លោករៀល ខេមរិន្ទ្រ៖ ទោះបីមានការរារាំង តែពលរដ្ឋនឹងជំនះទៅឲ្យដល់បង្គោលព្រំដែន
បើគ្មានអ្វីប្រែប្រួលទេ នៅព្រឹកថ្ងៃអាទិត្យស្អែកនេះ ក្រុមប្រជាពលរដ្ឋ យុវជន និងព្រះសង្ឃ ដឹកនាំដោយលោករៀល ខេមរិន្រ្ទ តំណាងរាស្ត្រគណបក្សសង្គ្រោះជាតិ នឹងធ្វើដំណើរទៅកាន់ខេត្តស្វាយរៀង ដើម្បីពិនិត្យមើលជាថ្មីបង្គោលព្រំដែនលេខ២០២ និង ២០៣ ។ លោករៀល ខេមរិន្ទ្រ បានថ្លែងប្រាប់វិទ្យុបារាំងអន្តរជាតិថា ទោះបីមានការរារាំង តែក្រុមប្រជាពលរដ្ឋនឹងជំនៈទៅឲ្យដល់ចំណុចបង្គោលព្រំដែន ដើម្បីពិនិត្យមើលបានជាក់ស្តែង។
ចុះផ្សាយនៅថ្ងៃ៖
ស្តាប់ - ០១:៤២
លោករៀល ខេមរិន្ទ្រ បានបញ្ជាក់ថា ក្រុមប្រជាពលរដ្ឋដែលគ្រោងធ្វើដំណើរទៅខេត្តស្វាយរៀងនៅថ្ងៃស្អែកនេះ គឺចង់ទៅមើលដល់បង្គោលព្រំដែនកម្ពុជា វៀតណាមលេខ២០២ និង២០៣ ផ្ទាល់ទាំងអស់គ្នាតែម្តង។ តាមគម្រោង តំណាងរាស្ត្ររូបនេះ នឹងដឹកនាំក្រុមប្រជាពលរដ្ឋ យុវជន និង ព្រះសង្ឃចំនួនជាង២ពាន់នាក់ចុះទៅពិនិត្យមើលចំណុចព្រំដែនកម្ពុជា វៀតណាម នៅក្នុងភូមិគោកធ្លក ឃុំត្នោត ស្រុកកំពង់រោទិ៍ ខេត្តស្វាយរៀង។
អាជ្ញាធរខេត្តស្វាយរៀង បានអនុញ្ញាតឲ្យប្រជាពលរដ្ឋត្រឹម១០០នាក់ប៉ុណ្ណោះ ចូលទៅដល់ចំណុចនោះ។ ចំណុចដែលធ្លាប់បានប៉ះទង្គិះគ្នាម្តងរួចមកហើយរវាងពលរដ្ឋកម្ពុជា និងវៀតណាម កាលពីថ្ងៃទី២៨ មិថុនាកន្លងទៅដោយបណ្តាលឲ្យរងរបួសទាំងសងខាង។ លោករៀល ខេមរិន្ទ្រ បានសង្កត់ធ្ងន់ថា បើមើលពីចម្ងាយដូចអាជ្ញាធរខេត្តកំណត់នោះ វាប្រៀបដូចជាមើលតាមរយៈផែនទីដូច្នេះដែរ។ លោកក៏បានបញ្ជាក់ដែរថា បន្ទាប់ចុះទៅពិនិត្យរួច លោកនឹងរាយការណ៍ទៅរដ្ឋាភិបាល និងរដ្ឋសភាជាតិ ដើម្បីបញ្ជាក់ថា វៀតណាមគោរពតាមការ
ព្រមព្រៀងគ្នាជាមួយកម្ពុជាដូចនៅក្នុងកិច្ចប្រជុំបញ្ហាព្រំដែនឫយ៉ាងណា។
គួរបញ្ជាក់ថា គម្រោងចុះទៅពិនិត្យមើលបង្គោលព្រំដែនកម្ពុជា វៀតណាមពីសំណាក់តំណាងរាស្ត្រគណបក្សសង្គ្រោះជាតិ ព្រះសង្ឃ និងយុវជននេះ គឺបន្ទាប់ពីក្រុមការងារពិសេសកម្ពុជា វៀតណាមចុះទៅដល់ទីនោះដែរកាលពីថ្ងៃទី១៦ កក្កដា ដើម្បីអង្កេតស្រាវជ្រាវពីអំពើហិង្សារវាងពលរដ្ឋកម្ពុជា និងវៀតណាម។ ក្រុមការងារពិសេសបានឯកភាពគ្នាលើបញ្ហាចំនួន ធំៗ ដែលរួមមាន ការប្តេជ្ញាមិនឲ្យមានការប៉ះទង្គិចគ្នា ដូចកាលពីថ្ងៃទី ២៨មិថុនា ឆ្នាំ ២០១៥ សារជាថ្មី។ និងឯកភាពគោរពរួមគ្នា នូវរាល់សន្ធិសញ្ញា កិច្ចព្រមព្រៀង ដែលបានចុះហត្ថលេខាហើយ និងសេចក្តីប្រកាសព័ត៌មានរួមកម្ពុជា-វៀតណាម ថ្ងៃទី ១៧មករា ឆ្នាំ ១៩៩៥។
លោករៀល ខេមរិន្ទ្រ បានហៅការចុះទៅរបស់ក្រុមការងារពិសេសកម្ពុជា វៀតណាមនោះថា គ្រាន់តែធ្វើឡើងបង្គ្រប់កិច្ច ដើម្បីបង្ហាញថា រដ្ឋាភិបាលកម្ពុជាបានយកចិត្តទុកដាក់លើពលរដ្ឋរបស់ខ្លួនប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ