ប្រមុខការទូតកម្ពុជា និងឥណ្ឌូណេស៊ីពិភាក្សាពីការត្រៀមបញ្ជូនអ្នកសង្កេតការណ៍
នៅព្រឹកថ្ងៃចន្ទទី ៥ មីនានេះ រដ្ឋមន្ត្រីការបរទេសកម្ពុជា និងឥណ្ឌូណេស៊ី បានពិភាក្សាជាថ្មីទៀត ពីការត្រៀមបញ្ជូនអ្នកសង្កេតការណ៍ឥណ្ឌូណេស៊ី ចុះទៅកាន់តំបន់ព្រំដែនកម្ពុជា-ថៃ នៅតំបន់គ្មានកងទ័ព ដែលកំណត់ដោយតុលាការយុត្តិធម៌អន្តរជាតិ ទីក្រុងឡាអេ។ ប៉ុន្តែប្រមុខការទូតទាំងពីរ មិនបានប្រកាសពីថ្ងៃខែ នៃការបញ្ជូនអ្នកសង្កេតការណ៍ ចុះទៅកាន់តំបន់ព្រំដែនឡើយ។ កិច្ចប្រជុំរវាងប្រមុខការទូតកម្ពុជា-ឥណ្ឌូនេស៊ី នៅទីក្រុងភ្នំពេញ ក៏បានពិភាក្សាពីទំនាក់ទំនងទ្វេភាគី កម្ពុជា-ឥណ្ឌូនេស៊ី ព្រមទាំងបញ្ហាកម្ពុជា ធ្វើជាប្រធានអាស៊ាន និងកិច្ចប្រជុំកំពូលអាស៊ាន នាពេលខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២៣
ក្នុងសន្និសីទកាសែត ដែលធ្វើឡើងនៅក្រោយកិច្ចប្រជុំ លោក ហោ ណាំហុង រដ្ឋមន្ត្រីការបរទេសកម្ពុជា បានលើកឡើងថា គណៈកម្មការទូទៅព្រំដែន ហៅកាត់ថា GBC របស់រដ្ឋមន្ត្រីការពារជាតិកម្ពុជា-ថៃ បានប្រជុំរួចហើយ និងបានសម្រេចបង្កើតក្រុមការងាររួម ដើម្បីកំណត់ថ្ងៃរៀបចំកងទ័ព នៅតំបន់គ្មានកងទ័ព នៅព្រំដែនប្រាសាទព្រះវិហារ តាមការកំនត់របស់តុលាការយុត្តិធម៌ទីក្រុងឡាអេ។ ក៏ប៉ុន្តែមកដល់ពេលនេះ ក្រុមការងាររួមនោះ មិនទាន់បានប្រជុំនៅឡើយ។ រដ្ឋមន្ត្រីការបរទេសកម្ពុជា និងឥណ្ឌូណេស៊ី យល់ថា បើការប្រជុំក្រុមការងារចម្រុះកម្ពុជា-ថៃ ដើម្បីកំណត់ថ្ងៃដកកងទ័ព បានឆាប់កាលណា គឺល្អកាលហ្នឹង ដើម្បីអ្នកសង្កេតការណ៍ឥណ្ឌូណេស៊ី អាចនឹងមកធ្វើការសង្កេតការណ៍នៅតំបន់នោះ។
រដ្ឋមន្ត្រីការបរទេសកម្ពុជា និងឥណ្ឌូណេស៊ី ក៏សង្ឃឹមថា ប្រទេសថៃ នឹងអាចកោះប្រជុំក្រុមការងារនេះ នៅពេលឆាប់ៗ ដើម្បីអាចចុះហត្ថលេខាលើឯកសារគោលការណ៍អនុវត្ត ហៅថា TOR ដើម្បីបញ្ជូនអ្នកសង្កេតការណ៍ឥណ្ឌូណេស៊ីមកតំបន់អត់កងទ័ពបណ្តោះអាសន្ន នៅព្រំដែនប្រាសាទព្រះវិហារ ព្រមទាំងចុះហត្ថលេខាលើកិច្ចព្រមព្រៀង ដាក់អ្នកសង្កេតការណ៍ឥណ្ឌូណេស៊ី។
លោកប្រមុខការទូត ហោ ណាំហុង បានគូសបញ្ជាក់ថា លោកក៏បានបញ្ជាក់ជូនរដ្ឋមន្ត្រីការបរទេសឥណ្ឌូណេស៊ី លោក ម៉ាទី ណាតាឡេហ្គាវ៉ា ថា អ្នកសង្កេតការណ៍ឥណ្ឌូណេស៊ី ពេលនេះ បានទទួលអាណត្តិពីរផ្នែក។ ទី១ ទទួលអាណត្តិពីអាស៊ានផង និងទី២ ទទួលអាណត្តិពីតុលាការយុត្តិធម៌អន្តរជាតិផង ហើយលោកហោណាំហុង ត្រៀមនឹងទៅចុះហត្ថលេខាលើកិច្ចព្រមព្រៀង TOR ទាំងនេះ នៅភ្នំពេញក៏បាន នៅបាងកកក៏បាន និងនៅឥណ្ឌូណេស៊ីក៏បាន។
ពាក់ព័ន្ធនឹងការបញ្ជូនអ្នកសង្កេតការណ៍ឥណ្ឌូណេស៊ី មកតំបន់គ្មានកងទ័ពនៅព្រំដែនកម្ពុជា-ថៃ ត្រូវបានរដ្ឋមន្ត្រីការបរទេសឥណ្ឌូណេស៊ី លោក ម៉ាទី ណាតាឡេហ្គាវ៉ា លើកឡើងថា លោកក៏បានផ្លាស់ប្តូរយោបល់ជាមួយរដ្ឋមន្ត្រីការបរទេសថៃផងដែរ។ លោកក៏បានទទួលការឆ្លើយតប ប្រកបដោយវិជ្ជមានពីភាគីកម្ពុជា និងពីភាគីថៃ។
ក៏ប៉ុន្តែឆ្លងកាត់កិច្ចពិភាក្សារបស់ប្រមុខការទូតកម្ពុជា និងឥណ្ឌូណេស៊ី នៅថ្ងៃនេះ មិនទាន់មានកាលបរិច្ឆេទជាក់លាក់ ពីការដកទ័ព និងបញ្ជូនអ្នកសង្កេតការណ៍ឥណ្ឌូណេស៊ី ចុះទៅកាន់តំបន់ព្រំដែនកម្ពុជាថៃនៅឡើយទេ។ ឥណ្ឌូណេស៊ី បានដើរតួយ៉ាងសំខាន់ ក្នុងការសម្របសម្រួលជម្លោះព្រំដែន រវាងកម្ពុជា និងថៃ ចាប់តាំងពីចុងឆ្នាំ២០០៨។
យ៉ាងណាក៏ដោយ ក្នុងកិច្ចប្រជុំនៅព្រឹកមិញ ប្រមុខការទូតកម្ពុជា និងឥណ្ឌូណេស៊ី ក៏បានលើកឡើងពីទំនាក់ទំនងទ្វេភាគី។ ឥណ្ឌូណេស៊ី នឹងពង្រីកការវិនិយោគនៅកម្ពុជា លើវិស័យកសិឧស្សាហកម្ម ជាពិសេស បង្កើតរោងចក្រ កិនស្រូវ ការហោះត្រង់ពីឥណ្ឌូណេស៊ី មកកម្ពុជា។ ឥណ្ឌូណេស៊ី ក៏នឹងពិចារណា លើការវិនិយោគខាងវិស័យទូរគមនាគមន៍នៅកម្ពុជាផងដែរ។
កម្ពុជា ធ្វើប្រធានអាស៊ាន ក៏ជាប្រធានបទនៃកិច្ចពិភាក្សារវាងរដ្ឋមន្ត្រីការបរទេសកម្ពុជា និងឥណ្ឌូណេស៊ី នៅព្រឹកមិញផងដែរ។ នោះគឺឥណ្ឌូណេស៊ី ដែលជាប្រធានអាស៊ាន កាលពីឆ្នាំ២០១១ បានត្រៀមខ្លួនជានិច្ច ដើម្បីជួយកម្ពុជា សម្រាប់រៀបចំកិច្ចប្រជុំអាស៊ាន នៅឆ្នាំនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ