សហជីព៖ក្រោយការដកEBA បញ្ហាដែលគួរឱ្យព្រួយបារម្ភ គឺការសម្រេចចិត្តរបស់ក្រុមហ៊ុនបញ្ជាទិញពីកម្ពុជា
មេសហជីពនៅកម្ពុជាបានសម្តែងការព្រួយបារម្ភជាខ្លាំងចំពោះការសម្រេចចិត្តរបស់បណ្តាក្រុមហ៊ុនទិញសម្លៀកបំពាក់ពីកម្ពុជា បន្ទាប់ពីសហភាពអឺរ៉ុបបានសម្រេចដកការអនុគ្រោះពន្ធលើមុខទំនិញរបស់កម្ពុជា៤០ប្រភេទ។ សម្រាប់មេដឹកនាំសហជីព ប្រសិនបើក្រុមហ៊ុនបញ្ជាទិញអាចសម្រេចកាត់បន្ថយការទិញក្នុងទំហំណាមួយ នោះគឺច្បាស់ណាស់ថា នឹងប៉ះពាល់ដល់ការងាររបស់កម្មករខ្មែរ។
ចុះផ្សាយនៅថ្ងៃ៖
ស្តាប់ - ០២:១៨
លោកអាត ធន់ ប្រធានសហភាពការងារកម្ពុជា បានថ្លែងអះអាងប្រាប់វិទ្យុបារាំងអន្តរជាតិនៅព្រឹកថ្ងៃសុក្រនេះថា ក្រុមហ៊ុនបញ្ជាទិញទំនិញពីកម្ពុជានឹងអាចបើកកិច្ចប្រជុំមួយនាពេលខាងមុខ ដើម្បីសម្រេចលើការបញ្ជាទិញពីកម្ពុជា ក្រោយសហភាពអឺរ៉ុបដកការអនុគ្រោះពន្ធលើទំនិញខ្លះរបស់កម្ពុជា។ ក៏ប៉ុន្តែ លោកអាតធន់ បានព្រមានថា បើសិនក្រុមហ៊ុនបញ្ជាទិញទាំងនោះ នៅតែបន្តទិញដូចធម្មតា ប្រហែលជាមិនប៉ះពាល់ដល់ការងាររបស់កម្មករ កម្មការិនីខ្មែរឡើយ។ ផ្ទុយទៅវិញ បើសិនពួកគេកាត់បន្ថយការទិញតាមភាគរយនៃការដកការអនុគ្រោះពន្ធរបស់សហភាពអឺរ៉ុប នោះទើបជាបញ្ហា។ បញ្ហា បើលោកអាត ធន់ គឺនឹងធ្វើឱ្យកម្មករ កម្មការិនីខ្មែរមួយចំនួននឹងអស់ការងារធ្វើ។
គួរកត់សម្គាល់ថា មកដល់ពេលនេះ មិនទាន់មានក្រុមហ៊ុនបញ្ជាទិញណាមួយសម្រេចលើការបញ្ជាទិញបែបណានៅឡើយទេ។ ប៉ុន្តែក្រុមហ៊ុនបញ្ហាទិញស៊ុយអ៊ែត H&M Group បានបញ្ចេញប្រតិកម្មមុនគេចំពោះការសម្រេចដកការអនុគ្រោះពន្ធលើទំនិញ៤០មុខរបស់កម្ពុជានេះ។ H&M Group បានយល់ស្របទៅនឹងបំណងរបស់សហភាពអឺរ៉ុបដែលចង់ដោះស្រាយបញ្ហារំលោភបំពានធ្ងន់ធ្ងរលើសិទ្ធិមនុស្ស និងសិទ្ធិស៊ីវិលនៅក្នុងប្រទេសកម្ពុជា។ ប៉ុន្តែក្រុមហ៊ុននេះក៏បានអះអាងថា ការសម្រេចរបស់សហភាពអឺរ៉ុប នឹងផ្តល់ផលប៉ះពាល់អវិជ្ជមានដល់អ្នកធ្វើការងារនៅក្នុងឧស្សាហកម្មវាយនភ័ណ្ឌ។
ចំពោះការលើកឡើងរបស់ក្រុមហ៊ុនH&M Groupនេះ លោកប៉ាវ ស៊ីណា ប្រធានសម្ព័ន្ធសហជីពចលនាកម្មករកម្ពុជាបានចាត់ទុកថា ជាការបង្ហាញពីក្តីកង្វល់ ដើម្បីឱ្យរដ្ឋាភិបាលកម្ពុជាយកចិត្តទុកដាក់បន្ថែមទៀតលើបញ្ហាសិទ្ធិមនុស្ស និងសិទ្ធិការងារនៅក្នុងប្រទេសកម្ពុជា។ បើតាមលោកប៉ាវ ស៊ីណា កម្ពុជានៅមានពេល៦ខែទៀតក្នុងការកែលម្អនូវបញ្ហាសិទ្ធិមនុស្ស និងសិទ្ធិការងារតាមការតម្រូវរបស់សហភាពអឺរ៉ុប ដើម្បីទទួលបានមកវិញនូវប្រព័ន្ធអនុគ្រោះពន្ធEBA។
ក្រសួងពាណិជ្ជកម្មកម្ពុជាមិនអាចទាក់ទងសុំការបញ្ជាក់ពីបញ្ហានេះបាននោះទេ។ ប៉ុន្តែតំណាងរោងចក្រដែលកំពុងផលិត និងនាំចេញទំនិញទាំង៤០ប្រភេទដែលអឺរ៉ុបសម្រេចយកពន្ធបានប្រាប់ក្រសួងពាណិជ្ជកម្មថា ពួកគេនៅតែមានលទ្ធភាពបន្តផលិតកម្មនៅកម្ពុជា ដើម្បីនាំចេញទៅកាន់ទីផ្សារអឺរ៉ុបដដែល ដោយសារតែរដ្ឋាភិបាលកម្ពុជាបាន និងកំពុងអនុវត្តនូវកំណែទម្រង់មុតស្រួចជាកញ្ចប់ដែលបានដាក់ចេញពីកាលថ្ងៃទី២៩ ខែមីនា ឆ្នាំ២០១៩កន្លងទៅ។ នេះបើយោងតាមសេចក្តីប្រកាសព័ត៌មានរបស់ក្រសួងពាណិជ្ជកម្មកាលពីថ្ងៃទី១៣ ខែកុម្ភៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ