គណបក្សហ្វ៊ុនស៊ិនប៉ិចប្រកាសគាំទ្រការធ្វើវិសោធនកម្មរដ្ឋធម្មនុញ្ញរបស់រដ្ឋាភិបាលកម្ពុជា
គណបក្សហ្វ៊ុនស៊ិនប៉ិច តាមរយៈអ្នកនាំពាក្យបានអះអាងប្រាប់វិទ្យុបារាំងអន្តរជាតិថា គណបក្សរាជានិយមមួយនេះគាំទ្រចំពោះការធ្វើវិសោធនកម្មរដ្ឋធម្មនុញ្ញ និងការកំណត់ឲ្យមានច្បាប់ដាក់ទោសទណ្ឌអ្នកប្រមាថព្រះមហាក្សត្រ។ ការអះអាងនេះ ធ្វើឡើងក្រោយពីរដ្ឋាភិបាលកម្ពុជាបានអនុម័តលើសេចក្តីព្រាងវិសោធនកម្មទាំងពីរនេះកាលពីថ្ងៃសុក្រ ហើយគ្រោងនឹងបញ្ជូនទៅកាន់រដ្ឋសភាជាតិនៅសប្តាហ៍ក្រោយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
មូលហេតុដែលគណបក្សរាជានិយមហ្វ៊ុនស៊ិនប៉ិច គាំទ្រនូវសេចក្តីព្រាងវិសោធនកម្មរដ្ឋធម្មនុញ្ញ គឺព្រោះថា គណបក្សមួយនេះ តែងតែប្រកាន់នូវគោលការណ៍គិតផលប្រយោជន៍ជាតិ និងប្រជាជនកម្ពុជាជាធំ ក៏ដូចជាផលប្រយោជន៍ដល់រដ្ឋាភិបាល ដោយមិនគិតផលប្រយោជន៍បក្សជាធំឡើយ។ នេះបើតាមការអះអាងរបស់លោកញ៉េប ប៊ុនជិន អ្នកនាំពាក្យគណបក្សហ្វ៊ុនស៊ិនប៉ិច។ ចំណែកចំពោះសេចក្តីព្រាងវិសោធនកម្មក្រមព្រហ្មទណ្ឌកម្ពុជាដែលចែងកំណត់ឲ្យមានទោសទណ្ឌចំពោះអ្នកប្រមាថព្រះមហាក្សត្រវិញ លោកញ៉េប ប៊ុនជិន សង្កត់ធ្ងន់ថា គណបក្សហ្វ៊ុនស៊ិនប៉ិចចង់ឲ្យមានច្បាប់នេះជាយូរមកហើយ ដើម្បីការពារដល់ស្ថាប័នព្រះមហាក្សត្រ។ ជារួមមក បើតាមលោកញ៉េប ប៊ុនជិន គណបក្សហ្វ៊ុនស៊ិចប៉ិចមានការពេញចិត្តយ៉ាងខ្លាំងចំពោះសេចក្តីព្រាងវិសោធនកម្មទាំងពីរនេះ។
សេចក្តីព្រាងវិសោធនកម្មរដ្ឋធម្មនុញ្ញ និងសេចក្តីព្រាងវិសោធនកម្មក្រមព្រហ្មទណ្ឌកម្ពុជាត្រូវបានរដ្ឋាភិបាលសម្រេចអនុម័តកាលពីថ្ងៃទី២កុម្ភៈកន្លងទៅ។ សម្រាប់សេចក្តីព្រាងវិសោធនកម្មរដ្ឋធម្មនុញ្ញ រដ្ឋាភិបាលកម្ពុជាបានកែពាក្យ និងបន្ថែមអត្ថន័យខ្លះៗដោយកំណត់ថាគណបក្សនយោបាយ និងប្រជាពលរដ្ឋកម្ពុជាគ្រប់រូបត្រូវតម្កល់ផលប្រយោជន៍ជាតិជាធំ។ មួយវិញទៀតក៏កំណត់ឡើងវិញដែរថា សមាសភាពរាជរដ្ឋាភិបាលមានត្រឹមតែនាយករដ្ឋមន្រ្តី ឧបនាយករដ្ឋមន្រ្តី ទេសរដ្ឋមន្រ្តី និងរដ្ឋមន្រ្តី។ ចំណែកសេចក្តីព្រាងវិសោធនកម្មក្រមព្រហ្មទណ្ឌវិញ រដ្ឋាភិបាលបានកំណត់ដាក់ទោសទណ្ឌពី១ទៅ៥ឆ្នាំនៅក្នុងពន្ធនាគារចំពោះជនណាដែលជេរប្រមាថព្រះមហាក្សត្រ។
ទីស្តីការគណៈរដ្ឋមន្រ្តីកម្ពុជាគ្រោងនឹងបញ្ចូនសេចក្តីព្រាងវិសោធនកម្មទាំងពីរនេះទៅកាន់រដ្ឋសភាជាតិ ដើម្បីពិភាក្សានិងអនុម័តនៅរវាងថ្ងៃទី៧ និងទី៨ ខែកុម្ភៈខាងមុខនេះ។ អ្នកនាំពាក្យទីស្តីការគណៈរដ្ឋមន្រ្តីកម្ពុជាលោកផៃ ស៊ីផាន បានអះអាងប្រាប់វិទ្យុបារាំងនៅថ្ងៃអាទិត្យនេះថា សេចក្តីព្រាងវិសោធនកម្មទាំងពីរនេះត្រូវធ្វើឡើងជាប្រញាប់។ ជាប្រញាប់ គឺដើម្បីឆាប់បានដាក់ឲ្យអនុវត្ត និង ដើម្បីធ្វើឲ្យបានមុនការបោះឆ្នោតព្រឹទ្ធសភានៅចុងខែកុម្ភៈនេះ។ ដូច្នេះហើយលោកផៃ ស៊ីផាន សង្ឃឹមយ៉ាងមុតមាំថា សេចក្តីព្រាងវិសោធនកម្មទាំងពីរអាចនឹងឆ្លងសភា ហើយអាចប្រកាសឲ្យប្រើប្រាស់ក្នុងពេលឆាប់ខាងមុខនេះ។
ចំណែកអ្នកនាំពាក្យរដ្ឋសភាលោកឡេង ប៉េងឡុងវិញ បានគូសបញ្ជាក់ឲ្យដឹងដែរថា មកដល់ពេលនេះ រដ្ឋសភាកំពុងតែរង់ចាំនូវសេចក្តីព្រាងវិសោធនកម្មទាំងពីរ។ លោកថា រដ្ឋសភាជាតិបានត្រៀមរួចរាល់អស់ហើយៗប្រសិនបើសេចក្តីព្រាងវិសោធនកម្មទាំងពីរមកដល់រដ្ឋសភានៅពេលណានោះ រដ្ឋសភានឹងបើកកិច្ចប្រជុំភា្លមៗតែម្តង ព្រោះថាសេចក្តីព្រាងវិសោធនកម្មទាំងនេះត្រូវធ្វើជាប្រញាប់។ យ៉ាងណាក៏ដោយលោកមិនអាចប៉ាន់ស្មានបានទេ ថាតើរដ្ឋសភានឹងចំណាយពេលប៉ុនណាដើម្បីពិភាក្សា និងអនុម័តនោះ។ ក៏ប៉ុន្តែលោកផៃ ស៊ីផាន ជឿជាក់១០០ភាគរយថា រដ្ឋសភានឹងអនុម័តទាំងស្រុងដោយគ្មានមតិណាមួយជំទាស់នោះទេ បើទោះបីត្រូវការសំឡេងដល់ទៅ២ភាគ៣នៃសមាជិករដ្ឋសភាទាំងអស់ក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ