សង្គ្រោះជាតិមានភាពស្ទាក់ស្ទើរចូលប្រជុំសភានៅថ្ងៃស្អែក
អ្នកនាំពាក្យគណបក្សសង្គ្រោះជាតិនៅថ្ងៃទី០៦តុលានេះបានបញ្ជាក់ថា តំណាងរាស្ត្រគណបក្សសង្គ្រោះជាតិទាំង៥៥រូបនៅមិនទាន់ច្បាស់ពីគម្រោងនៃការចូលប្រជុំសភានាថ្ងៃទី៧តុលាស្អែកនេះទេ។ ហើយក្នុងពេលជាមួយគ្នានេះ លោកនាយករដ្ឋមន្ត្រី ហ៊ុន សែន ក៏បានបញ្ជាក់ត្រលប់ទៅវិញថា ចូលសភាឬមិនចូលសភាគ្មានអ្វីរាំងស្ទះដំណើរការការងារប្រចាំថ្ងៃរបស់ពលរដ្ឋនោះទេ។
ចុះផ្សាយនៅថ្ងៃ៖
ស្តាប់ - ០១:៣៤
ថ្លែងប្រាប់វិទ្យុបារាំង លោក យ៉ែម ប៉ុញ្ញារិទ្ធ អ្នកនាំពាក្យគណបក្សសង្គ្រោះជាតិថា តំណាងរាស្ត្រគណបក្សសង្គ្រោះជាតិអាចនឹងចូលប្រជុំសភានៅស្អែកប៉ុន្តែ ភាពប្រាកដប្រជាណាមួយលោកនៅមិនទាន់ច្បាស់នៅឡើយទេ។
លោក ឡេង ប៉េងឡុង អ្នកនាំពាក្យរដ្ឋសភាឲ្យដឹងថា គ្មានការជូនដំណឹងអ្វីជាផ្លូវការអំពីការចូលរួមប្រជុំសភារបស់តំណាងរាស្ត្រគណបក្សសង្គ្រោះជាតិទាំង៥៥រូបនេះនៅឡើយទេ។ ប៉ុន្តែព័ត៌មានក្រៅផ្លូវការដែលលោកទទួលបានគឺតំណាងរាស្ត្រគណបក្សសង្គ្រោះមួយចំនួនចូលរួមប្រជុំ មួយចំនួនទៀតក៏បន្តអវត្តមាន។
ដោយឡែកក្នុងពេលជាមួយគ្នានេះ គ្រាអញ្ជើញចែកសញ្ញាបត្រដល់និស្សិតនៅសកលវិទ្យាល័យមួយនៅព្រឹកថ្ងៃទី០៦តុលានេះ លោកនាយករដ្ឋមន្ត្រី ហ៊ុន សែន ថា ការចូលសភាឬមិនចូលសភារបស់គណបក្សប្រឆាំងគ្មានអ្វីរាំងស្ទះដំណើរការការងារប្រចាំថ្ងៃរបស់ពលរដ្ឋនោះទេ។ សម្រាប់លោកនាយករដ្ឋមន្ត្រី វាក៏គ្មានអ្វីត្រូវបារម្មណ៍ដែរ។
គួររម្លឹកថា ក្រុមតំណាងរាស្រ្តគណបក្សសង្រ្គោះជាតិ មិនបានចូលប្រជុំសភាពេញអង្គ រយៈពេលជាង ៤ខែ មកហើយ ចាប់តាំងពីខែឧសភា ឆ្នាំ២០១៦ បន្ទាប់ពីតុលាការមានចំណាត់ការ លើលោក កឹម សុខា ប្រធានស្តីទីគណបក្សសង្រ្គោះជាតិ ជុំវិញករណីមិនចូលខ្លួន ធ្វើជាសាក្សី នៅតុលាការ ទាំងមានអភ័យឯកសិទ្ធិរដ្ឋសភា។
សូមបញ្ជាក់ថា កិច្ចប្រជុំសភានៅថ្ងៃស្អែកនេះ ជាកិច្ចប្រជុំសភាលើកទី៧នីតិកាលទី៥ដោយមានរបៀបវារៈមួយចំនួនដូចជាៈ ការស្ដាប់ព្រះរាជសារព្រះមហាក្សត្រ ការបោះឆ្នោតជ្រើសរើសបេក្ខជនអគ្គសវនករចំនួនបីរូប ពិនិត្យទៅលើសេចក្ដីច្បាប់ស្ដីពីការប្រកបមុខរបរវិជ្ជាជីវៈក្នុងវិស័យសុខាភិបាល និង សេចក្ដីព្រាងច្បាប់ពាក់ព័ន្ធអាស៊ានជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ