លោកសម រង្ស៊ី និងលោកស្រីមួរ សុខហួរ ទៅដល់កូរ៉េខាងត្បូងដឹកនាំធ្វើបាតុកម្មភ្លើងទៀននាយប់នេះ
នៅយប់នេះ សកម្មជន និង អ្នកគាំទ្រអតីតគណបក្សសង្គ្រោះជាតិ នឹងប្រមូលផ្តុំគ្នានៅក្នុងប្រទេសកូរ៉េខាងត្បូង ដើម្បីធ្វើបាតុកម្មទ្រង់ទ្រង់ធំមួយឈ្មោះថា “មហាបាតុកម្មភ្លើងទៀន។ បាតុកម្មជាថ្មីនេះ នឹងដឹកនាំដោយលោកសម រង្ស៊ី និង លោកស្រីមួរ សុខហួរ ដែលជាថ្នាក់ដឹកនាំអតីតបក្សសង្គ្រោះជាតិ។ បាតុកម្មនេះ ធ្វើឡើងទន្ទឹមគ្នានឹងការប្រគុំតន្ត្រីច្រៀងរាំសប្បាយ ដែលរៀបចំឡើងដោយក្រុមហ៊ុនបុរី ឡេង ណាវ៉ាត្រានៅកូរ៉េខាងត្បូងផងដែរ។
ចុះផ្សាយនៅថ្ងៃ៖
ស្តាប់ - ០២:១២
បាតុកម្មទ្រង់ទ្រាយធំរបស់ក្រុមអតីតបក្សប្រឆាំងនឹងធ្វើឡើងចាប់ពីម៉ោង៥ រហូតដល់១០យប់ថ្ងៃទី២០ មេសានេះ នៅក្នុងទីក្រុងGwangju នៃប្រទេសកូរ៉េខាងត្បូង។ តាមអ្នករៀបចំ បាតុកម្មនេះធ្វើឡើងដើម្បីទាមទារការស្ដារលទ្ធិប្រជាធិបតេយ្យឡើងវិញនៅក្នុងប្រទេសកម្ពុជា។ លោកសម រង្ស៊ី លោកស្រីមួរ សុខហួរ និងមន្ត្រីសំខាន់ៗរបស់អតីតបក្សប្រឆាំងដទៃទៀតនឹងដឹកនាំបាតុកម្មនេះដោយផ្ទាល់ បន្ទាប់ពីពួកគេបានទៅដល់ប្រទេសកូរ៉េខាងត្បូងនិងបានចូលរួមវេទិកាប្រជាធិបតេយ្យ សិទ្ធិមនុស្ស និង សន្តិភាពដែលរៀបចំឡើងដោយអង្គការនៃវេទិកាសិទ្ធិមនុស្ស និង សន្តិភាពអាស៊ី (AHPF) កាលពីថ្ងៃសុក្រ។
ក៏ប៉ុន្តែ អ្វីជាការកត់សម្គាល់ គឺនៅក្នុងវេទិកានោះ មានតែលោកសម រង្ស៊ី លោកស្រីមួរ សុខហួរ សហការី អ្នkវិភាគ និង តំណាងអង្គការក្រៅរដ្ឋាភិបាលប៉ុណ្ណោះដែលបានចូលរួម។ ចំណែក លោកអ៊ូ ច័ន្ទរ័ត្ន និង លោក ជីវ កត្តា ដែលបានទៅដល់ប្រទេសកូរ៉េខាងត្បូងតាមការអញ្ជើញរបស់អង្គការនៃវេទិកាសិទ្ធិមនុស្ស និង សន្តិភាពអាស៊ី (AHPF) មិនបានចូលរួមនោះទេ ។ នេះ គឺដោយសារតែលោកស្រីមួរ សុខហួរ ដែលជាអនុប្រធានអតីតគណបក្សសង្គ្រោះជាតិ បានប្រកាសមិនស្វាគមន៍វត្តមានរបស់ពួកគេ ដោយចោទថា ពួកគេលែងជាអ្នកប្រជាធិបតេយ្យទៀតហើយ ព្រោះបានស្នើសុំសិទ្ធិធ្វើនយោបាយពីរដ្ឋាភិបាលកម្ពុជា។
ដោយឡែក សម្រាប់ការធ្វើបាតុកម្មនៅយប់នេះវិញ លោកសុខ ឥសាន អ្នកនាំពាក្យគណបក្សប្រជាជនកម្ពុជា បានចំអកថា នឹងមិនមានមនុស្សចូលរួមច្រើននោះទេ។ តែយ៉ាងណា លោកថា នឹងរង់ចាំមើល ថាតើមានមនុស្សប៉ុន្មានចូលរួមការធ្វើបាតុកម្មនេះ។ ចំណែក លោកយឹម ស៊ីណន ប្រធានចលនាយុវជនអតីតបក្សសង្គ្រោះជាតិប្រចាំនៅប្រទេសកូរ៉េខាងត្បូងវិញរំពឹងថា នឹងមានមនុស្សខ្ទង់ម៉ឺននាក់ចូលរួមធ្វើបាតុកម្មនេះ។
ក្រៅតែពីការធ្វើបាតុកម្ម នៅយប់នេះក្នុងប្រទេសកូរ៉េខាងត្បូងក៏នឹងមានការរៀបចំប្រគុំតន្ត្រីដែលមានការចូលរួមពីអ្នកចម្រៀងកម្ពុជាជាច្រើនរូបផងដែរ។ ការប្រគុំតន្ត្រីនេះ នឹងធ្វើឡើងចាប់ពីម៉ោង៤ រហូតដល់ម៉ោង១០យប់នៅក្នុងទីក្រុងប៊ូសាន។ ក្រុមហ៊ុនបុរី ឡេង ណាវ៉ាត្រា ដែលរៀបចំឱ្យមានការប្រគុំតន្ត្រីនេះ បានអះអាងថា គោលបំណងសំខាន់នៃការប្រគុំតន្ត្រីនេះ គឺ ដើម្បីស្វែងរកមូលនិធិជួយដល់មន្ទីរពេទ្យគន្ធបុប្ផានៅក្នុងប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ