លោកហ៊ុន សែនថា បើអ្នកគាំទ្រអតីតបក្សប្រឆាំងទៅបោះឆ្នោតកាន់តែតិចគឺកាន់តែហុចផលល្អដល់បក្សកាន់អំណាច
នៅក្នុងជំនួបជាមួយកម្មករ-កម្មការិនីក្នុងខេត្តកំពង់ស្ពឺនាព្រឹកថ្ងៃពុធនេះ លោកនាយករដ្ឋមន្ត្រីហ៊ុន សែន បានអះអាងជាថ្មីថា ការអំពាវនាវឲ្យពលរដ្ឋកុំទៅបោះឆ្នោត គឺជាការបំពានសិទ្ធិរបស់ពលរដ្ឋ។ ទោះជាបែបនេះក្តីលោកប្រមុខបក្សកាន់អំណាចក៏បានគូសបញ្ជាក់ដែរថា ប្រសិនបើអ្នកគាំទ្រអតីតបក្សសង្គ្រោះជាតិទៅបោះឆ្នោតកាន់តែតិចនោះ គឺនឹងផ្តល់លទ្ធផលកាន់តែល្អដល់បក្សរបស់លោកក្នុងការឈ្នះឆ្នោត។ ប៉ុន្តែលោកអះអាងថា លោកមិនចង់បានបែបនេះឡើយ។
ចុះផ្សាយនៅថ្ងៃ៖
ស្តាប់ - ០២:១៩
លោកនាយករដ្ឋមន្ត្រីហ៊ុន សែន មានប្រសាសន៍ដូច្នេះថា៖“បើនិយាយពីបច្ចេកទេសនៃអ្នកបោះឆ្នោត ខ្ញុំគួរតែរុញទូកបណ្តោយទឹកឲ្យអ្នកតែម្តងទៅ ផ្តាំផ្ញើទៅអ្នក ពួកអ្នកប្រឆាំងទៅកាន់តែតិច សន្លឹកឆ្នោតកាន់តែល្អសម្រាប់គណបក្សកាន់អំណាច អាហ្នឹងនិយាយឲ្យពិត ប៉ុន្តែខ្ញុំមិនចង់ធ្វើបញ្ហាហ្នុងទេ ខ្ញុំចង់ឲ្យប្រជាពលរដ្ឋចេះប្រើសិទ្ធិ។ លោកនាយករដ្ឋមន្ដ្រី ហ៊ុន សែន អះអាងបន្ថែមទៀតថា សមាជិកគណបក្សប្រជាជនកម្ពុជារបស់លោកមានចំនួនដល់ទៅជាង៥លាននាក់ ដែលវាសមល្មមឲ្យគណបក្សកាន់អំណាចទទួលបានលទ្ធផលល្អនៅក្នុងការបោះឆ្នោតនាពេលខាងមុខ។ បន្ថែមលើនេះ លោកនាយករដ្ឋមន្ត្រីក៏បានលើកឡើងដែរថា ការទទួលស្គាល់លទ្ធផលបោះឆ្នោត គឺមិនមានច្បាប់ណាកំណត់ថា ទាល់តែមានចំនួនអ្នកបោះឆ្នោតប៉ុណ្ណេះឬប៉ុណ្ណោះនោះឡើយ។
ការអះអាងរបស់លោកនាយករដ្ឋមន្ត្រីហ៊ុន សែននេះ គឺជាការឆ្លើយតបទៅនឹងលោកសម រង្ស៊ី ដែលយកប្រទេសកម្ពុជាទៅប្រដូចនឹងប្រទេសវេណេស៊ុយអេឡាអំពីរឿងបោះឆ្នោត។ លោកសម រង្ស៊ី តាមរយៈហ្វេសប៊ុកកាលពីថ្ងៃទី២២ ឧសភា បានបង្ហាញពីលទ្ធផលនៃការបោះឆ្នោតនៅប្រទេសវេណេស៊ុយអេឡាដែលមានអ្នកបោះឆ្នោតតែ៤៧ភាគរយ ហើយអ្នកមិនទៅបោះឆ្នោតមានចំនួនប្រមាណ៥៣ភាគរយ។ លោកសម រង្ស៊ី បានចាត់ទុកថា វាគឺជោគជ័យដែលកើតចេញមកពីការអំពាវនាវបក្សប្រឆាំងវេណាស៊ុយអេឡាឲ្យពលរដ្ឋធ្វើពហិការការបោះឆ្នោត។ សម្រាប់លោកសម រង្ស៊ី ទិដ្ឋភាពបែបនេះក៏នឹងកើតមាននៅប្រទេសកម្ពុជាដែរ គឺនៅក្រោយការបោះឆ្នោតជាតិថ្ងៃទី២៩ កក្កដា ដែលលោកថាសហគមន៍អន្តរជាតិនឹងច្រានចោលលទ្ធផលបោះឆ្នោតហើយភ្ជាប់ជាមួយនឹងទណ្ឌកម្មថែមទៀត។
ក៏ប៉ុន្តែលោកហ៊ុន សែន បានប្រាប់ទៅលោកសម រង្ស៊ីវិញថា កុំយកកម្ពុជាទៅប្រៀបធៀបនឹងវេណេស៊ុយអេឡា ព្រោះស្ថានភាពមិនដូចគ្នាឡើយ។ លោកនាយករដ្ឋមន្ត្រីបកស្រាយថា សមាជិកគណបក្សប្រជាជនកម្ពុជារបស់លោកដែលមានជាង៥លាននាក់ គឺជាចំនួនមួយជាងពាក់កណ្តាលនៃចំនួនអ្នកដែលមានឈ្មោះទៅបោះឆ្នោតទៅហើយ។ ដូច្នេះតាមរយៈនេះ ភាគរយនៃអ្នកទៅបោះឆ្នោតនឹងលើសពីពាក់កណ្តាលដែលខុសពីវេណេស៊ុយអេឡា បើទោះបីថ្នាក់ដឹកនាំអតីតបក្សប្រឆាំងអំពាវនាវឲ្យពលរដ្ឋកុំទៅបោះឆ្នោតក៏ដោយ។ ទោះជាបែបនេះក្តី លោកហ៊ុន សែន ហៅការអំពាវនាវនេះថា ជាការបំពានសិទ្ធិរបស់ប្រជាពលរដ្ឋហើយលោកជឿជាក់ថា ពលរដ្ឋខ្មែរនឹងមិនធ្វើតាមការអំពាវនាវនេះដោយបោះបង់សិទ្ធិរបស់ខ្លួនទេ។ ផ្ទុយមកវិញពួកគេនឹងទៅបោះឆ្នោតនៅថ្ងៃទី២៩ ខែកក្កដា ឆ្នាំ២០១៨ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ