ្ឌូណេស៊ីលោកMarty Natalegawa អោយធ្វើយ៉ាងណាពន្លឿនអោយមានការចុះហត្ថលេខាលើលក្ខខណ្ឌប្រតិបត្តិស្តីពីការដកកងទ័ព និងការពង្រាយអ្នកសង្កេតការណ៍ឥណ្ឌូណេស៊ី នៅក្នុងតំបន់ព្រំដែនប្រាសាទព្រះវិហារ។ សំណើរបស់លោកប្រមុខការទូតកម្ពុជាធ្វើឡើង នៅក្នុងលិខិតមួយដែលលោកផ្ញើទៅសមភាគីឥណ្ឌូណេស៊ី កាលពីថ្ងៃទី២៦មីនា។
អ្នកនាំពាក្យក្រសួងការបរទេសកម្ពុជាបានបញ្ជាក់ថា កម្ពុជាបានត្រៀមខ្លួនរួចហើយ ដើម្បីចុះហត្ថលេខាលើលក្ខខណ្ឌប្រតិបត្តិនោះ ដើម្បីឈានទៅរកការដកបុគ្គលិកយោធាអោយបានឆាប់ ស្របតាមដីកាបង្គាប់របស់តុលាការយុត្តិធម៌អន្តរជាតិ ថ្ងៃទី១៨កក្កដា២០១១។
គួរបញ្ជាក់ថា ក្រោយពីបានជួបពិភាក្សាជាមួយលោកហោ ណាំហុងនៅក្នុងរាជធានីភ្នំពេញនៅថ្ងៃទី៥មីនា រដ្ឋមន្ត្រីការបរទេសឥណ្ឌូណេស៊ី កាលពីពេលថ្មីៗនេះ បានផ្ញើខ្លឹមសារនៃលក្ខខណ្ឌប្រតិបត្តិ (Term of Reference) ដែលទំនងជាមានការកែប្រែថែមទៀតនោះ មកកម្ពុជា ដើម្បីអោយកម្ពុជាពិនិត្យ។ គឺនៅថ្ងៃទី២៦មីនាម្សិលមិញនេះ ដែលកម្ពុជា តំណាងដោយលោកឧបនាយករដ្ឋមន្ត្រីហោ ណាំហុងបានធ្វើលិខិតឆ្លើយតបទៅរដ្ឋមន្ត្រីឥណ្ឌូណេស៊ីដើម្បីបញ្ជាក់ថា កម្ពុជាព្រមព្រៀងលើខ្លឹមសារនៃលក្ខខណ្ឌប្រតិបត្តិស្តីពីការដកកងទ័ពចេញតំបន់ព្រំដែនប្រាសាទព្រះវិហារនេះហើយ ហើយថា កម្ពុជាស្នើអោយមានការចុះហត្ថលេខាអោយបានឆាប់ទៀតផង។
មានការវិវឌ្ឍន៍ជាវិជ្ជមានមួយនៅក្នុងដំណើរដកកងទ័ព និងពង្រាយអ្នកសង្កេតការណ៍ឥណ្ឌូណេស៊ី។ រដ្ឋមន្ត្រីការបរទេសឥណ្ឌូណេស៊ីកំពុងតែស្វែងរកការឯកភាពពីភាគីកម្ពុជា និងថៃលើលក្ខខណ្ឌប្រតិបត្តិ ខណៈដែលក្រុមការងារចម្រុះកម្ពុជាថៃរបស់គណៈកម្មាធិការព្រំដែនទូទៅបានកំណត់ថ្ងៃជួបពិភាក្សាការងារ នៅថ្ងៃទី៣ ដល់ថ្ងៃទី៥មេសាខាងមុខដ៏ខ្លីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ