លោក ផៃ ស៊ីផាន៖ ការអំពាវនាវរបស់លោក សម រង្ស៊ី គ្មានឥទ្ធិពលអ្វីមកលើពលរដ្ឋកម្ពុជាទៀតឡើយ
លោក សម រង្ស៊ី អតីតប្រធានគណបក្សប្រឆាំងដែលកំពុងនិរទេសខ្លួននៅក្រៅប្រទេស បានបង្កើនវោហាសាស្ត្រនយោបាយរបស់ខ្លួនមកពីក្រៅប្រទេស តាមរយៈការអំពាវនាវឲ្យប្រជាពលរដ្ឋខ្មែរយកគំរូតាមពលរដ្ឋអាល់ហ្សេរី ទម្លាក់មេដឹកនាំរបស់ខ្លួនចេញពីអំណាច។ ប៉ុន្តែអ្នកនាំពាក្យរដ្ឋាភិបាលកម្ពុជា បានចាត់ទុកការអំពាវនាវនេះថា ជាការអំពាវនាវខ្យល់ ហើយគ្មានឥទ្ធិពលអ្វី មកលើប្រជាពលរដ្ឋកម្ពុជានោះទេ។
ចុះផ្សាយនៅថ្ងៃ៖
ស្តាប់ - ០១:២៦
ការឆ្លើយតបបែបចំអករបស់លោក ផៃ ស៊ីផាន គឺបន្ទាប់ពីលោក សម រង្ស៊ី អតីតប្រធានគណបក្សប្រឆាំងដែលកំពុងនិរទេសខ្លួននៅក្រៅប្រទេស បានបង្កើនវោហាសាស្ត្រនយោបាយរបស់ខ្លួន ដោយអំពាវនាវឲ្យប្រជាពលរដ្ឋកម្ពុជា យកគំរូតាមប្រជាពលរដ្ឋនៅក្នុងប្រទេសអាល់ហ្សេរី ដោយបណ្តេញមេដឹកនាំរបស់ខ្លួនចេញពីអំណាច។ ប៉ុន្តែលោក ផៃ ស៊ីផាន បានចាត់ទុកថា ការអំពាវនាវរបស់លោក សម រង្ស៊ី នោះ នឹងគ្មានឥទ្ធិពលអ្វីមកលើប្រជាពលរដ្ឋកម្ពុជាទៀតឡើយ។ លោក ផៃ ស៊ីផាន បានលើកឧទាហរណ៍ជាក់ស្តែងពីបរាជ័យរបស់លោក សម រង្ស៊ី ក្នុងការអំពាវនាវមិនឲ្យប្រជាពលរដ្ឋចេញទៅបោះឆ្នោត កាលពីខែកក្កដា ឆ្នាំ ២០១៨ នោះថា គឺជាបរាជ័យដ៏ធ្ងន់ធ្ងរមួយ។
គួរជំរាបជូនថា តាមរយៈគណនីយហ្វេសបុករបស់ខ្លួន កាលពីថ្ងៃទី ០៣ មេសា លោក សម រង្ស៊ី អតីតប្រធានគណបក្សសង្គ្រោះជាតិ បានអំពាវនាវជាថ្មីឲ្យប្រជាពលរដ្ឋរបស់ខ្លួនយកគំរូតាមប្រជាពលរដ្ឋនៅក្នុងប្រទេសអាល់ហ្សេរី ដោយបានបណ្តេញលោក អាប់ឌែលឡាស៊ីស ប៊ូតេហ្វ្លីកា (Abdelaziz Bouteflika) ចេញពីអំណាច កាលពីថ្ងៃទី ០២ មេសា ឆ្នាំ ២០១៩នេះ។
លោក អាប់ឌែលឡាស៊ីស ប៊ូតេហ្វ្លីកា (Abdelaziz Bouteflika) កើតនៅឆ្នាំ 1937 បានកាន់អំណាចជាប្រធានាធិបតីអាល់ហ្សេរីតាំងពីឆ្នាំ ១៩៩៩មក ប៉ុន្តែបានចុះចេញពីអំណាច កាលពីថ្ងៃទី ០២ មេសា ឆ្នាំ ២០១៩ កន្លងទៅនេះ បន្ទាប់ពីមានបាតុកម្មប្រឆាំងពីសំណាក់ប្រជាពលរដ្ឋ អស់រយៈពេលជាងមួយខែរួចមក។ ក្នុងនាមជាប្រធានាធិបតីជិត២០ឆ្នាំ លោក ប៊ូតេហ្វ្លីកា គឺជាមេដឹកនាំដែលកាន់អំណាចយូជាងគេ នៅក្នុងប្រទេសអាល់ហ្សេរីនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ