ក្រុមការងារកម្ពុជា-វៀតណាម ឯកភាពមិនឲ្យមានការប៉ះទង្គិចនៅព្រំដែនទៀត
បន្ទាប់ពីបានចុះទៅពិនិត្យបង្គោលព្រំដែនកម្ពុជា-វៀតណាម ដែលធ្លាប់មានការប៉ះទង្គិចគ្នា រវាងពលរដ្ឋខ្មែរ និងពលរដ្ឋវៀតណាម កាលពីថ្ងៃព្រហស្បតិ៍ម្សិលមិញរួចមក ក្រុមការងារពិសេសកម្ពុជា វៀតណាម បានឯកភាពគ្នាថា មិនត្រូវឲ្យឧបទ្ទវហេតុដូចកាលពីថ្ងៃ ២៨មិថុនា កើតឡើងជាថ្មីទៀតទេ។ លើសពីនេះ ក៏មានការឯកភាពគ្នាគោរពរាល់សន្ធិសញ្ញា និងកិច្ចព្រមព្រៀងនានា ដែលបានចុះជាមួយគ្នារួចហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
ក្រោយកិច្ចប្រជុំ ពេញមួយរសៀល ឈានដល់យប់ថ្ងៃព្រហស្បតិ៍ម្សិលមិញរួចមក ក្រុមការងារពិសេសកម្ពុជា-វៀតណាម បានឯកភាពគ្នាលើបញ្ហាចំនួន ២ធំៗ ដែលរួមមាន ការប្តេជ្ញាមិនឲ្យមានការប៉ះទង្គិចគ្នា ដូចកាលពីថ្ងៃទី ២៨មិថុនា ឆ្នាំ ២០១៥ សារជាថ្មី។ និងឯកភាពគោរពរួមគ្នា នូវរាល់សន្ធិសញ្ញា កិច្ចព្រមព្រៀង ដែលបានចុះហត្ថលេខាហើយ និងសេចក្តីប្រកាសព័ត៌មានរួមកម្ពុជា-វៀតណាម ថ្ងៃទី ១៧មករា ឆ្នាំ ១៩៩៥។ នេះបើតាមការឲ្យដឹងពីលោកស្រី កុយ ពិសី អនុប្រធានគណៈកម្មាធិការព្រំដែនកម្ពុជា ដែលបានប្រាប់វិទ្យុបារាំងអន្តរជាតិ នៅព្រឹកថ្ងៃសុក្រនេះ។
សូមបញ្ជាក់ថា នៅថ្ងៃព្រហស្បតិ៍ទី ១៦កក្កដា ក្រុមការងារពិសេសកម្ពុជា-វៀតណាម បានចុះទៅពិនិត្យទីតាំងដែលមានការប៉ះទង្គិចគ្នារវាងពលរដ្ឋខ្មែរ និងវៀតណាម នៅចន្លោះបង្គោលព្រំដែន កម្ពុជា-វៀតណាមលេខ ២០២-២០៣ ក្នុង ភូមិគោកធ្លក ឃុំត្នោត ស្រុកកំពង់រោទិ៍ ខេត្តស្វាយរៀង។ ការចុះទៅពិនិត្យនោះ គឺដើម្បីសិក្សាស្រាវជ្រាវលម្អិត ជុំវិញការប៉ះទង្គិះគ្នា រវាងពលរដ្ឋនៅព្រំដែននៃប្រទេសទាំងពីរ កាលពីពេលកន្លងទៅ។ ក្នុងការចុះទៅនឹងនោះ ក្រុមការងារពិសេសខាងកម្ពុជា គឺដឹកនាំ ដោយលោកឡុង វិសាលោ រដ្ឋលេខាធិការក្រសួងការបរទេសកម្ពុជា និងខាងវៀតណាម ដឹកនាំដោយ លោក ង្វៀន អាញ់យុង អនុប្រធានគណៈកម្មការព្រំដែនរដ្ឋ នៃក្រសួងការបរទេសវៀតណាម។
យ៉ាងណាក៏ដោយ ទាំងលោកឡុង វិសាលោ និងលោកជៀង អំ អភិបាលខេត្តស្វាយរៀង ដែលបានចុះទៅពិនិត្យនោះ សុទ្ធតែព្រងើយកន្តើយ មិនផ្តល់ការអត្ថាធិប្បាយលម្អិតជាមួយវិទ្យុបារាំងអន្តរជាតិនោះទេ។
គួររម្លឹកជូនផងដែរថា កាលពីថ្ងៃទី ២៨មិថុនា ឆ្នាំ ២០១៥កន្លងទៅ មានមនុស្សជិត ២០នាក់ ដែលមានទាំងខ្មែរ និងវៀតណាម បានរងរបួស ក្រោយពីតំណាងរាស្ត្រគណបក្សសង្គ្រោះជាតិ រួមទាំងប្រជាពលរដ្ឋ ដែលមានទាំងព្រះសង្ឃផង បានប៉ះទង្គិច ជាមួយប្រជាពលរដ្ឋវៀតណាម នៅតាមព្រំដែនក្នុងខេត្តស្វាយរៀង ខណៈដែលពួកគេចង់ពិនិត្យមើលព្រំដែនកម្ពុជា-វៀតណាម។ ហើយតំណាងរាស្ត្របក្សសង្គ្រោះជាតិ លោករៀល ខេមរិន្ទ្រ បានរងការវាយដំ និងរបួសធ្ងន់ជាងគេ។
កាលណោះ អាជ្ញាធរ ខេត្តស្វាយរៀង បានញ្ជាក់ថា ខ្លួនមិនទទួលខុសត្រូវចំពោះករណីអំពើហិង្សានោះទេ ព្រោះថាតំណាងរាស្ត្រគណបក្សសង្គ្រោះជាតិ មិនបានជូនដំណឹង ដល់អាជ្ញាធរវៀតណាម ដើម្បីឱ្យអាជ្ញាធរ ផ្តល់ដំណឹងដល់ភាគីវៀតណាមនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ