សង្គមស៊ីវិលសាទរការរឹតបន្តឹងច្បាប់ចរាចរណ៍ថ្មី តែស្នើអាជ្ញាធរអនុវត្តឲ្យបានជាប់លាប់
ការរឹតបន្តឹងការអនុវត្តច្បាប់ចរាចរណ៍ ចាប់ផ្ដើមហើយ នៅដើមខែមករា ឆ្នាំ២០១៦នេះ ដោយមានការដាក់ពង្រាយកងកម្លាំងសមត្ថកិច្ចជាង១ពាន់នាក់ នៅតាមគោលដៅប្រមាណ១៧០កន្លែង ទូទាំងប្រទេស។ អង្គការសង្គមស៊ីវិល ដែលធ្វើការពាក់ព័ន្ធនឹងបញ្ហាចរាចរណ៍ បានសម្ដែងការសាទរចំពោះវិធានការនេះ ប៉ុន្តែស្នើអាជ្ញាធរអនុវត្តឲ្យបានជាប់លាប់ ដើម្បីកាត់បន្ថយឲ្យបាន អត្រាគ្រោះថ្នាក់ចរាចរណ៍នៅកម្ពុជា។
ចុះផ្សាយនៅថ្ងៃ៖
ស្តាប់ - ០១:៥៧
ការរឹតបន្តឹងការអនុវត្តច្បាប់ចរាចរណ៍ផ្លូវគោកថ្មី ដែលអាជ្ញាធរបានចាប់ផ្ដើមធ្វើនៅដើមឆ្នាំ២០១៦នេះ បានទទួលការអបអរសាទរពីសំណាក់សាធារណជនទូទៅ។ ដោយឡែក វិទ្យាស្ថានសុវត្ថិភាពចរាចរណ៍ ក៏បានសាទរចំពោះចំណាត់ការនេះដែរ។ លោក អ៊ា ចរិយា នាយកវិទ្យាស្ថាននេះ មានសុទិដ្ឋិនិយមថា ការរឹតបន្តឹងការអនុវត្តច្បាប់ចរាចរណ៍ផ្លូវគោកថ្មីនាពេលនេះ អាចនឹងជួយកាត់បន្ថយអត្រាគ្រោះថ្នាក់ចរាចរណ៍នៅកម្ពុជាបានល្អប្រសើរជាងឆ្នាំកន្លងទៅ។ ប៉ុន្តែយ៉ាងណាក៏ដោយ លោក អ៊ា ចរិយា ស្នើឲ្យស្នើឲ្យអាជ្ញាធរធ្វើការរឹតបន្តឹងការអនុវត្តច្បាប់ចរាចរណ៍នេះ ឲ្យបានជាប់លាប់ផងដែរ ដើម្បីធានាឲ្យបាននូវប្រសិទ្ធិភាពខ្ពស់។
លោក រុន រ័ត្នវាសនា ប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ នៃអគ្គស្នងការនគរបាលកម្ពុជា បានហៅការអំពាវនាវរបស់សង្គមស៊ីវិលថា ជាការចូលរួមឲ្យការអនុវត្តច្បាប់ចរាចរណ៍ផ្លូវគោកថ្មី មានប្រសិទ្ធិភាពកាន់តែខ្ពស់។ ប៉ុន្តែបើតាមលោក រុន រ័ត្នវាសនា សមត្ថកិច្ចបានដាក់ពង្រាយកងកម្លាំងប្រមាណ១ពាន់នាក់ នៅតាមគោលដៅជាង១៧០កន្លែងទូទាំងប្រទេស។ ហើយកងកម្លាំងសមត្ថកិច្ចទាំងនេះ នឹងធ្វើការរឹតបន្តឹងការអនុវត្តច្បាប់ចរាចរណ៍ឲ្យបានដូចភ្លៀងរលឹម មិនឲ្យដាច់រយៈនោះទេ។ បើតាមលោក រុន រ័ត្នវាសនា ប្រជាពលរដ្ឋមិនត្រូវខ្លាចរអារចំពោះការអនុវត្តច្បាប់ចរាចរណ៍ផ្លូវគោកថ្មីនេះទេ។ លោកអំពាវនាវឲ្យអ្នកប្រើប្រាស់ដងផ្លូវ ចូលរួមគោរពច្បាប់ទាំងអស់គ្នា ព្រោះការគោរពច្បាប់នេះហើយ ដែលអាចជួយកាត់បន្ថយគ្រោះថ្នាក់ចរាចរណ៍នៅកម្ពុជាបាន។
គួរជម្រាបជូនថា បញ្ហាគ្រោះថ្នាក់ចរាចរណ៍ បានក្លាយទៅជាឃាតករដ៏សាហាវ ដែលបានសម្លាប់មនុស្សជាង២ពាន់នាក់ នៅក្នុងឆ្នាំ២០១៥កន្លងទៅ។ ភាគច្រើននៃគ្រោះថ្នាក់ចរាចរណ៍ដែលកើតឡើងនៅក្នុងឆ្នាំ២០១៥កន្លងទៅនោះ កើតឡើងដោយសារតែការបើកបរលើសល្បឿនកំណត់ ការមិនគោរពសិទ្ធិអាទិភាព មិនប្រកាន់ស្ដាំ ការបើកបរប្រជែង និងការបើកបរដោយស្រវឹងជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ