មន្ត្រីបក្សប្រឆាំងស្នើរដ្ឋាភិបាលពន្យារអនុវត្តច្បាប់ចរាចរណ៍ថ្មី ក្រោយរងការរិះគន់ពីពលរដ្ឋ
គិតមកដល់ពេលនេះ គឺជាថ្ងៃទី៤ ហើយដែលនគរបាលចរាចរណ៍ផ្លូវគោកបានចាប់ផ្តើមប្រតិបត្តិការចុះត្រួតពិនិត្យ និង ផាកពិន័យយានយន្តគ្រប់ប្រភេទតាមច្បាប់ចរាចរណ៍ផ្លូវគោកថ្មី។ ទោះបីទើបនឹងចាប់អនុវត្តក្តី ប៉ុន្តែប្រជាពលរដ្ឋដែលជាអ្នកប្រើប្រាស់ផ្លូវមួយចំនួនបានសម្តែងការមិនពេញចិត្ត និង រិះគន់ ហើយសូម្បីប្អូនស្រីបង្កើតរបស់នាយករដ្ឋមន្ត្រីក៏បានប្រតិកម្មនឹងច្បាប់ថ្មីនេះដែរ។ ប្រឈមការិះគន់ទាំងនេះ តំណាងរាស្ត្រគណបក្សសង្គ្រោះជាតិ បានស្នើឲ្យរដ្ឋាភិបាលកម្ពុជា ពន្យារការអនុវត្តច្បាប់ថ្មីនេះសិន ដើម្បីទុកពេលផ្សព្វផ្សាយ និង អប់រំបន្ថែមពីច្បាប់នេះដល់ប្រជាពលរដ្ឋ។
ចុះផ្សាយនៅថ្ងៃ៖
ស្តាប់ - ០២:៣៥
ប្រតិកម្មជុំវិញការអនុវត្តច្បាប់ចរាចរណ៍ផ្លូវគោកថ្មីដែលទើបនឹតែងចាប់អនុវត្ត បានកើតឡើងជាបន្តបន្ទាប់។ ប្រជាពលរដ្ឋ ជាពិសេសអ្នកប្រើប្រាស់បណ្តាញសង្គមមួយចំនួន បានរិះគន់ខ្លាំងៗទៅនឹងតម្លៃនៃការផាកពិន័យ ការដាក់ទោសទណ្ឌរហូតដល់ត្រូវជាប់ពន្ធនាគារ និង ការតម្រូវឲ្យត្រូវតែដាក់តាមខ្លួននូវបណ្ណសម្គាល់យានយន្តជាដើម។
មិនត្រឹមតែពលរដ្ឋធម្មតាទេដែលប្រតិកម្មនឹងការអនុវត្តច្បាប់នេះ សូម្បីលោកស្រី ហ៊ុន ស៊ីណាត ប្អូនស្រីរបស់លោកនាយករដ្ឋមន្ត្រីហ៊ុន សែន ក៏ចេញប្រតិកម្មផងដែរ។ តាមរយៈសំណេរនៅលើទំព័រហ្វេសប៊ុកកាលពីថ្ងៃទី០៣ មករា លោកស្រីហ៊ុន ស៊ីណាត បានសរសេរថា ប្រសិនបើចង់រិតបន្តឹងច្បាប់ ដើម្បីកាត់បន្ថយគ្រោះថ្នាក់ចរាចរ គឺគួរតែចាប់ផ្តើមចេញពីសណ្តាប់ធ្នាប់នៃការបើកបរនិងការចតយានជំនិះគ្មានសណ្តាប់ធ្នាប់នៅលើតាមដងវិថីនានា មិនមែនចែងច្បាប់ចេញមកយកការផាកពិន័យជាប្រាក់ច្រើនបែបនេះឡើយ ។ លោកស្រីហ៊ុន ស៊ីណាត បានចោទជាសំណួរថា តើច្បាប់បង្កើតឡើងដើម្បីជួយការពាររាស្ត្រ ឬធ្វើបាបរាស្ត្រ?? ជាមួយនឹងការលើកឡើងទាំងនេះ លោកស្រីក៏បានស្នើដល់ថ្នាក់ដឹកនាំឲ្យត្រួតពិនិត្យច្បាប់ចរាចរណ៍ថ្មីនេះឡើងវិញ។
លោកម៉ៅ មុនីវណ្ណ តំណាងរាស្ត្រគណបក្សសង្គ្រោះជាតិ និង ជាអនុប្រធានគណៈកម្មការសាធារណការ និង ដឹកជញ្ជូននៃរដ្ឋសភា បានលើកឡើងថា មូលហេតុដែលប្រជាពលរដ្ឋមិនសប្បាយចិត្តនឹងច្បាប់ចរាចរណ៍ថ្មី គឺដោយសារពួកគេមិនទាន់យល់ច្បាស់ពីច្បាប់ថ្មីនេះ ព្រោះកង្វះការផ្សព្វផ្សាយបានទូលំទូលាយដល់ពួកគេ។ ប្រឈមមុខនឹងបញ្ហានេះ លោកម៉ៅ មុនីវណ្ណ បានស្នើឲ្យរដ្ឋាភិបាលពន្យារការអនុវត្តច្បាប់ចរារចណ៍ថ្មីនេះសិន ដើម្បីទុកពេលផ្សព្វផ្សាយបន្ថែមឲ្យបានកាន់តែទូលំទូលាយទៅដល់ប្រជាពលរដ្ឋ។
ជាការឆ្លើយតប លោករុន រ័ត្នវាសនា ប្រធាននាយកដ្ឋាននគរបាលចរាចរណ៍ និង សណ្តាប់ធ្នាប់សាធារណៈនៃក្រសួងមហាផ្ទៃ បានបញ្ជាក់ថា ការអនុវត្តច្បាប់ចរាចរណ៍ថ្មីនៅតែបន្តដដែល ព្រោះថាច្បាប់ចរាចរណ៍នេះ ត្រូវបានផ្សព្វផ្សាយមួយឆ្នាំមកហើយមុននឹងអនុវត្តដែលលោកចាត់ទុកថា ជាការគ្រប់គ្រាន់។ បើតាមលោករុន រ័ត្នវាសនា នគរបាលចរាចរណ៍មិនមែនគិតតែពីការផាកពិន័យនោះទេ ប៉ុន្តែក៏បានអប់រំ និង ផ្សព្វផ្សាយច្បាប់នេះដល់ពលរដ្ឋក្នុងពេលជាមួយគ្នាផងដែរ។
សូមបញ្ជាក់ថា មកដល់ពេលនេះ គឺជាថ្ងៃទី៤ហើយនៃការចាប់ផ្តើមអនុវត្តច្បាប់ចរាចរណ៍ថ្មីរបស់នគរបាលចរាចរណ៍ ។ នៅក្នុងរយៈពេលបីថ្ងៃ ចាប់ពីថ្ងៃទី១ ដល់ថ្ងៃទី៣ ខែមករា កន្លងទៅនេះ នគរបាលចរាចរណ៍ផ្លូវគោកបានរកឃើញយានយន្តល្មើសច្បាប់ចំនួនជាង២ម៉ឺន៣ពាន់គ្រឿង ក្នុងនោះនៅថ្ងៃទី១ នៃការចាប់ផ្តើមអនុវត្តច្បាប់ គឺបានឃាត់យានយន្តល្មើសច្បាប់ចំនួនជាង៧ពាន់៥រយគ្រឿង។ ចំណែកថ្ងៃទីពីរ ឃាត់បានចំនួនជាង៧ពាន់៩រយគ្រឿង។ ដោយឡែកនៅថ្ងៃទីបី នគរបាលចរាចរណ៍បានរកឃើញយានយន្តល្មើសនៅតាមដងផ្លូវមានចំនួនជាង ៨ពាន់គ្រឿង ហើយព្រមទាំងធ្វើការផាកពិន័យជាទឹកប្រាក់ជាង៩០លានរៀលទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ