កម្ពុជាប្តឹងទៅតុលាការយុត្តិធម៌អន្តរជាតិ សុំបកស្រាយសាលក្រម ឆ្នាំ១៩៦២
កាលពីថ្ងៃទី២៨មេសា រដ្ឋាភិបាលកម្ពុជា បានដាក់ពាក្យស្នើទៅតុលាការយុត្តិធម៌អន្តរជាតិ ដើម្បីសុំឲ្យបកស្រាយសាលក្រម ឆ្នាំ១៩៦២ ពាក់ព័ន្ធនឹងប្រាសាទព្រះវិហារ។ កម្ពុជាចាត់ទុក ការដាក់ពាក្យបណ្តឹងនេះថា ជាវិធានការបន្ទាន់ និងជាការចាំបាច់ ជៀសពុំបាន ដើម្បីឲ្យមានការឈប់បាញ់គ្នាជាអចិន្ត្រៃយ៍រវាងកម្ពុជាថៃ បញ្ឈប់ការបាត់បង់ជីវិតមនុស្ស ព្រមទាំងថែរក្សាប្រាសាទរបស់កម្ពុជា ឲ្យផុតពីការខូចខាតធ្ងន់ធ្ងរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
ការដាក់ពាក្យបណ្តឹងទៅកាន់តុលាការយុត្តិធម៌អន្តរជាតិ ទីក្រុងឡាអេ កាលពីថ្ងៃព្រហស្បតិ៍ ទី ២៨ មេសា ក៏ដោយសារតែមានការឈ្លានពានដោយអាវុធពីសំណាក់ប្រទេសថៃ ដើម្បីដណ្តើមទាមទារយកទឹកដីកម្ពុជា ដែលផ្អែកទៅតាមផែនទីឯកតោភាគីរបស់ថៃ ដែលគ្មានមូលដ្ឋានច្បាប់អ្វីសោះ។ នេះបើតាមសេចក្តីថ្លែងការណ៍របស់ក្រសួងការបរទេស។
សេចក្តីថ្លែងការណ៍ នៅថ្ងៃ២៩មេសានេះ លើកឡើងថា ជាមួយនឹងការស្នើសុំតុលាការទីក្រុងឡាអេ បកស្រាយសាលក្រមឆ្នាំ១៩៦២ លើបញ្ហាប្រាសាទព្រះវិហារ រដ្ឋាភិបាលកម្ពុជា ក៏បានស្នើសុំឲ្យតុលាការយុត្តិធម៌អន្តរជាតិ ចាត់វិធានការបន្ទាន់ ដោយយោងទៅលើការឈ្លានពានដោយចេតនា ម្តងហើយ ម្តងទៀតរបស់កម្លាំងប្រដាប់អាវុធប្រទេសថៃ មកលើទឹកដីកម្ពុជា។
តាមសេចក្តីថ្លែងការណ៍ ដើម្បីឲ្យមានការឈប់បាញ់គ្នាជាអចិន្ត្រៃយ៍រវាងប្រទេសទាំងពីរ បញ្ឈប់ការបាត់បង់ជីវិតមនុស្ស ព្រមទាំងថែរក្សាប្រាសាទរបស់កម្ពុជា ឲ្យផុតពីការខូចខាតធ្ងន់ធ្ងរ រហូតដល់មានការបកស្រាយសាលក្រមតុលាការយុត្តិធម៌អន្តរជាតិ ឆ្នាំ១៩៦២ ស្តីពីប្រាសាទព្រះវិហារ។ ម្យ៉ាងទៀត ការបកស្រាយសាលក្រមតុលាការយុត្តិធម៌អន្តរជាតិ ឆ្នាំ១៩៦២ ក៏ជាការចាំបាច់បំផុតដើម្បីដោះស្រាយដោយសន្តិវិធី និងជាស្ថាពរ នូវបញ្ហាព្រំដែនរវាងកម្ពុជា-ថៃ នៅតំបន់ប្រាសាទព្រះវិហារ។
សាលក្រមរបស់តុលាការយុត្តិធម៌អន្តរជាតិ ទីក្រុងឡាអេ ចុះថ្ងៃទី១៥មិថុនា ឆ្នាំ១៩៦២ បាន សម្រេចលើ ៣ ចំណុច ស្តីពីបញ្ហាប្រាសាទព្រះវិហារ។ ទី១- ដោយមានសំឡេង ៩ ទល់នឹង ៣ សម្រេចថា ប្រាសាទព្រះវិហារស្ថិតក្នុងទឹកដី ក្រោមអធិបតេយ្យរបស់ប្រទេសកម្ពុជា។ ទី២-ដោយមានសំឡេង ៩ ទល់នឹង ៣ សម្រេចថា ប្រទេសថៃមានកាតព្វកិច្ចដកកងកម្លាំងទ័ព ឬប៉ូលីស ឬអ្នកថែរក្សា ឬឆ្មាំដទៃទៀត ដែលថៃបានដាក់ក្នុងប្រាសាទ ឬក្នុងតំបន់ក្បែរប្រាសាទ ដែលស្ថិតក្នុងទឹកដីកម្ពុជា និងចំណុចទី៣-ដោយមានសំឡេង ៧ ទល់នឹង ៥ តុលាការអន្តរជាតិទីក្រុងឡាអេ បានសម្រេចថា ប្រទេសថៃមានកាតព្វកិច្ចប្រគល់មកឲ្យប្រទេសកម្ពុជាវិញនូវវត្ថុទាំងឡាយ ដែលថៃបានយកចេញពីប្រាសាទ ឬតំបន់ប្រាសាទ ចាប់តាំងពីថៃចូលកាន់កាប់ប្រាសាទព្រះវិហារ នៅឆ្នាំ១៩៥៤។
សាលក្រមតុលាការទីក្រុងឡាអេ ក៏មាននិយាយដល់ផែនទី ដែលបានកំណត់ច្បាស់ពីដែនដី លើខ្នងភ្នំដងរែករវាងកម្ពុជា និងថៃ ពិសេសនៅចំណុចប្រាសាទព្រះវិហារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ